Read gitonga Gizimba 3 Bible Online

Gizimba 3 - gitonga bible

Gizimba 3

¹Mwangadzi —Wutshigu watshavbo na nyi lade dawuni gwangu, nyi di vbweta wule a godwago khu monyo wangu, nyi mu vbwetide, aholu kha nya mu mana.

²Olu nyi na wuga nyi dzundrulugela ni lidhoropa, nyi gimbila mudzindzilani ni malangani nya mitshangano; nyi vbweta wule a godwago khu hefemulo wangu; Nyi mu vbwetide, aholu kha nya mu mana.

³Nyi di manwa khu dzighadhi, dzi ghadhago lidhoropa. Nyi va wudzisa, kheni: “Kha mwa gi wonani gigodwa nya hefemulo wangu, gani?”

⁴Na nyi ngari gu hambana navo, nyi di dzegela gu mana wule a godwago khu hefemulo wangu. Nyi di mu wugarela nyamba mu diga gambe, kala nyi bela naye nyumbani ga mayi wangu makhuvini ya wule a nga nyi velega.

⁵Mwama —Nyi ngu sambanya gwanu enu vanyamahegyane va Jerusalema, khu dzitshesi ni dzimbavala dza khabini kheni, mu nga wusini gigodwa gyangu, uye mune na si gu vbweti gu wuga.

⁶Wuyelelo —Gasi ginani egi gi tago khu giwulani nya nga madingo nya wutshi, nya nga gunungela nya mafura ni libani, nya gufanane ni mafura yatshavbo ya varengisi.

⁷Eli khu litsira la Solomoni li randredwego khu livbandre na limwedo magumi dzindrena dzi dugago vbakari nya dzindrena dza tigoni gwatshavbo ga Israyeli.

⁸Vatshavbo va ngu kodza gu thumisa matshari, dzindrena nya nyimbi; moyo ni moyo nari ni litshari giwununi gwaye, gasi a dzi vhikela khilo vbawutshigutunu.

⁹Mufumeli Solomoni a di dzi girela matsira khu misimbo ya Libhanoni.

¹⁰A di gira madingo khu parata, gikhighetelo a gira khu ndralama, gikhalo a di gi sona khu giwunguwungu, ndrani gulugedwa khu dzikhindra nya wumburi, gu yeyedza lihaladzo la vanyamahegyane va Jerusalema.

¹¹Enu vanyamahegyane va Siyoni, dugani! Deluni mu ta wona mufumeli Solomoni! Uye ambade gihugu nya wufumu, gihugu nya wufumu a ambagisidwego khu mayi waye khu litshigu nya dzegano waye, litshigu monyo waye wu tsakidego ngudzu.