Read gitonga Isaya 14 Bible Online

Isaya 14 - gitonga bible

Isaya 14

¹Kholu PFHUMU Nungungulu a na pwela gisiro nyumba ya Jakobe, a dzi hathela va na Israyeli, va ta vbaha tigoni gwawe nya mavelego, va nya mayigo va nata tshangana gumogo navo, va dzi patanisa ga lihundzu la Jakobe.

²Va nya mayigo va na va dzega va va yisa malangani gwawe, aholu vathu vovo nya vama ni vanyamayi, va na fumedwa khu nyumba ya Israyeli, tigoni ga PFHUMU Nungungulu. Va gira dzikhumbi vale va nga girwago khavo dzikhumbi, bwelo khavbo va tshanisa avo va nga tshaniswago khavo.

³Litshigu PFHUMU Nungungulu a na gu bani a mi ningide guhefemula ga mithumo yanu yatshavbo, ga tshanisa yatshavbo, ni ga wugumbi watshavbo va mi giredego,

⁴mu na emba ndzimo yeyi nya gutsorodzele mufumeli wa Bhabhiloni, khenu: Mutshanisi thegede hayi! Ni dzihanyi dzaye dzi vbede kharini!

⁵PFHUMU Nungungulu fanyeledzede ndronga ya va nya guvivbedwa khu monyo, ni ndronga ya vakhozisi.

⁶Yile yi nga bani yi veta vathu khu dzihanyi, a va thela dzimbanga nyamba vbola, a fumela mayigo khu gigaha, a va tshanisa nyamba himbedzedwa khu muthu.

⁷Olu litigo latshavbo lomo gurulani! Va gu womba mikulungwane va embelela khu gutsaka.

⁸Ambari ni misimbo nya mindziri yi ngu tsaka, ni misena ya Libhanoni yi ngu samala, khiyo: Gukhugela avbo u thegidego, mwalo a tago a ta hi koka.

⁹Lithowo li dzi emisede guta gu hakha, gasi li duga li ta gu hakha avbo u natago, khu kotani gwago ilo li ngu wusa vatshavbo va fudego ni vathangeli vatshavbo va mafuni, vafumeli vatshavbo va mafuni, va na khuswa khu vbasikhalotunu gwawe nya wufumu.

¹⁰Vatshavbo va na gu embela, khavo: Gasi uwe nuwe u dwade kha nga ethu, gani? Uwe nuwe u ngu fanana ni ethu, gani?

¹¹Matshandza yago ma rinyidwe phalani, ma patwa ni gudzuma nya dzimbila dzago, lidawu lago khu guhina, siwungu i vholo wago.

¹² Uwe u gu thandra nya gugye, nyamahegyane nya Wuronga, u thegide kharini khu ndzadzini! Uwe u thesidego mayigo nya mangi, u thegide kharini vbavbatshi!

¹³Kholu u di gu ganela khu monyoni gwago, khuwe: Nyi na khugega nyiya kala ndzadzini, gikhalo gyangu nya wufumu nyi na gi khusedza vbatshani nya dzinyeledzi dza Nungungulu, nyi na khala gigomoni nya tshangano, khu phuvbo ga Wuronga.

¹⁴Nyi na khugega nyi vbindra ni mapfhi, nyi fanana ni oyu a Khusegidego Ngudzu.

¹⁵ Aholu, u na rinywa thowoni nya vafi, phalani nya guete ngudzu.

¹⁶Avo va na gu wonago va na samala, khavo: Khandruye oyu a nga bani a ndrendremedzisa mafu, a kutsunga ni mifumo, gani?

¹⁷A nga bani a gira litigo li khala giwula, madhoropa ma khala marumbi, a nga bani a si tshuli dzikhumbi dzaye dzi bwelela magaya gwawe, gani?

¹⁸Vafumeli vatshavbo nya mayigo, va dzingidwe khu wuzundzo, moyo ni moyo thowoni gwaye.

¹⁹Aholu uwe wa gu dzudzugwa hwindzo ni lithowo lago, u fanana ni litamo nyamba phasa gilo, girumbi gyago gi na rinywa phalani nya siwindri, gi fenengedzwa khu sirumbi sa avo va nga songwa khu matshari, avo sirumbi sawe si relelago phalani, si pfareledwa khu siwindri.

²⁰Khu na dzingwa navo, kholu u sasede litigo lawe u songa vathu vawe. Livelego la va nya guvivba, gima kha li na alakanywa gambe.

²¹Lulamisani wulanga nya gusongele avbo sanana sawe, si livba nandru nya sighoho sa vavelegi wawe, gasi va si wugi va fuma litigo va tadza litigo khu madhoropa yawe.

²²Kholu, PFHUMU Nungungulu nya Tshivba Yatshavbo, a ngu ganela, khuye: “Nyi na va wugela, nyi fuvisa lina la Bhabhiloni, nyi songa mitshaledwa yaye, livelego laye ni situgulwana.” A ngu ganela PFHUMU Nungungulu.

²³ Nyi na li gira li khala wuvbahelo nya mapfhuguli. Li na vbindrugedza li khala wulanga nya mati nya guhine, nyi na li vbiyela khu piyelo nya gumbembise, a ngu ganela PFHUMU Nungungulu nya Tshivba Yatshavbo.

²⁴ PFHUMU Nungungulu nya Tshivba Yatshavbo, a di sambanya, khuye: Makungo yaya nyi ma pimisidego, ma na tadzisega, ni esi nyi hungidego, si na girega.

²⁵Nyi na fanyeledzela Vaasiriya, va guromo tigoni gwangu, nyi va gandredzela khu migondro musigomoni gwangu, gasi va rula kanga va hungidego Israyeli, ni gu rula rwalo magatani gwaye.

²⁶Aya khu makungo ma hungidwego tigoni gwatshavbo; egi khu gyandza gi thawuludzidwego ga mayigo yatshavbo.

²⁷ PFHUMU Nungungulu nya Tshivba Yatshavbo a si hungide; khu mani a na gu si ganedzago, na? Gyandza gyaye a gi thawuludzide; khu mani a na gi bweledzago hwane?

²⁸ Mwaga a fudego khuwo mufumeli Akazi, ma tivisidwe mahungu yaya, gupwani:

²⁹Enu Vafilisitiya mwatshavbo mu nga nengeli, kholu yi fanyeledzedwego ndronga yi nga bani yi mi tshanisa, kholu girumbi nya nyoga gya gu dusa wuhungu, ni umo nya litandra nya nyoga gu duga mwamilambo.

³⁰Matiwula nya sisiwana ma na khura, ni sisiwana si na lala ligovbe nya gutenge, gasi enu Vafilisitiya, nyi na mi songa khu ndzala, mitshaledwa yanu, yi na mbembiswa.

³¹ Womba huwa uwe nyangwa, lila uwe lidhoropa, ndrendremelani enu Vafilisitiya mwatshavbo; kholu, gu nguta wutshi khu Wuronga, ni moyo a nga khugi khu wulangani gwaye.

³²Va na ningwa phindrulo muni avo va rumedwago khu va nya mayigo vovo? PFHUMU Nungungulu khuye a vbahidego lidhoropa la Siyoni, gasi va mana wuthavelo vale va tshanisekago vbakari ga vathu vaye.