Read gitonga Mavingu 30 Bible Online

Mavingu 30 - gitonga bible

Mavingu 30

¹Aya khu magana ya Aguri, mwamana wa Jaki, wa Masani. A ma ganedego ga Itiyeli; Itiyeli a embela Ukali.

²Eni nyi madhadhavale guvbindra vambe vathu, nyi mwalo mapimo nga vambe vathu.

³Kha nya hevbula guti, ambari gupima Uye a Agidego.

⁴Khu mani a gwedego ndzadzini bwelo khavbo a wuya? Khu mani a kodzago gufumbaredza phuvbo khu mandza yaye? Khu mani a fumbelago mati mwendrani gwaye? Khu mani a emisidego dzikhona nya mahegiso nya litigo? Khuye mani lina laye, ni lina la mwanaye, mwendro sago u ngu liti?

⁵Magana yatshavbo ya Nungungulu ma agide, gitshangu gya vatshavbo vale va Mu tumbago.

⁶U nga engedzeli simbe ga magana Yaye, Uye a na gu kawuka, u manega nuri muthu nya malipha.

⁷Silo sivili nyi gu lombago, aholu, u nga bombi gu nyi ninga nyi si gufi:

⁸Gusengedzela ni malipha, si na gimbilele hwindzo ni eni, u nga nyi ningi wusiwana mwendro gughanya, nyi ninge guhodza gu nyi enelelago.

⁹Gasi gu si giregi gu, nya gu khura ngudzu nyi tshuka nyi gu danga, kheni: “Khu mani Uye PFHUMU Nungungulu wakone?” Kholu nya gu khala gisiwana, nyi phela guba; nyi na nyenyezisa kharati lina la Nungungulu.

¹⁰U nga lembi githumi mbeli ga mune waye, kholu, a nga gu vala a gu rwega nandru.

¹¹Gu na ni vathu vale va valago babe wawe, ambari ni gumba zundza mayi wawe.

¹²Vomo va dzi wonago na va agide, aholu, na va si gu handzwi guvivba va gu nago;

¹³vale maho yawe ma khusegidego ni dzitshi dzawe dzi laphidego.

¹⁴Vomo vathu vale magwaha yawe a gu matshari ni dzindzarara dzawe nya mwagwaha, a gu migala, gasi gu vbedza khayo sisiwana mafuni ni vale va hamugago gilo vbakari nya vathu.

¹⁵Tshundrwa wu na ni sanana sivili nya sagadzyana si ranwago pwani khiso: “Nyi ninge, nyi ninge!” Silo siraru nyamba guti gu khura, ni sina si si ganeligo, khiso: “Basi!”

¹⁶Lithowo nya vafi, nyamayi nya gyumba, mafu ma si kodwigo khu mati, ni nilo, wu si ganeligo khuwo: “Basi.”

¹⁷Maho nya muthu a kanyisago babe waye, ni gumba yingisa mayi waye, ma na rumbudwa khu vamahigonganye, ma rothedwa khu sifondro nya lighama.

¹⁸Somo silo siraru si nyi samadzisago ngudzu, nigyo nya wu na nyi si gi pimigo;

¹⁹Ndzila nya lighama damboni, ndzila nya nyoga musiwindrini, ndzila nya paketi vbakari nya mati ni ndzila nya mwama a haladzanago ni mbiri.

²⁰Kharato nuye nyamayi nya gibhayi, a gu hodza a bavbula likana, khuye: “Eni gima nyi si giri gilo nya guvivbe.”

²¹Silo siraru si ndrendremedzisago mafu, ina, ni sina ma si kodzigo gu si tiyela, a gu esi:

²²Githumi gya gu khala mufumeli, gipumbu gya khura khu guhodza;

²³nyamayi nya gumba haladzwa wugadzi, ni githumi nya nyamayi gya gu dzega wulanga wa pfhumugadzi yaye.

²⁴Silo sesi sa sina sidugwana ngudzu mafuni momu, aholu si gengede, si tade khu guti ngudzu.

²⁵Wuguhudzi lifumbu li gu mwalo tshivba, aholu gikhati nya maronga wa gu hengeledzela guhodza gwawe;

²⁶sihulo ni niso sirengo nyambana tshivba, gambe si ngu dzi vbahela dzinyumba dzawe musiwindrini.

²⁷Dzimbera dzi mwalo mufumeli; aholu dzi ngu vbuvba gumogo khu mitsawa.

²⁸Givarara u ngu kodza gu gi mola khu mandza, aholu igyo gya ngu manega ni dzinyumbani dza vafumeli.

²⁹Somo silo siraru si gu ni magimbilelo nya gutsakise, ni igyo nya wu na gi gimbilago khu matshandza.

³⁰Nghala yi gu ni tshivba guvbindra sirengo satshavbo, yi si thavigo gilo;

³¹khonge wu dzi tumbago; nyamabhongwe, ni mufumeli mbeli nya gikwata gyaye a gumba yela gu ganedzwa khu muthu.

³²Wa gu bani u dzi giride gipumbu u dzi khusedza, mwendro gu gira guvivba, vega mandza kanani.

³³Kholu matega ma gu duga khu gukhurungedwa mahwe, ni dzithonvu dza gu gamwa, dza gu duga litongola; kharato nugo, uye a kutsedzelago gigaha, a gu wusa mayunga.