Read gitonga Isaya 36 Bible Online

Isaya 36 - gitonga bible

Isaya 36

¹Khu mwaga nya likhumi na mina nya gufume ga mufumeli Ezekhiya, Senakeribhi, mufumeli wa Asiriya, a di dhumela madhoropa nya makhokhola ya na Judha, a ma wandra.

²Mufumeli wa Asiriya, a di rumela Rabhisaki, ndruna yaye, nari khu tigoni ga Lakisi, guta Jerusalema, ga mufumeli Ezekhiya, nari ni gikwata nya gikhongolo nya masotshwa; a ta ghova bambe ni sele nya lidhamu nya gulaphe ngudzu, vbafuvbi ni ndzila nya Lithembwe la Muhandzi.

³Khavbo avbo, Eliyakimi, mwamana wa Hilikiya, musayisi nya nyumba nya wufumu, ni mulovi Sebina, ni Jowa, mwamana wa Asafi, mulovi nya matimo.

⁴Rabhisaki a di va embela, khuye: Indrani mu ya embela Ezekhiya, khenu: Mufumeli nya khongolo, mufumeli wa Asiriya, a ngu ganela kharati, khuye: “Gasi gutumba gwago wa gu tumba mani?”

⁵Uwe wari khuwe u na ni mano nya gudwane nyimbi, nari gu magana yago khya wupemi. Gasi uwe wa gutumba mani nya gukala u vbweta gu dwana ni eni?

⁶ Wa gu tumba Egipito, a gu tshava yi fanyeledzedwego, yi payago gyandza gya oyu a yi khighelago! Kharato nuye Faro, mufumeli wa Egipito, ga vatshavbo vale va mu tumbago.

⁷Aholu, wa gu nyi embela, khuwe: Ha gu tumba PFHUMU Nungungulu wathu, eni nyi ngu mi wudzisa kheni, khandri uye Nungungulu yoyu malangani yaye nya guage ni siluvelo saye si nga dusedwa khu Ezekhiya, a ruma vathu va Judha ni Jerusalema gukhuye va gire basi milombelo vbagiluvelotunu gya Jerusalema, gani?

⁸Ina ka, pwanana ni mune wangu, mufumeli wa Asiriya: Nyi na gu ninga magumavili mazana (2.000) dzikavalu, wa gu wona gukhuwe u na ni vathu nya guyele gu dzi khilela.

⁹Mu na dzi kodza kharini gu tutumisa ambari ni ndruna mweyo basi vbakari nya dzindruna dzidugwana dza mune wangu, olu mu tumbago gu ningwa dzikareta ni vakhileli nya dzikavalu khu Egipito?

¹⁰Gu diga isoso, ina wa gu alakanya gukhuwe nya gu tela guta sasela litigo leli, nyamba rumwa khu PFHUMU Nungungulu, gani? Kholu uye PFHUMU Nungungulu kamwe a nyi embede, khuye: Indra tigoni mule u ya sasela.

¹¹Khavbo avbo, Eliyakimi, Sebina ni Jowa, va di embela Rabhisaki, khavo: “Hi ngu gu lomba gukhethu u ganela ni sithumi sago khu Giharami, kholu khilo lidimi hi li yingisago. U nga ganeli khu Gihebheru, kholu kharato, vathu va fodego dzindzarini va na si yingisa.”

¹²Aholu Rabhisaki a di va hakha, khuye: “Mwa gu pimisa gukhenu mune wangu a di nyi ruma mahala guta tivisa mahungu yaya ga mune wanu ni avbo gwanu basi, gani? Gudiga ga vathu vava va khadego dzindzarini nya likhokhola, gasi mu fela gu hodza gumogo navo magimba yawe ni gu sela mirundro yawe, gani?”

¹³Khavbo avbo, Rabhisaki a di khuga a ema, a huwata khu lito nya likhongolo khu Gihebheru, khuye: “Yingisani magana ya mufumeli nya khongolo, mufumeli wa Asiriya.”

¹⁴Mufumeli a ngu ganela kharati, khuye: “Mu nga kanganyiswi khu Ezekhiya, kholu uye kha na mi vbulugisa!”

¹⁵Ne vbadugwana mu nga kutsedzedwi khu Ezekhiya gukhuye tumbani PFHUMU Nungungulu, a gu ganela, khuye: Khu lisine PFHUMU Nungungulu a na hi vbulugisa, ambari ni lidhoropa leli, kha li na ningedwa mandzani ga mufumeli wa Asiriya.

¹⁶Mu nga mu yingisi Ezekhiya; kholu mufumeli wa Asiriya a ngu ganela kharati, khuye: Dzi rudziseni mu ta eno gwangu, muthu ni muthu a na hodza mihandro yaye nya vhinya ni mihandro nya nguyu waye. Moyo ni moyo a na sela mati ya namboni gwaye;

¹⁷Kala nyi ta mi dzega nyi mi yisa ga litigo lile li fananago ni lanu, li gu litigo nya tirigu ni vbinyu nya gugire khiyo sibaba ni marembwe ma ningago mihandro nya yadi.

¹⁸Mu nga dzumeli gu kanganyiswa khu Ezekhiya, khuye: PFHUMU Nungungulu a na mi vbulugisa. Ina vanungungulu nya mayigo va di nga dzi kodza gu vbulugisa litigo lawe mandzani ga mufumeli wa Asiriya, gani?

¹⁹Vomo hayi vanungungulu va Hamati ni va Aripadhi? Vomo hayi vanungungulu va Sefarivhayimi? Ina avo, va di nga dzi kodza gu vbulugisa Samariya mandzani gwangu, gani?

²⁰Khu vamani vbakari ga vanungungulu vatshavbo nya mayigo yaya, va dzi kodzidego gu vbulugisa litigo lawe mandzani gwangu, gu kala uye PFHUMU Nungungulu a vbulugisa Jerusalema mandzani gwangu?

²¹Aholu, avo va di degula va si mu hakhi gilo, kholu mufumeli a di va leletede gukhuye: “Mu nga mu ningi phindrulo.”

²²Khavbo avbo, Eliyakimi, mwamana wa Hilikiya, musayisi wa nyumbani nya wufumu, ni mulovi Sebina, ni Jowa, mwamana wa Asafi, mulovi nya matimo, va di pferula dzingandzu dzawe, va ta ga Ezekhiya va ta mu tshamusela magana ya Rabhisaki.