Read gitonga Gizimba 6 Bible Online

Gizimba 6 - gitonga bible

Gizimba 6

¹Wuyelelo —Gasi gi hongode hayi gigodwa gyago, uwe u gu mburi vbakari ga vanyamayi? Gasi dugede hayi mwama wago nya gu mu gole, hi kodza gu gu phasa gu mu vbweta.

²Mwangadzi —Gigodwa gyangu gi relede thembweni gwaye, umo gu yadwego misimbo nya gunungele, aya hodzisa umo tshambi waye, ni gu havela senge.

³Eni nyi wa gigodwa gyangu, gigodwa gyangu gya gu lumba eni. Uye a gu risa tshambi vbakari nya senge.

⁴Mwama —Uwe u mburide gigodwa gyangu, ni pari yangu, wa gu fanana ni lidhoropa la Tiriza, u khalegide nga lidhoropa la Jerusalema, u thisidego nga gikwata gi hongolago nyimbitunu ni dzingavbya.

⁵Ndreyisa maho yago avbo gwangu, kholu ma ngu nyi vbedza tshivba. Ndzudzu wago wa gu fanana ni tshambi nya dziphongo dzi relelago khu gigomoni gya Gileyadhi.

⁶Magwaha yago ma gu fanana ni tshambi nya dzinvuta dzi dugago khu guhambatunu, nvuta ni nvuta na yi velegide mavbaha, yi mwalo ni mweyo nya idzo yi gu mwalo gyanana.

⁷Sigundru saye khu ndrani nya gikhongelo gyaye, sa gu fanana ni lipapagayi li pandridwego.

⁸Ambari gwa gu manega livbandre na limwedo magumi dzipfhumugadzi, ni livbandre na mararu magumi sibhayi, ni vanyamahegyane nya makendzi nyamba saywa tengo;

⁹aholu uye basi gituvana gyangu, nyamayi nya mapimo a vbeledego! Khuye basi nya gigodwa ndrani ga mayi waye, a gu wonwa khu dzimbiri dzikwawe khavo kategide, dzipfhumugadzi ni sibhayi va gu mu rungudza.

¹⁰Wuyelelo —Khu mani oyu a wonegago nga Wuronga, nya wumburi nga ngima, a ngangamela nga lidambo nya guthise nga gikwata gi hongolago gudwanatunu ni dzingavbya?

¹¹Mwangadzi —Nyi relede thembweni nya dzindzawa, guya wona gunyuga nya dzimbewu dza kovani ni gu wona gukheni lithembwe li ngu dandra gani ni maromana gu mwendro ma ngu thela wenge.

¹²Nyi si dziti gukheni nyi khadziside gurini vbakari nya dzikareta dza vathu vangu nya guzundzege!

¹³Wuyelelo —Uwe Musulama, wuya, wuya, wuya, wuya, gasi hi ta dzi tsakisa. Mwangadzi —Khu ginani mu khedziselago Musulami, a gu bani na davata vbakari nya maghovelo ya mavili?