Read gitonga Mavingu 8 Bible Online

Mavingu 8 - gitonga bible

Mavingu 8

¹Guti gu ngu huwelela, ni mapimo ma ngu pwadza malito yaye;

²Gwa gu ema khu vbatshani nya sigomo, ni mahandzakanyani nya dzindzila;

³gwa gu ema khu dzindzilani ni dzinyangwani nya lidhoropa gu laledza khugo:

⁴Nyi ngu mi embelani enu vathu; lito langu la guvbweta sanana satshavbo nya vathu.

⁵Enu nyambana mapimo gengelani; enu sipumbu hevbulani gupimisa.

⁶Dembani ndzeve mu yingisa, kholu nyi ngu hadza gu mi embela mahungu nya makhongolo, likana langu li na tulega li ganela silo nya lisine.

⁷Kholu likana langu li na ganela lisine, ni kanani gwangu kha gu goli silo nya guvivbe.

⁸Magana yatshavbo ya konani gwangu ma lulamide; ga ayo, gi mwalo nya guvivbe mwendro nya gusengedzele.

⁹Ma lulamide ga vale va ma yingisago, ma pimega ga vale va gu ni guti.

¹⁰Hakhani sihevbudzo sangu, mu si gola ngudzu guvbindra parata, mu hakha guti guvbindra ndralama yi hutidwego;

¹¹kholu guti gu na ni lisima guvbindra sombo nya gukhedzige, gimwalo nya esi si golegago gi dzi kodzado gu dinganiswa mi guti.

¹²Eni, guti, nya gu vbanya gumogo ni wugengeli, nyi mana guti khu maalakanyo nya wugengeli,

¹³Uye a thavago PFHUMU Nungungulu, a gu nyenya silo nya guvivbe; nyi ngu nyenyana ni matshandza, gu dzi khusedza, dzindzila nya guwegele, ni magana nya gunyenyeze.

¹⁴Iso si lumbago eni, khu wusingalagadzi ni guti nya lisine; eni kheni gupimisa, nyi na ni tshivba.

¹⁵Vafumeli va gufuma khu tshivba yangu, ni manganagana ma gu leletela gululama.

¹⁶Kheni nyi fumisago vamwamangulu vatshavbo, vathangeli; ni valamuli vatshavbo va mafuni.

¹⁷Nyi ngu gola vale va nyi golago, avo va nyi vbwetago, va na nyi mana.

¹⁸Thomba ni wuzundzo somo avbo gwangu, thomba ni gululama si si vbeligo.

¹⁹Mihandro yangu yi na ni lisima guvbindra ndralama yi hutidwego, ni dzimbewu dzangu, dzi na ni lisima guvbindra parata yi hutidwego.

²⁰Nya gu gimbila khu ndzila nya gululame, vbakari nya wulamuli wu lulamidego.

²¹Nyi kodza gufumisa avo va nyi golago, nyi va ghanyisa khu thomba nya yingi.

²² PFHUMU Nungungulu a nyi giride gukhugela guhegulani na si gu vangi gimbe gilo, nyi khala na nyiri matiwula nya thumo waye watshavbo.

²³A nyi emiside gukhugela gupindrugani, na gu si vangwi litigo.

²⁴Gu si gu vangwi linene, na gu si gu manegi ni sifefe nya mati, eni nyi di velegidwe.

²⁵Na gu si gu wumbwi sigomo, ni sigomwana si si gu manegi, eni nyi di velegidwe gale.

²⁶PFHUMU Nungungulu na si gu vangi litigo, ni magabi, na si gu vegedzeli siseketelo nya mafu.

²⁷Nyi di romo, gikhati Uye a nga phela gu gira damboni gu randredwa khu ndrengelenge nya mati.

²⁸Nyi diromo, gikhati a nga ladza mapfhi damboni, gikhati a nga bugisa sifefe nya ndrengelenge.

²⁹Gikhati a nga gira mivbingano nya linene gasi mati ma si ndragi sigomo; gikhati a nga tsitsa giseketelo nya mafu,

³⁰nyi di khade bambe gwaye, nyi fanana ni muthu a wutigo thumo, khu litshigu ni litshigu nyi gu mu tsakisa, gikhati gyatshavbo nyi di gu tsaka mbeli gwaye.

³¹Nyi di gu tsaka tigoni a gu giridego, nyi tsakiswa khu vathu vaye.

³²Vanavangu, olu, nyi yingiseni, mupwa esi: Kholu va na bani va kategide vale va na gulandrisago dzindzila dzangu.

³³Yingisani sihevbudzo sangu, mu na khala vathu nya guti. Kha nyi vbweti mu hambane naso.

³⁴Kategile wule a nyi yingisago, a khedzago ndrangani gwangu matshigu yatshavbo, a lirelago mihasimoni nya mwanya wangu.

³⁵Kholu uye a na nyi manago, a na mana guvbanya, a na mana makategwa ga PFHUMU Nungungulu.

³⁶Aholu uye a nyi ghohelago, a gu songa hefemulo waye, ni vatshavbo va nyi nyenyago, va gu gola lufu.