Read gitonga Gizimba 5 Bible Online

Gizimba 5 - gitonga bible

Gizimba 5

¹Mwama —Nyi bede thembweni gwangu, ndriyangu ni khundzwa yangu, nyi havela misimbo nya mafura yangu nya gunungele, nyi hodza gipapu gyangu nya wulombe, nyi sela vbinyu gumogo ni mahwe yangu. Dzipari dzangu, selani mu kodwa enu dzipari dzangu.

²Nyamayana —Eni nyi di gu lala, aholu monyo wangu wu di wona. Nyi dipwa gukhokhota ga lito la gigodwa gyangu, khuye: Nyi tulele lidimba, ndriyangu, gigodwa gyangu, gituvana gyangu, u vbeledego guaga, kholu hungo wangu wu tade khu thondrwane, ni ndzudzu wangu wu naganisidwe khu madododo nya wutshigu

³Mwangadzi —Nyi tshude guambala gwangu; nyi bwelo khavbo nyi gu ambala gambe, gani? Nyi hambide migondro, nyi na bwelo nyi mi thela gambe ndzilo, gani?

⁴Gigodwa gyangu gi di bedza libogo khu vbagihogoni, monyo wangu wu di tala khu lihaladzo laye.

⁵Nyi wugide gasi guya tulela gigodwa gyangu, khu mandzani gwangu gu di dota mafura nya gunungele, ni dzinyala dzangu dzi di tala khu mafura nya lisima, ma nga bani ma goga vbagikwinyarotunu nya lidimba.

⁶Nyi di tulela gigodwa gyangu, aholu uye a di bani na khugide a hongola; hefemulo wangu wu di nyunguluga gikhati nyi nga mupwa na gu ganela, nyi di mu vbweta aholu kha nya mu mana; nyi mu rana uye a si nyi hakhi gilo.

⁷Nyi di tshangana ni vaghadhi, va nga bani va gu ghadha dhoropani, va di nyi veta va nyi bayisa; vaghadhi nya mabhiyo va di nyi tshulela gifenengelo.

⁸Nyi ngu mi lombani enu sagadzyana sa Jerusalema, mwa gu manani gigodwa gyangu mu na gi embela ginani? Gi embeleni khenu nyi ngu vbisega khu lihaladzo.

⁹Wuyelelo —Gu hambana muni gu manegago, ga gigodwa gyago, na? Uwe u gu mburi nya dzimburi, vbakari ga vanyamayi, na? Ginani a gu nagyo gigodwa gyago a vbindrago khigyo vakwawe, nya gukala u mu girela gilombo gegi?

¹⁰Mwangadzi —Gigodwa gyangu gi khalegide bwelo khavbo mburi, a ngu hambana ni vambe nya likhumi magumi mazana.

¹¹Hungo waye wa gu fanana ni ndralama yi hutidwego, ndzudzu waye khwa matshimbo, wu sivbade nga mitenga nya mahigonganye.

¹²Maho yaye ma gu fanana ni ya matuva ma gu bani mari sifefeni nya mati na ma hambide khu mahwe na ma khade bambe nya tsongo.

¹³Khovbe yaye ya gu fanana ni lithembwe nya misimbo nya mafura nya gunungele sigundru saye sa gu fanana ni senge si dotago mafura nya tengo;

¹⁴Mandza yaye ma gu fanana ni dziphera nya ndralama, dzi mburisedwego khu siwindri nya gukhedzige, girumbu gyaye gya gu fanana ni magwaha nya ndzofu ma namegedzedwego siwindri nya gukhedzige nya Safira.

¹⁵Mawundru yaye madingo nya siwindri nya guage na si tshomegedzedwe vbasirandrotunu nya ndralama yi hutidwego yi fanana ni gigomo gya Libhanoni nya wumburi nya gufanane ni sedhari.

¹⁶Khanani gwaye gwa gulombela ngudzu; giemo gyaye gyatshavbo khya gu golega. Khidzo a khadego khidzo gigodwa gyangu eno mwama wangu, enu va nyamahegyanenu va Jerusalema.