Read gitonga Isaya 38 Bible Online

Isaya 38 - gitonga bible

Isaya 38

¹Khu matshigu yale, a di dwala Ezekhiya khu madwali nya guhadze gufa; muprofeti Isaya, mwamana wa Amosi, a di ya mu wusela a mu embela, khuye: “PFHUMU Nungungulu a ngu ganela kharati, khuye: Lulamisela gwadi mahungu nya nyumba yago, kholu u nafa khu na vbanya gambe.”

²Khavbo avbo, Ezekhiya a di thendregedza a khighela ndzari a lomba ga PFHUMU Nungungulu,

³a ganela, khuye: “Dundruga PFHUMU Nungungulu, idzo nyi vbanyidego khidzo khu gutumbega ni monyo wu agidego, ni gu thuma mithumo nya gululame mbeli gwago.” Ezekhiya a di lila khu wuvi waye watshavbo.

⁴Khavbo avbo, magana ya PFHUMU Nungungulu, ma dita ga Isaya, a ta mu embela, khuye:

⁵Indra embela Ezekhiya, khuwe: PFHUMU Nungungulu wa babe wago Dhavhidhe, a ngu ganela, khuye: Nyi pwide nombelo wago, nyi wonide marongo yago; khu guralo, nyi na engedzela matshigu nya guvbanye gwago likhumi na livbandre myaga.

⁶Nyi na guvbulugisa mandzani ga mufumeli wa Asiriya, uwe gumogo ni lidhoropa leli nyi na mi vhikela.

⁷PFHUMU Nungungulu a na gu ninga giyeyedzo gegi, gasi u dziti nya gukhuwe Uye a na landrisa magana yaye a ganedego, khuye:

⁸ “Wona nya gukhuwe, nyi na bweledza hwane likhumi mipfhuka nya sigandro si tshiridwego khu lidambo umo nya giyeyedzo gikhatini gya Akazi. Kharato lidambo li di bwelela hwane li tshira likhumi sigandro li nga bani li si vbindride.”

⁹Eyi khu Ndzimo ya Ezekhiya, mufumeli wa Judha a embidego, hwane nya gu bani na hawulugisidwe madwali yaye, khuye:

¹⁰Nyi di ganela, kheni: “Nyi ngari ni matshigu yangu nya guvbanye, nyi di gu alakanya gukheni nya gu hongola gufani, nyi ya bela thowoni nya vafi; nyi wandredwa matshigu yangu nya guvbanye.

¹¹Nyi di gu ganela gukheni: Kha nyi na wona gambe PFHUMU Nungungulu, tigoni nya vathu va vbanyago; gima kha nyi na wonana gambe ni muthu na nyiri vbakari ga vathu va vbahidego mafuni.

¹²Nyi dzegedwe womi wangu wu yiswa hwindzo ni eni, gu fanana ni tshatsha wa vahavisi wu sigudwago va rura; nyi fanana ni mulugi a gu vbedza thumo waye, a pilelago dzitshokha nya dzingodzi; womi wangu wa gu pidwa kharato litshigu latshavbo, wu vbela na gu si khali wutshigu.

¹³Eni nyi di degula kala gugya, kholu u di gu nyi fanyeledzela marambo yangu, gukhwatshi u nghala; gukhugela vbadzimindrutunu kala silambo, wa gu nyi vbedza tshivba.

¹⁴Nyi di gu lila kha nga ndrewulewu, nyi tsikwila gu fanana ni lituva; maho yangu ma di garala khu gu khedza vbatshani; uwe Pfhumu, nyi womo gu garadzegani, nyi phase wuvini momu.

¹⁵Nyi na kheni ginani? Giride iso a nga nyi embelago; matshigu yangu yatshavbo nya guvbanye, nyi na vbanya gutshanisekani, khu kotani nya guvbisege nya hefemulo wangu.

¹⁶Pfhumu, silo nya nga esi khiso si vbanyisago vathu, womi nya hefemulo wangu, womo vbakari nya silo sesi; khu guralo, u na nyi hawulugisa u bwelo khavbo u nyi vbanyisa.

¹⁷Gusaniseka gogu nyi gu manidego gu nyi resede gurula, khu lihaladzo lago u duside hefemulo wangu, wu si thegi phalani nya guhine, kholu sighoho sangu satshavbo u si dzudzugide hwane gwago.

¹⁸Lithowo gima kha li na gu rungudza, ambari lufu gugu dhumisa; avo va ladego phalani nya vafi, kha va woni gambe lisine lago.

¹⁹ Avo va vbanyago, khavo basi va na gu rungudzago, kha nga iso nyi girago eni muhuno; vavelegi va na hevbudze sanana sawe gutumbega gwago.

²⁰PFHUMU Nungungulu dzude a ta nyi vbanyisa; khu guralo, nyi na embelela dzindzimo khu sitendre sangu, matshigu yatshavbo nya gu vbanye gwathu, hi na gu dhumisa Nyumbani ga PFHUMU Nungungulu.”

²¹Khavbo avbo, Isaya a di ganela, khuye: “Va na rese rava nya dzindzowe mu ta wu hungelela avbo nya githunya, Ezekhiya a na vbanya.”

²²Khavbo avbo, Ezekhiya a di va wudzisa, khuye: “Khu gevbini giyeyedzo gyakone nyi na khodwago khigyo kheni nyi na gwela nyiya Nyumbani ga PFHUMU Nungungulu?”