Read gitonga Muhevbudzi 5 Bible Online

Muhevbudzi 5 - gitonga bible

Muhevbudzi 5

¹Khedza ngondro wago umo wu gandrago wa gu bani u bela Nyumbani gwa Nungungulu. Hi dzimela gasi guya yingisa, esi si ngu phasa ngudzu guvbindra dzimhamba dza sipumbu, kholu sipumbu kha si dziti nya gukhiso sa gu gira silo nya guvivbe.

²U nga vbiredzeli gu tula likana lago, nyamba phela khu gu pimisa u tutumela gu ganela malito mbeli ga Nungungulu; kholu Uye womo vbatshani ndzadzini, uwe u womo vbavbatshi mafuni; khu guralo, magana yago ma na khale madugwana.

³Kha nga dzindroro dzitago khu mithumo ya yingi, magana nya wupumbu ma gu pwala khu gu ganela ngudzu.

⁴ Wa gu hunga gifungo ni Nungungulu, vbiredzela gu gi tadzisa, kholu Nungungulu kha tsakiswi khu vathu nya guvivbedwe khu myonyo. Khu guralo, tadzisa gisambanyo gyago.

⁵I tshukwana gumba dzi girela gifungo, guvbindra gu gira gifungo u si gi landrisi.

⁶U nga dzumeli likana lago li gu yisa gughohani, gambe u nga ganeli mbeli ga Girumwa gya Nungungulu khuwe nyi di gira khu guphazama; kholu Nungungulu a nga wugela magana yago, a ghohetela thumo u giridego khu mandza yago.

⁷Kha nga dzindroro nya dzingi dzi gumba phasa gilo, kharato nugo guganela nyamba khedza hwane. Khu guralo, uwe thava Nungungulu.

⁸Wa gu tshuka u wona tigoni na gu tshaniswa sisiwana ni gu hambaniswa nayo, u nga samali kholu uye a gu khongolo a na ni mumbe vbatshani gwaye a mu kalavelago a gu khongolo guvbindra uye, vbatshani ga avo va vavili, womo gambe uye a khusegidego ngudzu gu va vbindra a va kalavelago nuyeavo.

⁹Mafu ma gu phasa vathu vatshavbo, ni mufumeli nuye a gu phasega khu sa mahangeni.

¹⁰Muthu a golago dzitsapawu gima kha eneledwi khidzo, ni wule a golago dzithomba gima kha kodwi khu gughanya. Esi niso gu dzi pfhadza, kha si phasi gilo.

¹¹Avbo dzi engedzelanago dzithomba, va nya gu hodza navo va gu engedzelana. Sa gu mu phasa ginani muthu a si manago, vbavbandze nya gu si wone basi khu maho?

¹²Muthumegeli, gani a gu mana nya singi mwendro nya sidugwane, uye a gu lala ligovbe nya gutenge, aholu gukhura ga muthu nya gitetema kha gu mu ningi ligovbe.

¹³Mafuni momu nyi di wona gimbe gigaradzo nya guvbindre pimo, a gu egi: Muthu a vegedzelago thomba yi bwelo khavbo yi mu girela mhango.

¹⁴Thomba yeyi ya gu luza khu mhango nya gukari wugwewoni gwaye, ambari na velegide gyanana gya gu tshala nyambana gilo.

¹⁵Kha nga a dugidego khu ndrani ga mayi waye nyamba ambala gilo, kharato gambe a na bwelela nyambana gilo.

¹⁶Avbovbo wusiwana nya wukhongolo ngudzu ga muthu a bwelelago nga idzo a dzudego khidzo. Gasi gu dzi garadza gwaye gu mu phaside ginani?

¹⁷A na vbedza matshigu yaye mugidemani, a khala khu gu vbisega a tshaniseka ni gulila!

¹⁸Nyi wonide gambe gukheni; gwadi gu muthu a hodza, a sela, a tsaka a khalega gwadi khu thumo waye a giridego mafuni momu matshiguni nya guvbanye gwaye a ningidwego khu Nungungulu. Kholu, khiso esi a ningidwego iso.

¹⁹Muthu a gu ningwa khu Nungungulu sigiro nya singi, thomba ni tshivba nya gu si hodze, a bonga iso a ningidwego, a tsaka khu handro nya thumo waye, egi giningwa gya Nungungulu.

²⁰Muthu yoyo kha na alakanyela ngudzu gukhuye matshigu yaye nya guvbanye mafuni momu ma rode, kholu Nungungulu a ngu vega monyoni gwaye gutsaka gu si vbeligo.