Read gitonga Isaya 40 Bible Online

Isaya 40 - gitonga bible

Isaya 40

¹“Tangadzisani, tangadzisani vathu vangu, a ngu ganela Nungungulu wanu!”

²Ganelani khu gutsaka ga Jerusalema, mu mu tiyisa hwambo, khenu gusaniseka nya wugumbi waye guvbede, sighoho saye si futidwe, kholu eni PFHUMU Nungungulu, nyi va vetide gukhedza khu sighoho va giridego.

³ Gu ngu pwala lito la oyu a guromo gigomoni, khilo: “Dongiselani giwulani ndzila ya PFHUMU Nungungulu; lulamisani ni gu guledzela sindzilana sa Nungungulu wathu.

⁴Mikova yatshavbo yi na futedwa, sigomo ni sigomwana, satshavbo si na guledzedwa, iso si wegedego si na lulamiswa, malangani nya sikhidinga, gu na guledzedwa.

⁵ Vathu vatshavbo va na wona wudhumo wa PFHUMU Nungungulu, va na si pima gukhavo khu PFHUMU Nungungulu a ganedego isoso khu wurumba waye.”

⁶Gupwala lito li gu, khilo: “Huwelela;” mumbe, khuye: “Nyi na huwelela ginani?” Va embele khuwe vathu vatshavbo va gu fanana ni mwasi, ni wumburi wawe watshavbo wa gu fanana ni senge nya likhabi.

⁷Mwasi gu banga, senge si thega, avbo liphuvbo la PFHUMU Nungungulu li furugedzago vbatshani gwawe. Lisine kamwe, vathu va ngu fanana ni mwasi.

⁸ “Gu banga mwasi, si thega senge saye, aholu magana ya Nungungulu wathu, ma gu simama kala gupindruga.”

⁹Uwe u reselago Siyoni mahungu nya yadi nya maphya, lita gigomoni nya gulaphe. Khusedza lito khu tshivba, uwe u reselago Jerusalema, mahungu nya yadi, u nga thavi, embela madhoropa ya Judha, khuwe: “Wonani, khuye oyu Nungungulu wanu.”

¹⁰ Wonani nya gukhenu Mune, PFHUMU Nungungulu, a nguta nari ni tshivba guta fuma khu gyandza gyaye; wonani, a nguta ni tshatshazelo waye, a guta ni vathu a va tshudzisidego; a va thangisa mbeli gwaye.

¹¹ Kha nga muhavisi a havisago tshambi waye, khu mawogoni gwaye a na wugarela sinvutana a si vega vbakhanatunu, vamayi vakone a na va hetedza, a va havisa gwadi.

¹²Ina womo a pimidego mati ya linene khu gyandza gyaye, gani? Ni uye a pimidego ndrengelenge wa ndzadzini khu dzinyala dzaye? Khu mani a pimidego gitundruni kudzudzwane watshavbo nya mafu, ni gu pima sigomo ni sigomwana vbagikalotunu?

¹³ Khu mani a yeyedzidego ndzila liphuvbo la PFHUMU Nungungulu? Khu mani a mu ningidego wusingalagadzi ni gu mu hevbudza?

¹⁴Lombide ga mani wusingalagadzi gasi a mane mapimo, ni gu mu yeyedza dzindzila nya gululame? Khu mani a nga mu hevbudza guti, ni gu mu yeyedza ndzila nya wugengeli?

¹⁵Wonani nya gukhenu mayigo ga uye, ma gu fanana ni lidodoto nya mati li dotago khalini, ni gu fanana ni kudzudzwane wu thegedego mugikaloni, ni sidwa a gu si wona na si gu fanana ni kudzudzwane wu vbuvbago.

¹⁶Ambari magabi ya Libhanoni, dzikhuni dzaye kha dzi ningani gu gira nilo nya giluvelo, ni sirengo saye, kha si eneli gu gira miphaso nya guvbiswe.

¹⁷Mayigo yatshavbo kha ma phasi gilo mbeli gwaye; khandri ya gilo mbeli gwaye, a gu ma wona kha nga gilo nya liphanga!

¹⁸Nungungulu nyi na mu fananisa ni mani, gyomo igyo mu no gi fananisago naye, gani?

¹⁹ Meseri a gu pfhula gifananiso, munyiviligisi nya ndralama a gi londra khu sugu, ndralama ni mikarara nya parata.

²⁰ Uye a hamugago, a gu hatha simbo nyamba hina a dzi hathela meseri a wutigo gwadi thumo, guta mu vatela gifananiso gi na gumba tsekatseka.

²¹Ina kha muti gilo? Ina kha mwa pwa gilo, gani? Ina kha mi tivisani gukhugela guhegulani isoso, gani? Mwendro kha mu dziti gukhenu litigo li wumbisidwe kharini?

²²Khuye a khadego khu vbatshani nya litigo, vavbanyi vakone a gu va wona kha nga mbasa, uye a gu ladza damboni kha nga mwendra, a gu ghwimba kha nga tshatsha nya gukhale umo;

²³khuye a vbwasamisago manganagana, a thesa vbavbatshi valamuli va mafuni gasi va si khali gilo.

²⁴Na va ngari gu sigedwa mwendro gu yadwa, avbo va phelago gu thela mikhamba, tshina yaye ya gu pidwa; va gu furugedzwa khu phuvbo vbatshani gwawe va vuna, va ta dzegwa khu gingulu va vbuvba kha nga mavivi.

²⁵“Nyi na dzi fananisa ni mani gasi nyi godzana naye?” A ngu wudzisa uye a Agidego.

²⁶Khusedzani maho mu khedze vbatshani, mu wona. Khu mani a giridego silo sesi? Khuye a si hengeledzelago kha nga mabutho yaye nya dzinyeledzi, satshavbo a si rana khu malina yawe, khu mahungu nya wugulu nya tshivba yaye, ni gutiya nya mufumo waye, gimwalo gi na kenelelago.

²⁷Khu ginani uwe Jakobe ni uwe Israyeli u ganelago, khuwe: PFHUMU Nungungulu kha dzini gu vboha vbafuvbi gwangu, Nungungulu wangu a gu nyi diga a si nyi lamuli?

²⁸Ina kamwe khu dziti mwendro gupwa gilo, gani? Nya gupwani Nungungulu, Pfhumu nya gupindruge, khuye Muvangi nya litigo latshavbo, kha garali ni guvbela tshivba, gani? Wugengeli waye mwalo a wu pimago.

²⁹A gu ninga tshivba avo va rerekidego, ni gu phasedzela vale va gu mwalo tshivba.

³⁰Vathu vaphya va na vbela tshivba va garala, madzaha ma na dhedhereka ma thega,

³¹ aholu vale va tumbago PFHUMU Nungungulu, va na wusedzwa tshivba yawe, va vbuvba khu mambapi gu fanana ni maghama, va na tutuma nyamba garala, va gimbila nyamba vbela tshivba.