Read gitonga Isaya 15 Bible Online

Isaya 15 - gitonga bible

Isaya 15

¹Aya khu mahungu mayelano khu Mowabhi: Khu wutshigu wumowo basi, gu di pfhungumudwa lidhoropa la Ari wa Mowabhi; khu wutshigu wumowo basi, Kiri wa Mowabhi, di pfhungumudwa gu khala giwula.

²Vavbanyi va Bhajiti Dhibhoni va gu gwela malangani nya miphaso ya musigomoni, vaya lila; Mowabhi a ngu lila khu kotani ya Nebhu ni Medhebha. Vatshavbo va vbalude ndzudzu ni guvila giledzo.

³Va di ambala myendra nya silendra va duga dzindzilani; ni vbatshani nya dzinyumba dzawe, ni mitendrelani gwawe vaya lila ni gu tsikwila,

⁴Va Hesibhoni ni Vaeleyali, va di gimbila na va gu huwata. Dzihuwa dzawe dzi di pwala kala tigoni ga Jaza; khu guralo, masotshwa ya Mowabhi ma ngu lila; ni mihefemulo yawe yi ngu ndrendremela khu ndrani gwawe.

⁵Monyo wangu wu ngu lila khu kotani ya Mowabhi; vathu vaye nya guthavisege, va thavede tigoni ga Zowari, gu fanana ni gimombyana nya myaga miraru; kholu va gu lila na va gu gwela khu gigomo gya Luwiti, va gimbila na gu womba huwa khu ndzila yiyago Horonayimi, na va guwomba dzihuwa nya wuvi.

⁶Kholu mati ya Ninirimi ma vbwide, wuhaviseloni gu bangide, guvbela mwasi, gu mwalo gambe mitongwe.

⁷Kholu thomba va yi manidego ni gu yi vegedzela, va ngu yi rwala avo vamune kamwe va tsemakanya gitsongwana nya Siphuthu;

⁸kholu huwa yawe yi pwade kala ni mivbinganoni nya litigo la Mowabhi; lito nya gulile gwawe, li pwade kala Egilayimi ni Bheheri-Elimi.

⁹Kholu mati nya tsongo wa Dhimoni ma tade khu novba; aholu nyi na engedzela gambe tigoni ga Dhimoni, dzinghala dzi na vbadzulelago vale va nga vbulugago va na Mowabhi gumogo ni mitshaledwa ya tigoni.