Read gitonga Muhevbudzi 1 Bible Online

Muhevbudzi 1 - gitonga bible

Muhevbudzi 1

¹Magana ya Muhevbudzi, mwamana wa Dhavhidhe, mufumeli wa Jerusalema.

²Gu dzi pfhadza nya gu dzi pfhadze, a ngu ganela kharalo Muhevbudzi, gu dzi pfhadza nya gu dzi pfhadze! Satshavbo gu dzi pfhadza.

³Gasi giphaso muni muthu a gi manago khu thumo watshavbo a thumago vbavbatshi nya lidambo, na?

⁴Vambe vathu gu velegwa, vambe gufa, aholu mafu ma gu simama nga idzo ma guromo khidzo khu gupindruga ni gupindruga.

⁵Lidambo la gu khuga ni gu pfola li bwelo khavbo li wuya gambe wulanga waye, avbo li dugidego khavbo.

⁶Phuvbo ya gu furugedza yiya Marandzi, yi bwelo khavbo yi furugedza yiya Wuronga; yi enedza gwatshavbo khu gu dzundrulugela, yi simama ni thumo waye nya gudzundrulugele yi hongola ni gu wuya.

⁷Mitsongo yatshavbo ya gu vbaladza linene, aholu, linene kha li tali; ambari ulo mati ma vbohago mahegiso gwaye, mwedzi nya mitshongo wa gu simama gu ndrindra gikhati gyatshavbo.

⁸Satshavbo silo si ngu garadza, aholu mwalo a kodzago gu ninga tshamuselo. Maho kha ma kodwi khu gu wona, ni ndzeve niyo kha yi garali khu gu yingisa.

⁹Iso si nga bani si romo khu gale si na simama siri kharato; iso si nga bani si giridwe si na bwelo khavbo si girwa; gi mwalo gilo gi gu giphya mafuni.

¹⁰Ga gu ganedwa khu gilo nya gukari, khavo: “Wona, egi gilo giphya!” Malipha, igyo gi diri khu gale.

¹¹Iso si vbindridego mwalo a si alakanyago; niso si nga gutago kha si na dundrugwa khavo va natago khu hwane.

¹²Eni, Muhevbudzi, kha nga olu nyi fumidego Israyeli, dhoropani ga Jerusalema,

¹³nyi dzi garadzide khu monyo wangu watshavbo gu vbweta wugengeli nyi khedza silo satshavbo si dugelelago mafuni; Nungungulu rwegide vathu thumo wowu nya gulemele gasi va wu thuma.

¹⁴Nyi wonide gukheni satshavbo si girwago mafuni khu vathu, satshavbo gu dzi pfhadza, ni gu tutuma hwane nya phuvbo yi vbindrago.

¹⁵Gile gi wegedego gima kha gi lulamiswi, ni igyo gi gu mwalo kha gi sayedwi.

¹⁶ Nyi di alakanya khu monyoni gwangu, kheni: Nyi dzi girede wugengeli nya wukhongolo guvbindra vatshavbo va fumidego omu Jerusalema nyi si gu vbohi eni. Nyi hevbude ngudzu nyi mana mano ni wugengeli.

¹⁷Nyi dzi ningede khu monyo wangu gasi guti gwadi wugengeli, ni guti gambe lihure ni wupumbu. Nyi di wona gambe gukheni satshavbo sesi gu tutuma hwane nya phuvbo yi vbindrago.

¹⁸Kholu avbo wu etago wugengeli, gu tade sigaradzo, ni avbo gu etago mapimo nya guti, gutshaniseka gungi.