Read gitonga Isaya 11 Bible Online

Isaya 11 - gitonga bible

Isaya 11

¹ Khu tshinani ga Jese, gu na thunga litamo, khu mikhambani gwaye, gu na buga pfhundre.

²Liphuvbo la PFHUMU Nungungulu, li na mbaka vbatshani gwaye, a gu Liphuvbo nya guti ni mapimo, Liphuvbo nya wusingalagadzi ni tshivba, Liphuvbo nya wugengeli ni githawo ga PFHUMU Nungungulu.

³A na nengela khu guthava PFHUMU Nungungulu; kha na lamula gukhedza khu khovbe nya muthu, mwendro gu kona gukhedza khu gu pwa ndzeve;

⁴ aholu, a na lamula sisiwana khu nayo, a pila mahungu ya va nya gu dzi nogisa va tigoni khu gululama; a na veta litigo khu lipitso nya magana yaye, khu furugedzo wa kanani gwaye, a na songa va nya guvivba.

⁵ Gululama gu na bani guri gutiya gwaye, gutumbega gu na bani guri libhandri la giwununi gwaye.

⁶Lisolwa li na vbanya dangamwedo ni nvuta, ni likhamba, li na lala dangamwedo ni phongo; gimombyana, ni ginghalana, ni ginvutana, si na gimbila gumogo, si na ghudwa khu gyanana nya gidugwana.

⁷Mombe nya ngadzi yi na hava mwasi gumogo ni gikankanka, sanana sawe, si na lala dangamwedo; nghala yi na hodza mwasi gu fanana ni mombe.

⁸Gyanana gya beleni, gi na haganela phalani nya nvuwumati, ni gyanana gi ngari gu lumudwago, gi na bedza mandza phalani nya mamba.

⁹ Malangani yatshavbo ya gigomoni gwangu nya gukatege, kha gu na manega guvivba mwendro gusongana, kholu litigo latshavbo li na tala khu guti gwa PFHUMU Nungungulu, kha nga mati ma tadzago yiphwa.[19]

¹⁰ Ga litshigu lolo, va nya mayigo va na tutumela ga khamba wa Jese wu vegidwego kha nga ngavbya nya mayigo yatshavbo; ni wulanga a khalago avbo wu na zundzega.

¹¹Ga litshigu lolo, Pfhumu a na simama gu khusedza mandza yaye, gasi gu dzegisa vathu vaye, vale va tshadego tigoni ga Asiriya, Egipito, Patrosi, Etiyopiya, Elamo, Sinari, Hamati gumogo ni sidwa sa phwani.

¹²A na khusedza ngavbya vbakari nya mayigo, a tombanisa avo va nga vbagedwago va Israyeli, a wuyisela avo va nga phalalegago va Judha, gukhugela dzikhonani dzatshavbo dza dzina nya litigo.

¹³Khu guralo, a na vbedza lidiwo la Efrayimi, valala va Judha, va na mbembiswa; Efrayimi kha na girela gambe lidiwo Judha, ambari Judha nuye, kha na tshanisa Efrayimi.

¹⁴Mayigo ya mavili ma na wugela Vafilisitiya va Muhwadambo; ma na hongola gumogo ma ya phanga vathu va Khugadambo; ma na dwanisa Vaedhomi ni Vamowabhi, sanana sa Amoni si na khala sithumi sawe.

¹⁵ PFHUMU Nungungulu a na bangisa nondrwa nya yiphwa ya Egipito, a na khusedza mandza yaye a dwanisa tsongo wa Ewufrate, khu furugedzo waye nya tshivba, wu na kabaniswa khu livbandre na sivili sitsongwana si na tsemakanywago khu migondro.

¹⁶ Gu na manega ndzila nya yikhongolo ya vathu vaye va tshadego, vale va vbulugidego ga Asiriya, kha nga idzo gu giregidego khidzo ga va na Israyeli gudugani gwawe khu tigoni ga Egipito.