Read gitonga Mavingu 6 Bible Online

Mavingu 6 - gitonga bible

Mavingu 6

¹Mwanangu, wa gu bani u dzi ningede gu livba milandru ya muakelane wago, ni gu bani u sambanyide gu livbela milandru ya mumbe muthu,

²u dzi modziside khu guganela gwago, magana yago ma gu hungide.

³Khu guralo, mwanangu, kha nga olu u thegedego mandzani ga muakelane wago, indra u ya dzi nogisa khu githawo; u khongotela muakelane wago!

⁴Maho yago ma nga mani ligovbe, ni dzitshi dzago dzi nga woteli;

⁵dzi vbanyise kha nga mbavala mandzani ga musoti, ni ginyoni gi kavilago ngodzi.

⁶Uwe ngara wewe, nga khedza wuguhudzi, u wona mavbanyelo yaye, u na khala muthu nya gugengele.

⁷Wu mwalo mufumeli, ambari muthangeli ni mugimbidzisi;

⁸wa gu hengeledzela dzimbuva vbamarongatunu, wa dzi vegela guhodza khu gikhati nya guvbwere.

⁹Kala lini nu nga gu lade, ngara wewe? Gasi u na khendzuga lini khu ligovbeni?

¹⁰Khidzo kharato, wa gu lala vbadugwana, gimbe gikhati u wotela, gimbe gikhati gambe u khumbarana mawogo, u lala.

¹¹ Khu guralo, wusiwana wu na gutela kha nga mbafa, ni wumbwa wu na vboha kha nga muthu a somidego matshari.

¹²Muthu nya dzihanyi gighevenga, khuye a yalago mapongowongo.

¹³A gu khwavbigisa maho, a runya, a ghughuta migondro vbavbatshi, a gira siwoniso khu dzinyala;

¹⁴Monyoni gwaye gu tade khu wudambane; gikhati gyatshavbo a gu luga gikungo nya guvivbe, a wusa mayunga.

¹⁵Khu guralo, libango li na mu thegela khu gipitipiti; khu githugedza a na thega a mbemba nyamba wuga gambe.

¹⁶Somo livbandre na gimwegyo silo a si vengago PFHUMU Nungungulu, nya livbandre na sivili si gorosago hefemulo waye, a gu esi:

¹⁷Maho nya gu dzi gugumugise, lidimi nya guganele malipha, mandza ma vbaladzago novba nyambana nandru,

¹⁸monyo wu lugago makungo nyambasi yadi migondro yi tutumelago gu gira silo nya guvivbe,

¹⁹fakazi nya gukanganyise yi phalalegisago malipha ni uye a wusago mayunga vbakari ga vandriyaye.

²⁰Mwanangu, vegedza milayo ya babe wago, u nga hambani ni sihevbudzo sa mayi wago.

²¹Si vegedze gikhati gyatshavbo monyoni gwago, u si hunga thamoni gwago.

²²Si na gu hetedza ndzilani gwago, wa gu lala, si na gu vhikela, wa gu wuga, si na gu bhudzisa.

²³Kholu milayo kandriya, sihevbudzo i safa nya guwonegele, ni gukawukwa nya gululame, ndzila yi yisago guvbanyani;

²⁴yi na gu vbulugisa ga nyamayi nya mavbanyelo nya guvivbe, ni ga magana yaye nya wusengedzeli.

²⁵Monyo wago wu nga dzumeli gu modwa khu gu dogorela wumburi waye ambari gundrindrwa khu gurunya nya maho yaye.

²⁶Nyamayi nya liphuphulu a ngu fidhwa khu gipandre nya gibaba, aholu nyamayi nya gibhayi a gu sota mavbanyelo nya yadi.

²⁷Ina muthu a ngu wugarela nilo vbakhanatunu gwaye, dzingandzu dzaye dzi sivbyi, gani?

²⁸Mwendro a ngu kodza gu gimbila khu vbatshani nya magala nya nilo a sivbyi, gani?

²⁹Khu kharato, muthu watshavbo a bhayago ni mwangadzi wa mumbe muthu, a na ni nandru, kha na vbuluga gu tsayiswa.

³⁰Mbafa yi nga vadwi, ya guba khu gupwa ndzala;

³¹aholu ya gu manwa yi na livba khu livbandre na dzimbili dzinyondro. Gambe yi na ningela thomba yatshavbo ya ndrangani gwaye.

³²Uye a bhayago ni mwangadzi wa vane mwalo mapimo, uye a girago isoso, a gu dzi kembela liphala laye.

³³A na mana tsayiso ni gu poyidwa, dzitshoni dzaye mwalo a na gu dzi tshulago.

³⁴Kholu mwama a mu bhayedego mwangadzi waye a gu vila khu likhulo, kha na mu tsetselela litshigu nya gulamudwe.

³⁵Kha na dzumela gu livbwa wugode, ambari gu khathala khu gu ningwa silo nya gutale.