Read gitonga Mavingu 9 Bible Online

Mavingu 9 - gitonga bible

Mavingu 9

¹Guti gu dzi vbahede nyumba yaye, gu tsitside madingo yaye nya livbandre na mavili.

²Gu songide sirengo saye, gu dongisela wadwa, gu ladzide meza yaye.

³Gu rumede sithumi saye nya vanyamayi, gu ya ramba vathu gukhugela malangani nya gukhugege nya lidhoropani, si huwelela, khiso:

⁴“Enu mwatshavbo nyambana mapimo, deluni gwangu!” Ga avo va gumwalo mapimo, khiso:

⁵“Deluni mu ta hodza guhodza gwangu ni gu selani wadwa nyi dongisedego.

⁶Hambanani ni va nya guvivbedwa khu monyo, mu na vbanya, gimbilani khu ndzila nya mapimo.”

⁷Uye a kawukago muhembululi, a gu dzi vbwetela givalo, ni wule a kawukago gipumbu, a gu dzi vangela libawa.

⁸U nga kawuki muhembululi, kholu a nga gu zondra, kawuka muthu nya mapimo, kholu a na gu gola.

⁹Laya muthu a gu ni guti, kholu a na engedzela guti ngudzu, hevbudza muthu nya gululame, kholu a na engedzela guti gwaye.

¹⁰ Litshina nya guti, khu gu thava PFHUMU Nungungulu, wugengeli ni mapimo khu guti uye a Agidego!

¹¹Kholu, khu kotani ya eni, guti, matshigu yago ma ngu engedzedwa, ni myaga nya guvbanye gwago, yi na engedzedwa.

¹²Wa gu bani uri ni guti, u na phaswa khugo, aholu wa gu bani uri muhembululi, u na tshaniseka.

¹³Nyamayi nya gipumbu, khwa gu gira ligwaha, lipemi, ni gu mbati gilo.

¹⁴Uye a gu khala nyangwani nya nyumba yaye, a khala vbagikhalotunu, malangani nya sigomo ya dhoropani,

¹⁵a fela gu rana avo va vbindrago khu ndzila, na va thonona umo va hongolago, khuye:

¹⁶“Uye a gu gipumbu a nate eno!” Ni ga vale va gu mwalo mapimo, khuye:

¹⁷“Mati nya gubidwe, ma gu lombela ngudzu, ni guhodza gu hodzwago gusihalani, gwa gu tshamba ngudzu.”

¹⁸Aholu uye kha dziti gukhuye ndrangani gwaye, lomo lufu, ni vale a va rambidego vomo phalani nya vafi.