Read gitonga Isaya 23 Bible Online

Isaya 23 - gitonga bible

Isaya 23

¹Gitiviso nya gusasedwe litigo la Tiro. Wombani dzihuwa enu mataro ya Tarisisi! Kholu Tiro mbembisidwe, avbo gu si wonegigo gambe ni nyumba mweyo, ambari ni lisiwo nya gutshegeme avbo dzingalava, mahungu yaya ma tivisidwe gukhugela tigoni ga Kipre.

²Degulani henu kape! Enu vavbanyi va bambe nya linene, enu mu ghanyiswago khu va nya wugwewo va tigoni ga Sidhoni, va tsemakanyago yiphwa.

³Dzimbuva dzawe dzi diri dzimbewu dzi nga bani dzi guta khu matini nya Makhongolo. Tirigu ya Siyori, ni dzimbewu dzi vbweridwego tsongoni wa Nilo, va giride khidzo libhindzu, va di dzi dzega va rengisela ga mayigo yatshavbo.

⁴Dzipwe dzitshoni uwe Sidhoni, kholu linene ni likhokhola nya linene, li ngu ganela, khilo: “Kha nya lumwa, nyi si gu velegi, nyi si gu velegi madzaha ambari gulaya dzimbiri.”[24]

⁵Avbo mahungu yaya ya Tiro ma na vbohago tigoni ga Egipito, vathu va na saniseka ngudzu khayo.

⁶Tshatugani mu wuya Tarisisi, wombani huwa, enu vavbanyi va bambe nya linene.

⁷Gasi khandrilo eli lidhoropa lanu nya gumbure, gale mu nga bani mu dzi khusedza khilo, umo migondro yanu yi nga mi yisa mayigoni ya hwindzo ngudzu gasi mu ya luvela umo?

⁸Gasi khu mani a hungidego makungo yaya nya guwugele Tiro, lidhoropa li nga bani li kavedzela sihugu nya wufumu, va nya wugwewo vaye va nga bani vari dzipfhumu, varengisi va nga bani vari vathu nya guthavisege va tigoni, gani?

⁹Khu PFHUMU Nungungulu nya Tshivba Yatshavbo a hungidego makungo nya guvbedze matshandza yatshavbo nya wumburi, ni gu vbwasamisa vale va gu ni ndruma tigoni.

¹⁰Tsemakanya litigo lago u fanana ni tsongo nya khongolo wa Nilo, uwe nyamahegyane wa Tarisisi, kholu mwalo a gu himbedzelago.

¹¹PFHUMU Nungungulu khusedzide gyandza gyaye vbatshani nya yiphwa, a gu ndrendremedzisa mifumo; Uye rumide gu pfhungumudwa makhokhola ya Khanani.

¹²Ganede, khuye: “Gima khu na ndragandraga gambe khu gutsaka uwe nyamahegyane wa Sidhoni; uwe likendzi u na tshaniswago, khuga u tshatugela tigoni ga Kipre, ambari iyoyo gambe khu na ngaya mana gurula.”

¹³Nga wonani litigo la Vakalidhiya, litigo li fuvisidwego li si manegi gambe. Vaasiriya, va li vbindrugedzide li khala wulanga nya sirengo sa giwulani, va vbahide makhokhola va bhiya khayo lidhoropa, aholu li mbembisidwe li khala marumbi.

¹⁴Wombani huwa enu mataro ya Tarisisi, kholu likhokhola mu nga bani mu li tumba li pfhungumudwe!

¹⁵Khu litshigu lolo, Tiro va na mu divala gipimo nya livbandre na mavili magumi (70) myaga, matshigu nya guvbanye ya mufumeli moyo; aholu guvbelani nya livbandre na mavili magumi myaga, Tiro a na dugeledwa khiso si embeledwago omu nya ndzimo ya gibhayi, gupwani:

¹⁶“Dzega gitendre u dzundrulugela lidhoropa uwe gibhayi wewe u divadwego; thula dzindzimo nya dzingi u emba gwadi, gasi va kodze gu gu dundruga.”[25]

¹⁷Guvbelani nya livbandre na mavili magumi (70) myaga, PFHUMU Nungungulu a na endrela Tiro, uye a na bweledzedwa tshatshazelo nya gu dzi nyenyezise gwaye, uye a nga gira wubhayi ni mifumo yatshavbo ya mafuni.

¹⁸ Aholu bhindzu nya wurengisi ni wubhayi waye, yi na phasedwa ga PFHUMU Nungungulu; gima kha yi na hengeledzedwa musisangalani ambari gu vegwa kha nga thomba. Yi na thumela gu hodzisa ni gu ambagisa nya dzadi vale va vbanyago mbeli ga PFHUMU Nungungulu.