Read gitonga Isaya 27 Bible Online

Isaya 27 - gitonga bible

Isaya 27

¹ Khu litshigu lolo, PFHUMU Nungungulu a na tsayisa khu litshari laye nya likhongolo, nya tshivba, levhiyatani, nyoga nya tshivba ni mazambo, nya gu dzi tshomborosele, ni gu songa mwamilambo, nyoga yi guromo linene.

²Khu litshigu lolo, gu na bani na guri ni lithembwe li tadego khu mihandro, va na embelela ga ilo, khavo:

³Eni PFHUMU Nungungulu kheni nyi li sayisago, nyi na li theledzela mati gikhati gyatshavbo, nyi li ghadha wutshigu ni mihani, gasi a si manegi muthu nya gute li ghohetela.

⁴Eni kha nyi na goroga, khu gu manega umomo miba ni sirangalabwa! Nyi na dwana naso nyi si hengeledzela dangamwedo, nyi si vbisa.

⁵Sa gumba dzina gu gira kharato, si nate sita lomba gurula ni Eni, si na pwanane ni Eni, nyi na vbanya naso khu gurula.

⁶Ma nguta matshigu, avbo Jakobe a na bugago mikhamba, Israyeli a nyuga a thela wenge, a tadza tigoni gwatshavbo khu mihandro.

⁷Ina kamwe PFHUMU Nungungulu vetide Israyeli, kha nga idzo a vetidego khidzo avo va nga mu vetago, gani? Mwendro uye a va songide kha nga idzo a songidego khidzo avo va mu songidego, gani?

⁸Kha va veta guvbindra pimo, a di va yisa wugumbini, a di va dzega khu phuvbo yaye nya tshivba nya gufanane ni gingulu nya gute khu Khagadambo.

⁹Khidzo kharato, nandru wa Jakobe wu na handzwa, owu a nga bani nari handro nya gutsetseledwe sighoho saye, si na dzi yeyedza khu gu va khungumulela siluvelo satshavbo, va pandrelela siwindri sakone si khala wuguvbi, va sigulela madingo ya nungungulu nya malipha Asitaroti ni sifananiso nya lidambo, si thega vbavbatshi.

¹⁰Kholu lidhoropa nya gutiye li khade marumbi, kha gu na khala gambe muthu umo, li vbindrugedzide li khala giwula, va na havisela umo dzimombe, dzi lala umo, dzi hodza matamo ma tshadego.

¹¹Avbo ma na bangago matamo yaye, va na ma fanyeledzela, va ta vanyamayi va ta vasa khayo nilo va ma gira dzikhuni, kholu vathu vava khandri vathu nya mapimo, khu guralo, mugiri wawe kha na va pwela gisiro, ni muvangi wawe kha na va tsetselela.

¹²Khu litshigu lolo, PFHUMU Nungungulu a na vbula mavbila yaye gukhugela tsongoni wa Ewufrate, kala tsongoni wa Egipito; Gasi enu va na Israyeli, mu na roledwa khu moyo ni moyo.

¹³Khilo litshigu lile gu na wombwago pundru nya wukhongolo, avo va nga bani va dzimede tigoni ga Asiriya, ni vale va nga bani va vbagedwe va yiswa tigoni ga Egipito, va na wuya va ta khozela PFHUMU Nungungulu, gigomoni nya gukatege gya Jerusalema.