Read gitonga Isaya 43 Bible Online

Isaya 43 - gitonga bible

Isaya 43

¹Gasi olu, PFHUMU Nungungulu, oyu a nga gu vangago, uwe Jakobe, bwelo khavbo a wumba uwe Israyeli, a ngu ganela kharati, khuye: “U nga thavi, kholu eni nyi gu dzegiside, nyi gu ranide khu lina lago, uwe u wangu.

²Ambari wa guvbindra khu matini, eni nyi na bani nyiri nago, wa gu tsemakanya mitsongo, gima khu na dzama. Wa guvbindra khu vbakari nya nilo, gima khu na nga vbya, ambari gu vbiswa khu malavbelavbe.

³Kholu eni kheni PFHUMU Nungungulu wago, Nyaguage wa Israyeli, Muvbanyisi wago; nyi ningede Egipito, gu khala mudzegisi wago, Etiyopiya ni Sebha wulangani gwago.

⁴Kholu uwe u di gu golega mahoni gwangu, ni gu zundzega, gambe nyi gu gode, nyi na gu dzegisa khu vathu, nyi na ningela mayigo gasi gu khala mhamba nya gu gudzegise.

⁵Khu guralo u nga thavi, kholu eni nyi nago, nyi na wuyisa situgulwana sago gukhugela Khugadambo, nyi si tombanisa gukhugela Pfoladambo.

⁶Nyi na ganela ga mayigo ya Wuronga, kheni: Va tshudzise; ga mayigo ya Marandzi, kheni: U nga va himbedzeli! Nyi resele sanana sangu nya madzaha si guromo mayigoni ya hwindzo; ni sanana sangu nya vanyamahegyane si guromo mahegiso nya litigo,

⁷kholu vatshavbo va ranwago khu lina langu, avo nyi va vangidego gasi va khala wudhumo wangu, kheni nyi va wumbidego nyi bwelo khavbo nyi va gira.”

⁸Wuyisani vathu va gu ni maho, aholu na vari sikhumu, ni avo va gu ni dzindzeve, aholu na vari sivbwiri.

⁹Mayigo yatshavbo ma na tombane dangamwedo, vathu vatshavbo va tshangane, khu mani vbakari gwawe a kodzago gu huwelela esi, mwendro gu hi pwadzela esi si giregidego gale, na? Bikelani dzifakazi dzaye dzi ta mu fakazela, gasi ha gu sipwa hi kodza gu ganela, khethu: “Ina lisine!”

¹⁰“Enu mu dzifakazi dzangu, a ngu ganela PFHUMU Nungungulu,” nyi gu hathide gasi u khala githumi gyangu; gasi u dziti, u khodwa ni gu pima gukhenu eni kheni kamwe, khu hwane gwangu mwalo mumbe Nungungulu a na manegago, khu mbeli gwangu, kha na manega mumbe.

¹¹Eni kamwe, kheni PFHUMU Nungungulu, vbavbandze gwangu mwalo mumbe muvbanyisi.

¹²Eni nyi huwelede, nyi mi vbanyiside, nyi bwelo khavbo nyi si pwadza; nungungulu wa va nya mayigo, kha manega vbakari gwanu. Enu, khenu dzifakazi dzangu, angu ganela PFHUMU Nungungulu; eni kheni Nungungulu.

¹³Gukhugela matshigu ya gale, Eni nyi diri Eni; mwalo ni moyo a kodzago guvbulugisa muthu mandzani gwangu; igyo nyi girago, mwalo a nyi himbedzelago.

¹⁴ PFHUMU Nungungulu, mutshudzisi wago, Nyaguage wa Israyeli, a ngu ganela kharati, khuye: “Khu kotani nya lihaladzo nyi gu nalo khu enu, nyi na rumela mabutho guya sasela Bhabhiloni, Vakalidhiya vatshavbo, va na tutuma khu mataro yawe va nga bani va dzi zundza khayo.

¹⁵Eni kheni Pfhumu, Gihathwa gyanu, Muvangi wa Israyeli, ni Mufumeli wanu.

¹⁶PFHUMU Nungungulu, wule a mi tuledego ndzila matini nya yiphwa, ni gu mi tulela likondro matini nya nondrwa, a ngu ganela kharati, khuye:

¹⁷ Uye a nga yisago umo dzikareta ni dzikavalu ni masotshwa gumogo ni dzindrena, va mbembide gumogo umomo, gima kha va na wuga gambe; va mbembide va tshimega kha nga litirisida.

¹⁸Mu nga alakanyi silo si vbindridego, ambari gu ninga lisima silo sa gale.

¹⁹Wonani nya gukhenu nyi na gira gilo nya giphya, gi na dugago mu gi wona; ina kha mu si woni, gani? Wonani nya gukhenu nyi tude ndzila giwulani, nyi pola mitsongo mafuni nya gihala.

²⁰ Sirengo sa khabini si na nyi dhumisa, masolwa ni sifondro nya dzimbowa; kholu nyi na vega mati giwulani ni mitsongo mafuni nya gihala, gasi gu ninga mati va sela vathu vangu, ni ga gihathwa gyangu,

²¹ vathu vava nyi dzi wumbedego, gasi va huwelela wudhumo wangu.”

²²Ambari khu guralo, uwe Jakobe, kha wa nyi khozela, u di garala kheni uwe Israyeli.

²³Kha wa nyi resela dzinvuta guta gira miningelo nya miphaso nya guvbiswe, ambari gu nyi zundza khu dzimhamba dzago; eni kha nya gu lemedza khu gu lomba miningelo nya guhodze, ambari gu gu garadza khu gu nyi vbisela libani.

²⁴Kha wa nyi rengela misimbo nya gunungele khu dzitsapawu, ambari gu nyi tsakisa khu mafura nya sifuyo nya miphaso, aholu u di nyi tshanisa khu sighoho sago, u nyi garadza khu guvivba gwago,

²⁵Eni kamwe, kheni nyi futago sighoho sago, khu gugola gwangu, sighoho sago gima kha nyi na si alakanya gambe.

²⁶Nyi embele mahungu yago, gasi hi lamulana; nyi bikele lisine lago, gasi u manega nu lulamide.

²⁷Nyapandre wago ghohide, ni vathangeli vago va nyi wugede.

²⁸Khu guralo, nyi na nyenyezisa vathangeli vago va nyumbani nya guage; nyi na ningela Jakobe a mbembiswa ni Israyeli a vadwa, a khala gihegiso.