Read gitonga Mavingu 22 Bible Online

Mavingu 22 - gitonga bible

Mavingu 22

¹Gu manega nuri ni lina nya ladi, guvbindra thomba nya gutale; ni guzundzega nugo, guvbindra parata ni ndralama.

²Gitetema ni gisiwana va gutshangana ga gilo gimwegyo; vatshavbo va di girwa khu PFHUMU Nungungulu.

³Muthu a gengedego a gu wona mhango yi ngari hwindzo a sihala; gasi sipumbu sa gu vboha vbafuvbi, khu hwane si dzi laya.

⁴Tshatshazelo nya gu dzi nogise, ni guthava PFHUMU Nungungulu, thomba, wuzundzo ni guvbanya.

⁵Ndzila ya muthu nya mavbanyelo nya guvivbe yi na ni miba ni mazinga, aholu uye a sayisago womi waye, a gu khala hwindzo nayo.

⁶Hevbudza gyanana ndzila gi yelago gu yi landra, kholu, ambari gya gu gumba, gima kha gi na hambana nayo.

⁷Gisiwana gya gufumedwa khu gitetema, ni uye a fiyarigo mangava, a gu khala khumbi ya mufiyarisi.

⁸Uye a yalago wuvivbi, a na vbwera tshanisa; ni ndronga a tshanisago khiyo vakwawe, yi na mu fanyegela.

⁹Muthu nya wuhindzi, a na mana makategwa, kholu iso a gu naso, a gu hodza gumogo ni gisiwana.

¹⁰Tutumisa muthu nya milembo, ma na vbela mayunga, gu vbela guvbenyisana ni guyuyutelana.

¹¹Uye a tsakelago gu mana monyo wu agidego, nari ni magana nya gutsakise, a na khala pari ya mufumeli.

¹²Maho ya PFHUMU Nungungulu ma gu vhikela muthu nya mapimo, aholu a ngu ganedza magana ya mukanganyisi.

¹³Ngara a gu ganela, khuye: “Nghala yomo vbavbandze! Nya gu duga, nyi naya songwa vbakari nya ndzila.”

¹⁴Khanani ga nyamayi nya gibhayi, liphala nya guete, uye a gorogedwago khu PFHUMU Nungungulu a na thegela umo.

¹⁵Wupumbu wu namarede monyoni ga gyanana, aholu lipitso nya gulaye, li ngu kodza gu wu tsapurula li wu yisa hwindzo.

¹⁶Uye a tshanisago gisiwana, a gu gi ninga wufumu, aholu uye a ningago gitetema, a gu gi thela wusiwana.

¹⁷Demba ndzeve u yingisa magana ya va nya guti, vegedza monyoni sihevbudzo nyi gu hevbudzago.

¹⁸Kholu wa gu si vega ni gu khala monyoni gwago ni kanani gwago, si na gu tsakisa ngudzu.

¹⁹Muhuno nyi ngu gu hevbudza esi, gasi u fela gutumbega ga PFHUMU Nungungulu.

²⁰Gasi kha nya gu lovela magumararu sipimo, [2] mayelano khu sihevbudzo ni wugengeli;

²¹si na gu hevbudzago gu wona magana nya lisine ma tumbegidego, gasi u kodza gu bweledza phindrulo nya lisine ga avo va gu rumedego.

²²U nga phangi gisiwana silo saye, kholu gi gu gisiwana, ni mugulamulani nya mahungu, u nga tsayisi uye a gu mwalo gilo,

²³kholu PFHUMU Nungungulu a na vhikela mahungu yaye gulamudwani, gambe a na songa vatshavbo avo va va phangago.

²⁴U nga thangi wupari ni muthu nya dzihanyi, ambari gu gimbila ni muthu nya gihafane;

²⁵kholu wa gu olovela mavbanyelo yaye, u na dzi dembela naphwi nya gu dzi songe khuwo.

²⁶U nga hengeli ni avo va fungago khu gu pharana mandza, va khala dzithembedzi nya milandru ya vane;

²⁷kholu u na tandrega gulivba u bela mhangoni nya gu u dzegedwa ambari ni lidawu lago, u lala vbavbatshi.

²⁸U nga vbindrugedzi mivbingano ya gale, yi pandridwego khu vavelegi vago.

²⁹Ina uwe khu mu woni muthu a thumago khu wugengeli thumo waye, gani? Uye a na vegwa a thumela vafumeli, nasiri gu thumela vanyalidede.