Read gitonga Isaya 42 Bible Online

Isaya 42 - gitonga bible

Isaya 42

¹ Wonani githumi gyangu, gihathwa gyangu nyi gi sayisago, gi nengedzisago monyo wangu. Nyi thede Liphuvbo langu avbo gwaye, gasi a yise gululama ga va nya mayigo.

²Kha na gulumela mwendro gu dzi khusedza, ambari gu pwadza lito laye mitendrelani.

³Kha na funya tshava yi pandregidego, ambari gu tshima litirisida li nga gu tuvigago wutshi; a na tiyisa khu lisine gululama.

⁴ Kha na vbela tshivba ambari gu garala, kala a gu tivisa gululama tigoni; mayigo ya sidwani ma na lirela gupwa sihevbudzo saye.

⁵Khiso a ganelago Nungungulu, PFHUMU Nungungulu a giridego ndzadzini a gu ladza, a wumbidego litigo, ni mihandro yatshavbo yi dugago khumo; uye a ningago guvbanya vathu va guromo umo, ni hefemulo ga vathu va khalago umomo.

⁶ Eni, PFHUMU Nungungulu, nyi gu ranide guta thuma gululama, nyi na gu phara khu libogo, nyi gu sayisa, nyi na gu gira mutshanganisi nya vathu ni wenengedzo wa va nya mayigo;

⁷gasi u tula maho sikhumu, ni gu tshula sibotshwa pasoni, ni gu dusa avo va vbanyago mugidemani.

⁸Eni kheni PFHUMU Nungungulu: Eli khilo lina langu nyi ranwago khilo! Wudhumo wangu kha nyi na ningela mumbe muthu, ambari gu ningela wuzundzo wangu ga sifananiso nya guvatwe.

⁹Wonani nya gukhenu siwoniso nya guhegule si giregide, olu nyi ngu mi tivisa silo nya siphya, nyi ngu si tivisa gwanu, na si si gu vbohi.

¹⁰ Embani ga PFHUMU Nungungulu ndzimo nya yiphya, mu mu dhumisa gukhugela mahegiso nya mafu, enu mu gimbilago vbatshani nya linene ni satshavbo si guromo umo, enu sidwa gumogo ni vavbanyi vaye.

¹¹Ambari giwula, ni madhoropa yaye, gumogo ni mitalala ya Kedhari, kulungelani, embelelani khu gutsaka enu vavbanyi va Sela, emani khu vbatshani nya sigomo mu kulungela;

¹²mu rungudza PFHUMU Nungungulu ni gu pwadza wuzundzo waye ga mayigo nya sidwa.

¹³PFHUMU Nungungulu a na duga kha nga ndrena, kha nga muthu a dugago guya nyimbitunu, a goroga a wusa likhulo laye, a huwata, a gira ligwaha nya likhongolo nya nyimbi, a yeyedza tshivba yaye mbeli ga valala vaye.

¹⁴Gale ngudzu na nyi degude, nyi dzi phara nyi dzi rudzisa; aholu, olu nyi na keta kha nga nyamayi a lumwago, nyi na hefemudzega nyi bwelo khavbo nyi taledwa khu mahika.

¹⁵Nyi na khungumula sigomo ni sigomwana, nyi bangisa mwasi waye, mitsongo yi na vbindrugedza yi khala sidwa, nyi bangisa matsiva.

¹⁶Nyi na gimbidzisa sikhumu khu ndzila si si yitigo, nyi va gimbidzisa khu sindzilana nya gu gima kha sa nga gimbila khiyo, mbeli gwawe nyi na vbindrugedza gidema gi khala guwonegela, ni dzindzila nya sikhidinga dzi na guledzedwa. Silo sesi nyi na si gira satshavbo nyamba tshiya ni gimwegyo.

¹⁷ Va na lundrwa, va bwelela hwane na va tade khu dzitshoni, avo va tumbago sifananiso nya guvatwe, khavo: Enu khenu vanungungulu vathu.

¹⁸Enu sivbwiri yingisani, ni enu sikhumu, tulani maho gasi mu kodze gu wona.

¹⁹Khu mani a gu gikhumu kha nga githumi gyangu, mwendro givbwiri, kha nga girumwa gyangu nyi gi rumelago? Khu mani a gu gikhumu kha nga wule a phasedwego gwangu, mwendro givbwiri kha nga githumi gya PFHUMU Nungungulu?

²⁰Uwe u ngu wona silo nya singi, aholu khu si vegedzi; ambari wa gu tula dzindzeve dzago, khu yingisi gilo.

²¹PFHUMU Nungungulu a di gu nengela khuye, khu lihaladzo nya gululame gwaye, a mu khusedzide khu nayo, a mu ninga wudhumo.

²²Gambe vathu vava, va dhumedwe ni gu bedwa silo sawe, vatshavbo va dzudzugidwe mavbalani ni gu khothedwa mapasoni; va modwe, aholu va mwalo mutshudzisi, va phangidwe, aholu mwalo a ganelago, khuye: “Va bweledzeleni!”

²³Khu mani vbakari gwanu a na pwago silo sesi? A na pwago ni gu pima iso si na gu dugelelago ga matshigu ma nga gutago?

²⁴Khu mani a ningedego Jakobe a phangwa, ni Israyeli mandzani nya vaphangi? Ina khandri PFHUMU Nungungulu, oyu va mu ghohedego, gani. Khuye va nga ndreyago ndzilani gwaye, va si dzumeli gu yingisa nayo waye.

²⁵Khu guralo, uye a di vbaladza likhulo laye vbatshani gwawe, ni nyimbi nya guthise ni gu va fenengedza khu malavbelavbe nya nilo vbakari gwawe, ambari khu guralo, kha va si pima; va dagarede khuwo, aholu kha va khathala khu gilo.