Read gitonga Isaya 21 Bible Online

Isaya 21 - gitonga bible

Isaya 21

¹Aya khu mahungu nya giwula gya vbafuvbi ni yiphwa: Kholu, kha nga phuvbo nya gingulu ni gipupwane sitago khu Marandzi, si vbiyelago satshavbo, musaseli a nata khu giwulani, litigo nya guthise.

²Gu dita gwangu giwoniso nya gusamadzise ngudzu gi ta nyi embela, khigyo: “Mukanganyisi a ngu kanganyisa, ni muphangi a ngu phanga. Enu va na Elamo indrani mu ya dwana, enu Vamedhiyani, randrelani lidhoropa; dzihuwa dzawe dzatshavbo nyi ngu dzi vbedza.

³Khu guralo, nyi di pwa wuvi ngudzu, nyipwa guvbisa kha nga nyamayi a lumwago; nyi ngu tshaniseka avbo nyi padwago ni gu yingisa, nyi thusedzedwa, avbo nyi si kodzigo ni gu wona gilo.

⁴Monyo wangu wu ngu ghavata nyi ndrendremela khu guthava, wutshigu nyi nga wu vbwetago, wu vbindrugedzide avbo gwangu wu khala gilo nya guthise.

⁵Va ngu dongisela meza, va ladza malawu va hodza, va sela. Enu vathangeli nya dzinyimbi, khugani mu eme, dongiselani sitshangu.”

⁶Kholu Pfhumu a nyi embede kharati, khuye: “Indra, u ya vega muthu a ghadha, gasi a kodza gu tivisa satshavbo esi a na si wonago.

⁷A gu wona vathu na va khilede dzikavalu na vari vavili vavili, ni vama na va khilede siburwana mwendro dzingameriya, a na va khedze gwadi a dzi wonela gwadi.”

⁸Khavbo avbo, muwoneleli a di huwata kha nga nghala, khuye: “Pfhumu, nyi emide avba vbalangwetunu gwangu nya gukhedzisele mihani yatshavbo, nyi khala nyi khedzisela wutshigu watshavbo.

⁹ Olu, wonani! Gu nguta gikwata nya vama, vakhileli nya dzikavalu khu vavili vavili. Khavbo avbo, uye a di khusa lito a ganela, khuye: Thegide! Thegide Bhabhiloni; ni sifananiso saye satshavbo nya vanungungulu nya guvatwe, si pandregede si mbambamela mafuni.”

¹⁰Enu vathu vangu, mu vbudwego kha nga tirigu vbagithalatunu! Eni nyi ngu mi embela esi nyi embedwego khu PFHUMU Nungungulu nya Tshivba Yatshavbo, Nungungulu wa Israyeli.

¹¹Gitiviso ga litigo la Edhomi, khu Seyiri womo a nyi ranago, khuye: “Mukhedziseli, gikhati muni gi tshadego gasi guvbela wutshigu? Mukhedziseli, gasi gikhati muni gi tshadego?”

¹²Mukhedziseli a di phindrula, khuye: “Avbo gugyago, gwa guta gambe wutshigu; mwa guvbweta gu wudzisa nyaluphye, mu ngu dzi kodza guta muta wudzisa.”

¹³Egi khu gitiviso nya gusasedwe litigo la Arabhiya. Enu vaendri va tigoni ga Dhedhani, mu ya ghovago khabini ga Arabhiya,

¹⁴enu vavbanyi va Temani, khingani ni mati vale va thavidego, va tshanganiseni mu va ninga guhodza.

¹⁵Kholu avo va gu thava matshari, wulaho wu ghwimbidwego ni nyimbi nya guthise.

¹⁶Kholu Pfhumu a nyi embede, khuye: Ndrani nya mwaga moyo, wu fananago ni gikhati nya guningane ni egi muthumi a thodwego guthuma, satshavbo esi vavbanyi va Kedhari va dzi zundzago khiso, si na mwalalega.

¹⁷Mitshaledwa nya dzindrena dza Kedhari va kodzago gu dwana khu siholoma, va na vbungudwa ngudzu, kholu eni PFHUMU Nungungulu wa Israyeli, nyi ganede kharato.