Read gitonga Isaya 44 Bible Online

Isaya 44 - gitonga bible

Isaya 44

¹Gasi olu, yingisa uwe githumi gyangu Jakobe, uwe Israyeli nyi gu hathidego.

²PFHUMU Nungungulu a nga gu girago, a gu wumbidego gukhugela ndrani ga mayi wago, uye a gu phasago, a ngu ganela kharati, khuye: “U nga thavi, uwe Jakobe, githumi gyangu, uwe Jesurumi nyi gu hathidego.

³Kholu nyi na guhula mati tigoni gu gu na ni lidora, ni mitsongo mafuni nya gihala; nyi na guhula Liphuvbo langu vbatshani nya melego wanu, ni makategwa yangu, vbatshani ga situgulwana sanu;

⁴ avo va na buga gu fanana ni mwasi wu bugago vbafuvbi ni tsongo nya mati.

⁵Moyo a na ganela, khuye: Eni nyi wa PFHUMU Nungungulu; mumbe a na dzi riya lina la Jakobe; mumbe a na lova mandzani gwaye, khuye: Eni nyi wa PFHUMU Nungungulu, limbe lina, a dzi rana khuye kheni Israyeli.”

⁶ PFHUMU Nungungulu, Mufumeli wa va na Israyeli, ni Mudzegisi wawe, Nungungulu nya Tshivba Yatshavbo, a ngu ganela kharati, khuye: “Eni kheni nya guphele ni guhegisa, vbavbandze ga Eni, mwalo mumbe Nungungulu.

⁷Khu mani mumbe a fananago ni Eni? A na khuge a ema a dzi yeyedza, a dzi girela wufakazi waye mahoni gwangu; khu vamani va dzi kodzago gufudza iso si nga gutago va wuya va hi tshamusela, na?

⁸Mu nga thavi, gambe mu nga vbeli tshivba; ina gukhugela gale kha nya mi embela mahungu yaya, kha nya mi tivisa, gani? Enu mu dzifakazi dzangu, womo mumbe Nungungulu vbavbandze ga Eni, gani? Gi mwalo gimbe Giwindri nyi gitigo.”

⁹Vatshavbo vawumbi nya sifananiso khandri va gilo, ni mithumo yawe va yi tsakelago, kha yi phasi gilo; avo vabune kamwe dzifakazi nya gukhavo kha va woni ambari gu pima gukhavo va na thedwa dzitshoni.

¹⁰Muthu a gu dzi girela nungungulu ni gu dzi vatela gifananiso, a na wuyedwa khu ginani?

¹¹Wonani gukhenu, vatshavbo vale va si khozelago va na khala dzitshoni, kholu silo soso si giridwe khu vathu; va na tombane vatshavbo va ema gumogo; vatshavbo va na thava, va khala dzitshoni.

¹²Mupfhuli nya dzisimbi a gu gira libhewula, a gu li thuma vbamagalatunu nya nilo, a wumba gifananiso, a li betha khu gikhokhotho nya dzisimbi, a li lodza khu tshivba nya mawogo yaye; uye a ngupwa ndzala, aholu kha seli mati a gu garala, a vbela tshivba.

¹³Muvati a gu pima lipulango khu ngodzi, a dzega lapi a tsenena; a li vata khu mbato, na gu pima a gira gifananiso nya muthu nya gumbure ngudzu, khu hwane a gi vega nyumbani gwaye.

¹⁴A di dzi pilela simbo nya sena, mwendro gu dzega ndziri mwendro nguhu, a gu wu hatha vbakari nya misimbo nya likhabi; a yala simbo nya pinyu, yiwa ndzadzi, yi wu dandrisa.

¹⁵Gasi muthu a kodza gu mana dzikhuni nya gu vase khidzo nilo ni gu phula khidzo guhodza; gimbe gipandre nya mapulango a vata khigyo gifananiso nya nungungulu a gi khidzimela a gi khozela.

¹⁶Gimbe gipandre nya mapulango a gu khuta khigyo nilo; a vawula nyama a hodza a khura; bwelo khavbo a wora, a ganela, khuye: “Nyi ngupwa gufurumela kholu nyi na ni nilo!”

¹⁷Aholu, khu gimbe gipandre nya mapulango, a di vata gifananiso nya nungungulu a khidzima mbeli ga igyo, a gi khozela, a lombelela ga igyo, khuye: “Nyi vbanyise, kholu uwe u nungungulu wangu!”

¹⁸Vathu nya nga vovo, kha vati gilo ambari gu pima; kholu maho yawe ma tulegide, aholu kha ma woni, ni myonyo yawe, kha yi pimi gilo.

¹⁹Vbakari gwawe mwalo ni moyo a alakanyago uye a gu ni guti mwendro gupimisa, gasi a ganela, khuye: “Gipandre nya mapulango nyi khuthide khigyo nilo nyi phula guhodza, magala yakone nyi vawula khayo nyama, nyi hodza; ina nyi ngu dzi kodza gu dzega gipandre gi tshadego nya mapulango nyi gira gifananiso nya gu dzi nyenyezise, gani? Ina nyi ngu yela gu khidzima nyi khozela gifananiso nya simbo, gani?”

²⁰ Muthu nya kharato, a gu hodza nguma, a gu kanganyiswa ni gu dzimedzwa khu maalakanyo yaye; kha dzi kodzi guvbulugisa hefemulo waye, ambari gu ganela, khuye: “Esi nyi si pharidego khu mandzani gwangu ga nyamudye, ina khandri malipha, gani?”

²¹Dundruga silo sesi uwe Jakobe, ni uwe Israyeli, kholu nyi gu giride githumi gyangu. Nyi gu wumbide gasi gu khala githumi gyangu; uwe Israyeli, gima kha nyi na gu divala.

²²Nyi fuviside guvivba gwago, gu fanana ni hunguva, ni sighoho sago nyi si mwalalegiside kha nga lipfhi; wuya gwangu, kholu kheni mudzegisi wago.

²³Embelelani khu gutsaka, enu ndzadzini, kholu si giridwe khu PFHUMU Nungungulu! Wombani mikulungwane enu mu guromo guetani nya mafu! Embani sizimba khu gunengela, enu sigomo, magabi ni misimbo yaye yatshavbo, kholu PFHUMU Nungungulu tshudziside Jakobe, a dzi dhumisa khu Israyeli.

²⁴PFHUMU Nungungulu, Mudzegisi wago, Oyu a gu wumbidego rumbuni ga mayi wago, a ngu ganela kharati, khuye: Eni kheni PFHUMU Nungungulu, nyi girago silo satshavbo, nyi giride ndzadzini, nyiri nyonga nyi ladza mafu, nyiri nyonga.

²⁵ Nyi ngu ganedza vaprofeti nya malipha, nyi handrugisa va nya gulola dzisolo; va nya guti nyi va bweledza hwane, nyi vbindrugedza wugengeli wawe wu khala wupumbu.

²⁶Aholu nyi ngu tiyisa magana ya githumi gyangu, nyi landrisa makungo ya sirumwa sangu, kheni nyi ganelago ga lidhoropa la Jerusalema, kheni: “Vathu va na bwelela va ta khala umo, nyi embela madhoropa ya Judha, kheni: Ma na vbahedzwa;” nyi na wusedza marumbi yawe.

²⁷Nyi na embela guetani nya yiphwa, kheni: “Uvbwa, eni nyi na bangisa mitsongo yago.”

²⁸ Nyi na embela Kiro, kheni: “Uye khuye muhavisi wangu, a na landrisa satshavbo si nyi tsakisago; ga Jerusalema nyi na, kheni: U na vbahedzwa; ni ga Nyumba ya Nungungulu, kheni: Siseketelo sago si na vbahedzwa nyaluphye.”