Read gitonga Mavingu 28 Bible Online

Mavingu 28 - gitonga bible

Mavingu 28

¹Sighohi sa gu thava ambari sa gumba tutumiswa khu muthu, aholu, avo va lulamidego va gu tiya nga nghala.

²Ya gu manega pfilupfilu tigoni, gutala guvbindrugedzwa vafumeli, aholu gwa gu manega vathangeli nya gugengele ni mapimo, litigo la gu khala gurulani.

³Muthu nya gisiwana a dzi girago gitetema, a tshanisa sisiwana sikwawe, a gu fanana ni ndzadzi nya ndrambi yi kukulutago mavbila yatshavbo gu si tshali gilo.

⁴Avo va hambanago ni Nayo, va gu zundza sighohi, aholu avo va sayisago Nayo, va gu dwana naso.

⁵Vathu nya guvivbedwe khu myonyo kha va siti iso nya gululame, aholu avo va vbwetago PFHUMU Nungungulu, va nguti silo satshavbo.

⁶Gisiwana gi dzi vbanyelago khu mavbanyelo nya gululame, gi nguvbindra uye a fumidego, aholu gimbilago khu ndzila nya guwegele.

⁷Uye a sayisago Nayo, gyanana nya mapimo, aholu oyu a hengelago ni va nya limidzo, a gu poyila babe waye.

⁸Uye a andrisago thomba yaye khu guvelegisa dzitsapawu nya gufiyarise, a gu yi hengeledzela uye a pwelago wuhindzi sisiwana.

⁹Uye a dzi girago givbwiri a si vbweti gu yingisa nayo, nombelo waye nuwo, wu na nyenyeziswa.

¹⁰Uye a ndreyisago va nya gululama a va yisa ndzilani nya guwegele, a na thegela phalani a li kembidego abune, aholu uye a si dzumeligo gu sengwa, a na mana tshatshazelo nya wadi.

¹¹Muthu nya gitetema a gu pimisa gukhuye gengede, aholu, gisiwana nya gugengele gi ngu mu wona na si pimi gilo.

¹²Va gu fumiswa va nya gululama, gomo gunengela nya gungi ngudzu; aholu va gu fuma va nya guvivbedwa khu myonyo, vathu va guya sihala.

¹³Uye a sihago sighoho saye gima kha na katega, aholu uye a si dawulelago a si ghohi gambe, a na giredwa wuhindzi.

¹⁴Kategide muthu wule a thavago PFHUMU Nungungulu gikhati gyatshavbo, aholu uye a bangisago monyo waye, a na thegedwa khu mhango.

¹⁵Mufumeli nya guvivbedwe khu monyo a gu fuma litigo nya sisiwana, a gu fanana ni nghala yi bhongago ni gikankanka gya gupwa ndzala.

¹⁶Muthangeli nyambana mapimo, a gu engedzela sitshaniso nya singi, aholu uye a gumba dzumela gu rengeledwa, a na laphisa matshigu yaye nya gufume.

¹⁷Muthu a dzi rwegidego nandru khu gu songa muthu, a na khala mulegalegi kala gufa, nyamba vhikedwa khu muthu.

¹⁸Muthu a gimbilago khu ndzila nya gululame, a na vbuluga, aholu uye a gimbilago khu ndzila nya guwegele, a na thega khu githugedza.

¹⁹Uye a dzi limelago lithembwe laye a na mana guhodza nya gutale, aholu uye a landriselago iso nyamba phasa gilo, a na khala gisiwana nya gikhongolo.

²⁰Muthu a tumbegidego a na tala khu makategwa, aholu uye a vbwetago gufuma khu givbiredza, gima kha na hamuga tsayiso.

²¹Khandri gwadi gukhedza khu khovbe nya muthu, kholu khu gipandrenyana nya guhodza, muthu a ngu dzi kodza gu hambanisa nayo.

²²Muthu nya ligungo a gu tutumela gufuma, aholu kha dziti gukhuye a na khala gisiwana.

²³Uye a kawukago muthu kwawe a ngu zundzwa, guvbindra uye a tshambiselago khu gu ganela basi.

²⁴Uye a belago babe waye mwendro mayi waye, na gukhuye: “Khandri gighoho,” a na khala pari nya dzimbafa.

²⁵Muthu nya makolo a ngu wusa mayunga, gasi uye tumbago a PFHUMU Nungungulu a na dugelela.

²⁶Muthu a dzi tumbago uye mune wurumba, gipumbu; gasi uye a gimbilago khu wugengeli, a na vbanya.

²⁷Uye a ningago gisiwana gima kha na hamuga gilo, aholu uye a gi segelago maho, a na vadwa khu vathu.

²⁸Va nya guvivbedwa khu myonyo va gu vegwa gu khala vafumeli, vathu vatshavbo va gu phalalega vaya sihala, aholu va gufa, va nya gululama, va gu engedzelana.