Read gitonga Isaya 31 Bible Online

Isaya 31 - gitonga bible

Isaya 31

¹Libango ga avo vayago Egipito guya lomba giphaso, na va gu tumba dzikavalu; Va gu tumba dzikareta ni va vakhileli vakone, kholu avo vangi, na vari ni tshivba ngudzu, aholu va si theli kota khuye a Agidego wa Israyeli, ambari gu vbweta giphaso ga PFHUMU Nungungulu.

²Khu guralo, uye gengede, a na va rumela libango, a gu ganela magana yaye kha bweleli hwane. Uye a na wugela nyumba ya va nya guvivba, ni avo va phasedzelago vathu nya guvivbedwe khu monyo.

³ Kholu Vagipite vathu, khandri vanungungulu; dzikavalu dzawe nyama, khandri liphuvbo. Avbo PFHUMU Nungungulu a na khusedzago gyandza gyaye, vatshavbo va na thega mafuni, gumogo ni muphasedzeli ni uye a phasedzedwago, vatshavbo va na patwa va mbembiswa.

⁴Kholu PFHUMU Nungungulu a nyi embede kharati, khuye: Kha nga nghala ni ginghalana gyaye, si ngurangurago khu pfimba wawe, si si thavi ligwaha nya vahavisi khu gutala nya avo, yi si tutumi, yi thava khu kotani nya wungi nya avo, kharato nuye PFHUMU Nungungulu nya Tshivba Yatshavbo a na tshiga, gasi guta dwanela gigomo gya Siyoni ni gigomwana gyaye.

⁵Gufanana ni sinyoni si thawuludzago mambapi, si vbuvba, kharato nuye PFHUMU Nungungulu nya Tshivba Yatshavbo, a na tangadzisa lidhoropa la Jerusalema, a li tshudzisa ni gu li vbanyisa, a si li digi li mbembiswa.

⁶Khu guralo, olu enu va na Israyeli vbindrugedzani mu wuya gwaye enu mu nga bani mu hambanide naye.

⁷Kholu, khu litshigu lolo, muthu ni muthu a na dzudzuga sifananiso saye nya parata niso nya ndralama, esi mu si giridego khu mandza yanu, gasi gu dzi ghohisa khiso.

⁸Asiriya a na sasedwa khu matshari ma si gu ya muthu, a na mbembiswa khayo, a na tutuma a thava gusasedwa khu matshari. Madzaha yaye ma na padwa ma rwegwa mithumo nya gulemele.

⁹Likhokhola laye nya wuthavelo li na mbemba ni vathangeli vaye va na ndrendremela khu gu thava va tshiya ngavbya, khu PFHUMU Nungungulu a ganelago kharato. Nilo waye wu dzura gigomoni gya Siyoni, ni gikho gyaye, gi vasidwe dhoropani ga Jerusalema.