Read gitonga Muhevbudzi 9 Bible Online

Muhevbudzi 9 - gitonga bible

Muhevbudzi 9

¹Satshavbo nyi di pimisa monyoni gwangu, nyi wona gukheni: Avo va lulamidego, ni vale va gengedego, vatshavbo mithumo yawe yomo mandzani gwa Nungungulu, ni gu gambe vathu kha va siti iso si tago khu mbeli gwawe; gani lihaladzo mwendro livengo. Satshavbo si ngu girega.

²Vathu vatshavbo va ngu dugedwa khiso khu ndzila ya mweyo, ga vale va lulamidego ni vale nyamba lulama, vale va agidego ni avo nyamba dzi agisa, avo va ningelago miphaso ni avo va si ningeligo. Muthu nya wadi a gu fanana ni gighohi, uye nya gumba sambanya kha nga wule a sambanyago.

³Ogu khu guvivba gu guromo vbakari nya silo si girwago mafuni momu. Gu vatshavbo va mana mahegiso nya idzosaye. Khu guralo, myonyo ya vathu yi tade khu guvivba, gukhwatshi va di handruga guvbanyani gwawe; khu guhegisa va guya phalani nya vafi.

⁴Aholu wule a ngarigu vbakari ga va nya guvbanya, a na ni gutumba; kholu i tshukwana yimbwa yi vbanyago guvbindra nghala yi fudego.

⁵Avo va vbanyago va ngu dziti gukhavo va nafa, aholu vale va fudego kha va pimi gambe gilo, ambari gu mana tshatshazelo, kholu kha va dundrugi gambe.

⁶Lihaladzo, livengo ni lidiwo lawe, satshavbo si fuvide. Kha va nga gu sayedwa gambe gilo khu iso si girwago mafuni momu.

⁷Olu indra uya dzi hodzela khu gutsaka u sela vbinyu yago monyo wago na wu salalegide; kholu, PFHUMU Nungungulu a ngu tsaka khu mithumo yago.

⁸Gikhati gyatshavbo ambala dzingandzu nya guage, u tola mafura nya gunungele hungoni gwago.

⁹Vbanya khu gutsaka ni mwangadzi wago u mu haladzago, matshigu yatshavbo nya gurole u ningidwego khu Nungungulu mafuni momu.

¹⁰Satshavbo u si kodzago gu si thuma khu mandza yago, si thume khidzo u dzi kodzago khidzo, kholu phalani nya vafi u hongolago umo, gu mwalo thumo, makungo, mapimo, ambari wugengeli nya gukari.

¹¹Nyi di bwelo khavbo nyi wona gambe mafuni momu, kheni: Mapalisanatunu, khandri vale va gu na ni mazambo va pilago pfhuka, khandri va nya tshivba va palago nyimbitunu, khandri vale nya gugengele va manago guhodza, khandri va nya guti va manago thomba, khandri vale va hevbudego va zundzwago, satshavbo si na ni gikhati si dugelelago khigyo.

¹²Muthu nuye kha giti gikhati gyaye nya gufe; a gu fanana ni ndzandzi yi modwago khu ligoga, ni ginyoni gi modwago khu naphwi, sanana nya vathu niso kharato, si na dugedwa khu mhango gikhati gyawe, va thegedwa khiyo khu githugedza.

¹³Mafuni momu, nyi wonide gambe wumbe wugengeli nya gusamadzise.

¹⁴Gu diri ni gidhoropana nya gukari gi nga bani giri mwalo vathu nya vangi. Tshigu mwedo gu dita mufumeli nya tshivba, a ta gi dhumela a gi randrela a vbaha ndzari nya libhiyo khu maphuvbo yatshavbo.

¹⁵Aholu dhoropani momo gu diromo mwama moyo nya gugengele nya gisiwana a nga tshudzisago lidhoropa lile khu wugengeli waye; aholu mwalo ni muthu moyo a nga alakanya mwama wule nya gisiwana.

¹⁶Khu guralo, eni nyi di, kheni: I tshukwana gu mana guti guvbindra tshivba, ambari ulo wugengeli nya gisiwana wu ngamba thedwa kota, ni magana yaye ma ngamba yingiswa.

¹⁷Magana nya gurule ya vathu nya guti ma gu yingiswa ngudzu guvbindra gulaledza ga muthangeli vbakari ga vathu nya sipumbu.

¹⁸Guti gu na ni giphaso guvbindra matshari nya nyimbi, aholu gighohi gimwegyo basi gi ngu kodza gu ghohetela silo nya singi nya sadi.