Read gitonga Mavingu 29 Bible Online

Mavingu 29 - gitonga bible

Mavingu 29

¹Uye a kanyisago mwendro gumba dzumela gululekwa, a na mbembiswa na si pimi gilo, a na hamuga ni uye nya gu mu wuse.

²Va nya gululama va gu fumela litigo, vathu va gu tsaka, aholu, va gufuma va nya guvivbedwa khu myonyo, vathu va gu lila.

³Muthu a golago guti a gu nengedzisa babe waye, aholu uye a golago sibhayi, a gu mwaladzela thomba yaye.

⁴Mufumeli a gu landrisa milayo nya yadi, a na tiyisa litigo, aholu a gu gola ngudzu dzitsapawu, a na li mbembisa.

⁵Uye a sengedzelago muakelane waye, a gu mu dembela naphwi migondroni gwaye.

⁶Muthu nya guvivbedwe khu monyo, a gu modwa khu naphwi a wu riyidego, aholu wule a lulamidego, a gu embelela na tsakide.

⁷Muthu nya gululame a ngu yiti fanelo nya gisiwana, aholu uye nya guvivbedwe khu monyo kha vbweti ni gu siti.

⁸Vathu nya dzihanyi va gu wusa pfilupfilu ni mayunga dhoropani, vathu nya guti va gu rudzisa myonyo.

⁹Muthu nya mapimo a gu ketsarana ni gipumbu, ambari a gu goroga mwendro guhegela, gima kha gu manegi gurula.

¹⁰Avo va golago gu songa vathu, va gu vengana ni muthu nya gululame, aholu avo valulamidego, va gu va vhikela.

¹¹Muthu nya gipumbu a gu yeyedza likhulo laye latshavbo, aholu uye a gu ni guti, a gu dzi phara a li siha.

¹²Mufumeli a golago gu yingisa malipha, dzindruna dzaye dzatshavbo, dzi na khala vathu nya guvivbedwe khu monyo.

¹³Gisiwana ni mutshanisi, va ngu tshangana gumogo; aholu PFHUMU Nungungulu khuye a wenengedzago maho yawe vatshavbo.

¹⁴Mufumeli a lamulago sisiwana khu nongameto, wufumu waye wu na tiyiswa wu simama kala gupindruga.

¹⁵Lipitso ni gululeka si ngu ninga mapimo, aholu gyanana gi dandrago gi si laywi, gya gu thela dzitshoni mayi waye.

¹⁶Gikhati va nya guvivbedwa khu myonyo va engedzelanago tigoni, sighoho sa gu engedzelana khu tshivba ni tshivba; aholu va nya gululama va na wona gumbembiswa gwawe.

¹⁷Luleka gyanana gyago, gi na gu ninga gurula, gi na nengedzisa monyo wago.

¹⁸Avbo gu gu mwalo gutuledwa ga Nungungulu, gu mwalo Nayo, aholu kategide uye a sayisago Nayo.

¹⁹Gulaya githumi khu magana basi, kha si phasi gilo, kholu, ambari gya gu ma yingisa, kha gi ma vegi hungoni.

²⁰U ngu mu wona muthu nya guvbiredzele gu ganela, gani? I tshukwana muthu nya gipumbu, guvbindra uyoyo.

²¹Uye a henago githumi gyaye gukhugela wudzahani waye, khu guhegisa gi na mu lomba gu khala gyanana gyaye.

²²Muthu nya gihafane a gu wusa mayunga, uye nya dzihanyi, a gu thela pfilupfilu.

²³Muthu nya matshandza a na vbwasamiswa, aholu uye nya gu dzi nogise a na khusedzwa.

²⁴Wule a girago wupari ni mbafa a gu venga womi waye, kholu a ngupwa sihoso, aholu kha si pwadzi.

²⁵Guthava muthu gu dzi dembela naphwi, aholu uye thavago PFHUMU Nungungulu, a na mana guvbanya.

²⁶Vathu nya vangi va gu vbweta gukhavo va godwe khu vafumeli, aholu PFHUMU Nungungulu khuye basi a lamulago vathu vatshavbo.

²⁷Muthu nya gululame a ngu vengana ni muthu nya guvivbedwe khu monyo, ni uye nuye nya guvivbedwe khu monyo, a ngu vengana ni uye nya gululame.