Read gitonga Mavingu 16 Bible Online

Mavingu 16 - gitonga bible

Mavingu 16

¹Muthu khuye a lugago makungo khu monyoni gwaye, aholu phindrulo nya lisine ya guta khu ga PFHUMU Nungungulu.

²Satshavbo iso muthu a girago mapimoni gwaye, a gu si wona na si agide, aholu PFHUMU Nungungulu a gu khedza mipimiso yaye.

³Tumba PFHUMU Nungungulu ga mithumo yago yatshavbo, gasi makungo yago ma na mana gudugelela.

⁴Satshavbo silo a giridego PFHUMU Nungungulu a si vegede thumo waye, ambari avo nya guvivbedwe khu myonyo, va vegedwe litshigu nya mhango.

⁵PFHUMU Nungungulu a ngu vengana ni va nya matshandza, vathu vovo gima kha va na vbuluga.

⁶Muthu a gu ni wuhindzi ni gutumbega, a na handzwa sighoho saye, avo va ningago githawo PFHUMU Nungungulu, va na duga ndzilani nya guvivbe.

⁷Muthu a tsakisago PFHUMU Nungungulu khu mavbanyelo yaye, Uye a na mu gira a vbanya khu gurula ambari vbakari ga valala vaye.

⁸I tshukwana gu mana sidugwana khu ndzila nya gululame, guvbindra gu mana nya singi, khu wudambane.

⁹Khu monyoni gwaye muthu a ngu pimisa umo a vbwetago guya umo, aholu PFHUMU Nungungulu khuye a mu yeyedzago ndzila.

¹⁰Khu kanani ga mufumeli gwa gu duga magana nya tshivba, aholu a gu lamula a nga hosisi likana laye.

¹¹Pimo ni gikalo nya gululame, sa guta khu ga PFHUMU Nungungulu, mipimo yatshavbo nya yadi, khuye a yi giridego.

¹²Kha dzini gukhuye vafumeli va thuma mithumo nya guvivbe, kholu wufumu wa gu tiyiswa khu gululama.

¹³Vafumeli va gu nengedziswa khu avo va dusago magana nya yadi, va tsakiswa khu avo va ganelago lisine.

¹⁴Likhulo la mufumeli la gu fanana ni mwango wu tivisago lufu, aholu vale va gengedego va ngu kodza gu li rudzisa.

¹⁵Gutshulega nya khovbe ya mufumeli gu yeyedza gupwani gomo guvbanya, wa gu tsakedwa khuye, gu fanana ni lipfhi li wisago ndzadzi nya guhegise.

¹⁶Gu mana guti guvbindra gu mana ndralama, ni gu mana mapimo, guvbindra gu mana parata.

¹⁷Ndzila ya valulamidego khu gu duga guvivbani, uye a vegedzago ndzila yaye, a gu sayisa hefemulo waye.

¹⁸Matshandza ma gu rana libango, ni gu dzi khusedza gwa gu thangela lufu.

¹⁹I tshukhwana gu dzi nogisa u vbanya gumogo ni vathu nya gurule, guvbindra gu kabana silo nya guphangwe ni va nya matshandza.

²⁰Uye a yingisago gululekwa, a na dugelela, ni uye a tumbago PFHUMU Nungungulu, a na mana makategwa.

²¹Uye a gengedego a na ranwa muthu nya mapimo, ni magana nya gulombele ma ngu etisa guti.

²²Uye a gu ni mapimo a na ni nambo nya womi, aholu gipumbu gya gu mana tsayiso khu wupumbu waye.

²³Muthu nya mapimo a gu ganela khu wugengeli, magana yaye ma gu tulela vathu va khodwa.

²⁴Magana nya gutsakise ma ngu fanana ni gipapu nya wulombe, gi lombelago kanani gi bwelo khavbo gi tiyisa marambo.

²⁵ Yomo ndzila muthu a yi wonago gukhwatshi yi lulamide, aholu khu guhegisa ya gu mu yisa lufuni.

²⁶Muthu a thumago a gu gurumedzwa khu ndzala, kholu likana ni girumbu khiso si mu rumago.

²⁷Muthu nya madhadhavale a gu luga mano nya guvivbe, magana yaye khya guvbisa nga malavbelavbe nya nilo.

²⁸Muthu nya guvivbedwe khu monyo, a gu wusa mayunga; ni muthu nya milembo a gu hambanisa wupari.

²⁹Muthu nya dzihanyi, a gu kutsedzela muakelane waye a mu gimbidzisa khu ndzila nyamba yadi.

³⁰Uye a runyago a gu alakanyela guvivba, a gu hodza gihofu, vbedzide makungo yaye.

³¹Ndzudzu nya dzinvi gihugu nya wudhumo, wu manwago khu mavbanyelo nya gululame.

³²Uye a hwelago gu goroga, a ngu vbindra ndrena, ni muthu a kodzago gutimisela a guvbindra uye a phangago lidhoropa.

³³Vathu va ngu kodza gu wudzisa khu gulola dzisolo, aholu uye a ningago phindrulo khu Pfhumu Nungungulu ekha.