Read gitonga Isaya 34 Bible Online

Isaya 34 - gitonga bible

Isaya 34

¹Hidzimelani enu mayigo, gasi mu yingise, ni enu vathu yingisani! Mafu ni satshavbo si guromo umo si na yingise, litigo ni satshavbo si dugelago umo.

²Kholu PFHUMU Nungungulu a gorogede mayigo yatshavbo; ni likhulo laye lomo vbatshani nya mabutho yawe; uye a ma ningede ma songetedwa ni gu mbembisedwa muphelo.

³Vale va songetedwego va na dzudzugedwa vbavbandze, sirumbi si na nunga khu guhina; ni novba wawe wu na goga musigomoni.

⁴ Lidambo, ngima, dzinyeledzi ni mabuthu yatshavbo nya sivangwa sa ndzadzini, si na fuviswa, ni damboni gu na fumbwa gu fanana ni lidangalila; mabutho yaye yatshavbo ma na thegela khu vbatshani gu fanana ni nyahagane nya uvha mwendro nya ndzowe.

⁵Kholu litshari la Pfhumu Nungungulu li ngu wonega ndzadzini na li tade khu novba; wonani, li na thegela vbatshani ga Edhomi gasi guta mu lamula, vathu nyi va konidego, gasi gu va mbembisa.

⁶Litshari la PFHUMU Nungungulu li tade khu novba, li fenengedzidwe khu mafura ni novba nya dzinvuta ni vanyamabhongwe, ni mafura nya dzitshwa nya dzihamba. Kholu PFHUMU Nungungulu a ngu gira miphaso tigoni ga Bhozira, ni gusongetela nya gukhongolo tigoni ga Edhomi.

⁷Va na songwa gumogo ni dzimombe nya likhabi, marole ni dzikuzi; litigo lawe li na lewa khu novba ni kudzudzwane wawe wu na nyuga khu mafura.

⁸Kholu gu na bani guri litshigu nya guphodze ga PFHUMU Nungungulu, ni mwaga nya gubweledzele valala, khu kotani ya Siyoni.

⁹Mati nya mitsongo ya Edhomi, ma na vbindrugedza ma khala kha nga tita, mafu yakone ma vbindrugedza ma khala nguma, ni litigo lawe li na khondra li fanana ni mbato yi vbisidwego.

¹⁰ Wutshigu ni mihani wu na khondra nyamba tshimega; wutshi wu na tuviga wu gwela gikhati gyatshavbo; gu na vbindra situgulwana ni situgulwana na gu ngari marumbi, guvbindra mazanazana myaga, nyamba tsemakanya muthu umomo.

¹¹Khu kharato, gu na khala umo masekwa ni vanyamatate; mapfhuguli[30] ni vamahigonganye va na vbanya umo, uye a na ladza umo ngodzi nya pfilupfilu ni pimo nya gumbembise.

¹²Olu kha gu na manega gambe vathu nya guthavisege tigoni mule, gasi gu phariswa ndronga nya wufumeli; ni dzindruna dzawe dzatshavbo, dzi na bani dzi si phasi gilo.

¹³Dzinyumbani gwawe nya wufumu gu na buga miba, ni makhokholani gwawe gu na buga sirangalabwa ni maheho; gu na khala gambe wuvbanyelo nya masolwa ni dzimbowa.

¹⁴Sirengo sa giwulani ni vanyadugwi, si na tshangana umo, vamangulu[31] nya likhabi va na tshangana gumogo ni vangana vawe; ni sikono nya gugimbile wutshigu,[32] si naya vbanya si hefemula umomo.

¹⁵Khumo gambe mule dzinyoga ni mapfhuguli si na vbahago umo sihaga sawe, si vega mandra, si fundramela, si pandra, si fundramela sifondro; khumo gambe makoti ma na tshanganelago, ma landrana umo mikhonge ni mimbaha.

¹⁶Vbwetani libhuku la PFHUMU Nungungulu mu li hevbule; ni gimwegyo nya silo soso kha gi na hamugega; wu mwalo patwa wu na hamugegago, kholu leletede khu likana laye, ni Liphuvbo laye kamwe li na si tshanganisa.

¹⁷ Kholu PFHUMU Nungungulu ningide giavelo ga gimwegyo ni gimwegyo nya iso, khu mandza yaye a va kabanisede litigo a li pima khu ngodzi. Iso si na li fumela khu mimelana ni melana kala gupindruga, yi vbanya umo.