Read gitonga Isaya 4 Bible Online

Isaya 4 - gitonga bible

Isaya 4

¹Litshigu lolo, livbandre na vavili vanyamayi,[11] va na ya namarela ga mwama moyo va ganela, khavo: “Ethu hi na dzi vbwetela habune guhodza, hi dzi rengela habune guambala, wa nga hi diga basi hi ranwa gupwani hi vagadzi vago; hi duse dzitshoni hi gu nadzo.”

²Khu litshigu lile, lithungedwa la PFHUMU Nungungulu li na tala khu wumburi ni wuzundzo; mihandro nya mafu, yi na bani yiri matshandza ga va na Israyeli va na vbulugago.

³Vale va na tshalago[12] gigomoni ga Siyoni, va simama gu khala Jerusalema, va na ranwa sihathwa sa Nungungulu; kholu malina yawe ma na bani ma lovidwe ga avo va vbanyago Jerusalema.

⁴Gikhati Pfhumu a na handzago manyala ya vanyamahegyane va Siyoni ni gu handza novba wu guromo vbakari ga Jerusalema, khu Liphuvbo nya gululame ni Liphuvbo nya agise.

⁵ PFHUMU Nungungulu a na gira lipfhi a fenengedza vbatshani nya gigomo gya Siyoni ni umo va tshanganelago umo vathu, a na gu fenengedza khu lipfhi mihani yile, vbawutshigutunu, gu tuviga wutshi ni gungangamela nya nilo; kholu gungangamela ga Pfhumu gu na gu fenengedza khu maphuvbo yatshavbo.

⁶Gu na manega tshatsha wu na khalago mutsa la gu vbisa lihani, ni gu khala wuthavelo nya gusihale gingulu ni ndzadzi.