Read gitonga Isaya 37 Bible Online

Isaya 37 - gitonga bible

Isaya 37

¹Avbo mufumeli Ezekhiya a ngapwago magana yaya, a di pferulela dzingandzu dzaye, a ambala dzisaku, aya bela Nyumbani ga PFHUMU Nungungulu.

²Khavbo avbo, mufumeli a di rumela Eliyakimi, muwoneleli wa nyumbani nya wufumu, ni Sebina, mulovi nya mahungu, ni madhota ya vaphasi nya mhamba, vatshavbo na va ambade dzisaku ni sikutitshalu, va hongola ga muprofeti Isaya, mwamana wa Amosi.

³Va ya mu embela, khavo: Ezekhiya a ngu ganela kharati, khuye: Litshigu la muhuno litshigu nya wuvi, nya tshanisa ni givalo; kholu ha gu fanana ni sanana si guromo vbafuvbi ni gu velegwa, aholu muvelegi wakone na vbede tshivba nya gu si velege.

⁴Mwendro saye PFHUMU Nungungulu wago, a ma pwide magana ya Rabhisaki, a rumedwego khu mune waye, mufumeli wa Asiriya, guta vala Nungungulu a vbanyago, a gu dzina saye PFHUMU Nungungulu wago, a na mu tsayisa khu magana a ma pwidego; khu guralo, olu lombelela ga Nungungulu wago khu mitshaledwa ya vathu vaye.

⁵Khavbo avbo, sithumi sa mufumeli Ezekhiya, si di hongola si ya tshangana ni muprofeti Isaya.

⁶Isaya a di va embela, khuye: “Embelani mune wanu, khenu: PFHUMU Nungungulu a ngu ganela kharati, khuye: U nga thedwi hwanga khu magana u ma pwidego, ayo ma residwego khu sithumi sa mufumeli wa Asiriya, a nyi vadego khayo.”

⁷Mufumeli wa Asiriya nyi na mu thela limbe liphuvbo, avbo a na pwago mahungu nya nyenganyenga, uye a na bwelela a hongola tigoni gwaye; iyoyo nyi na mu ningela a songwa khu litshari.

⁸Avbo Rabhisaki a nga bwelelago, a diya mana mufumeli wa Asiriya na dugide khu dhoropani ga Lakisi, gasi guya dhumela lidhoropa la Libina, kholu a di pwide gupwani khugide khu Lakisi.

⁹Avbo mufumeli wa Asiriya a nga pwago mahungu yaya nya gupwani: Tiraka, mufumeli wa Etiyopiya, a dongide guta mu dwanisa, a di rumela myango ga Ezekhiya, mufumeli wa Judha vaya, khavo:

¹⁰Mu na ya ganela kharati ga Ezekhiya, mufumeli wa Judha, khenu: U nga sengwi khu Nungungulu wago, uye u mu tumbago, u ganela khuwe lidhoropa la Jerusalema kha li na ningedwa mandzani ga mufumeli wa Asiriya.

¹¹Uwe u pwide gwadi esi vafumeli va Asiriya va giredego mambe mayigo, idzo va ma pfhungumudego khidzo muphelo; ina khuwe basi u na vbulugago, gani?

¹²Ina vanungungulu nya mayigo yaya va vbulugiside mayigo ma pfhungumudwego khu vababe vangu gani, a gu aya: Gozani, Harani, Resefe gumogo ni sanana sa Edheni, va nga bani na va gu vbanya tigoni ga Telasari, gani?

¹³Womo hayi mufumeli wa Hamati, ni mufumeli wa Aripadhe, gumogo ni mufumeli nya lidhoropa la Sefarivhayimi, wa Hena ni wa Ivha, gani?

¹⁴Avbo Ezekhiya, a nga hakhago lidangalila khu mandzani ga sirumwa a li hevbula, a di gwela Nyumbani ga PFHUMU Nungungulu; aya li thawuludza mbeli ga PFHUMU Nungungulu.

¹⁵Ezekhiya a di lombelela mbeli ga PFHUMU Nungungulu, khuye:

¹⁶ Uwe PFHUMU Nungungulu nya Tshivba Yatshavbo, Nungungulu wa Israyeli, u khalago vbakari nya dzikerubhimi, khuwe basi u gu Nungungulu nya mifumo yatshavbo ya mafuni; khuwe u giridego ndzadzi ni mafu.

¹⁷Uwe PFHUMU Nungungulu, demba ndzeve upwa; tula maho u wona; yingisa magana yatshavbo ya Senakeribhi, ayo a rumedego guta vala khayo Nungungulu a vbanyago.

¹⁸PFHUMU Nungungulu, lisine, vafumeli va Asiriya, va sasede vathu nya gutale ni gu ghohetela mayigo yawe yatshavbo;

¹⁹va vbisedzede vanungungulu vawe, kholu khandri a diri vanungungulu, aholu a diri sifananiso, thumo nya mandza nya vathu, nya guvatwe khu misimbo ni siwindri; khu guralo va si khungumulede.

²⁰ Gasi olu, uwe PFHUMU Nungungulu wathu, hi vbulugise khu mandzani gwaye, gasi mifumo yatshavbo ya mafuni yi dziti gukhiyo uwe khuwe basi u gu Pfhumu ni Nungungulu.

²¹Khavbo avbo, Isaya, mwamana wa Amosi, a di rumela guya embela Ezekhiya, khuye: PFHUMU Nungungulu wa Israyeli, a ngu ganela kharati, khuye: Mayelano khu iso u nyi lombidego khu mahungu ya Senakeribhi mufumeli wa Asiriya,

²²aya khu magana PFHUMU Nungungulu a ganedego khu mahungu yaye: Nyamahegyane nya likendzi wa Siyoni, a ngu gu hega ni gu gu tsoredzela; nyamahegyane wa Jerusalema avbo u vbindrago a gu kutsunga hungo.

²³Gasi khu mani u mu poyidego ni gu mu vala? Khu mani u mu khusedzedego lito ni maho yago nya gu dzi dandrise? U di girela Nyaguage wa Israyeli!

²⁴Khu magana ya sithumi sago, u vade Pfhumu, khuwe: Khu gutala nya dzikareta dzangu nyi gwede dzitshokhani nya sigomo, ni dzibambe dza Libhanoni; nyi pilela ni misimbo yawe nya gulaphe nya misena, ni misimbo nya wumburi nya mikiperesi u yi hathedego, nyi na vboha kala dzitshokhani gwaye nya gigomo, ni khabini gwaye nya gunone.

²⁵ Nyi kembide milambo nyi sela mati yakone, nyi bangiside mitsongo yatshavbo ya Egipito khu migondro yangu.

²⁶Ina khwa si pima gukhuwe gukhugela gale kheni nyi dongisedego makungo yaya, gani? Gasi olu, nya gu ma gira ma tadzisega, eni nyi dzinide gukheni uwe u khungumule madhoropa nya makhokhola, ma vbindrugedza ma khala marumbi.

²⁷Khu guralo, vavbanyi vaye va ngu pilega hwambo, va vbela tshivba ni gu khala dzitshoni, va fanana ni mwasi wa khabini, ni mwasi nya gunyuge, mwasi wu bugago vbatshani nya dzilangwe, ni sivbila si vbyago si si gu dandri.

²⁸Aholu eni nyi ngu mati makhalelo yago, ni gubela ni guduga gwago, gumogo ni gikhati u gorogago, u nyi wugela.

²⁹Khu kotani nya likhulo u gu nalo ni Eni, ni matshandza yago ma litide kala dzindzeveni Gwangu, wona nya gukhuwe nyi na gu pola thonvu nyi gu thela khalo, nyi gu thela matomu kanani nyi gu bweledza khu ndzila u dzudego khiyo.

³⁰Giyeyedzo gyago gi na bani giri egi: Mwagani momu u na hodza mipfhundre, khu mwaga nya wuvili, mu na hodza iso si na bugago sabune, aholu khu mwaga nya wuraru, mu na yala mu vbwera ni gulima marembwe mu hodza mihandro yakone.

³¹Ga vale va tshadego nya linyumba la Judha, avo va vbulugidego, va na tsitsa mikhamba mafuni, matamo yaye ma ninga mihandro;

³²kholu dhoropani ga Jerusalema gu na duga mitshaledwa, khu gigomoni ga Siyoni, gu duga avo va na vbulugago, si na girega isoso khu lihaladzo la PFHUMU Nungungulu nya Tshivba Yatshavbo.

³³Kholu PFHUMU Nungungulu a ngu ganela kharati khu mahungu ya mufumeli wa Asiriya, khuye: “Uye kha na bela dhoropani momu, ambari gu rinya ni giholoma gimwegyo, gambe kha na hidzimela vbafuvbi gwaye ni gitshangu, ambari gu wungedzela mafu vbandzaritunu a lita khavbo.”

³⁴Ndzila u dzudego khiyo, u na bwelela gambe khiyo; aholu ga lidhoropa leli gima khu na gu bela, a ngu ganela PFHUMU Nungungulu.

³⁵Kholu Eni nyi na vhikela lidhoropa leli, gasi gu li vbulugisa, khu kotani nya lina langu, ni lihaladzo nyi gu nalo khu githumi gyangu Dhavhidhe.

³⁶Khavbo avbo, Ngilozi ya PFHUMU Nungungulu yi diya sasela lizumbo la Vaasiriya, yi songa lizana ni livbandre na mararu magumi ni livbandre magumi (185000) mazana vathu; avbo vambe va nga wugago ni dzimindru, va dita va mana nari sirumbi.

³⁷Khavbo avbo, Senakeribhi, mufumeli wa Asiriya, a di khuga a bwelela, aya khala tigoni ga Ninivha.

³⁸ Tshigu mwedo na gu khozela nyumbani ga Nisiroki, nungungulu waye, sanana saye, Adharameleki ni Sarezeri, va di mu songa khu litshari va tutuma va thavela tigoni ga Ararati; Mwanaye Esari-Hadhomi a di fuma wulangani gwaye.