Read gitonga Isaya 45 Bible Online

Isaya 45 - gitonga bible

Isaya 45

¹PFHUMU Nungungulu a ngu ganela ga Kiro, a mu todzidego khu mafura, uye a mu pharide khu libogo laye la nyamudye, a mu ninga tshivba gasi a pala mayigo mbeli gwaye, nyi na thela hwanga vafumeli gasi va tule malimba nya lidhoropa, nyamba segwa gambe.

²Nyi na gimbila mbeli gwago, gasi gu lulamisela dzindzila nya guwegele, nyi na pandrelela malimba nya sugu ni gu ghwawula migonyo nya dzisimbi.

³Nyi na gu ninga gyuma gi sihidwego ni thomba yi fenengedzidwego malangani nya gusihale, gasi u kodza gu dziti gukhuwe eni, kheni PFHUMU Nungungulu wa Israyeli, a gu ranago khu lina lago.

⁴Khu kotani nya lihaladzo nyi gu nalo ni githumi gyangu Jakobe, ni Israyeli, gihathwa gyangu, nyi na gu rana khu lina lago, bwelo khavbo nyi gu ninga lina nya wuzundzo, ambari olu u si nyitigo.

⁵Eni kheni PFHUMU Nungungulu, vbavbandze gwangu, mwalo mumbe Nungungulu Eni nyi na gu tiyisa, ambari olu u si nyitigo,

⁶gasi gukhugela Khugadambo kala Muhwadambo, vatshavbo va dziti gukhavo mwalo mumbe vbavbandze gwangu. Eni kheni PFHUMU Nungungulu, mwalo mumbe.

⁷Eni nyi ngu wumba wenengedzo ni gu gira gidema; nyi ngu tsakisa muthu, nyi bwelo khavbo nyi mu rumela sigaradzo; eni PFHUMU Nungungulu nyi ngu gira silo satshavbo sesi.”

⁸Khu vbatshani ndzadzini gu na thege mati, ni mapfhi ma na wise gululama; ma na tulege mafu, gu buga guvbanyisa, gumogo nago, gu duge gululama; kheni PFHUMU Nungungulu nyi vangidego isoso.

⁹Libango ga muthu a ganedzisanago ni muvangi wawe! Ina khali yi ngu ganedzisana ni muwumbi waye, gani? Ina libumba li ngu tshuka li ganedzisana ni muganyi [35] walo, khilo: “Wa guvbweta gu wumba ginani?” Mwendro thumo wago, wu nga ganela, khuwo: “U mwalo landza, gani?”

¹⁰Libango ga uye a embelago babe waye, khuye: U nyi velegede ginani? Ni ga mayi waye, khuye: “Khu ginani u nyi velegidego?”

¹¹PFHUMU Nungungulu, Nyaguage wa Israyeli, Wule a gu wumbidego, a ngu ganela kharati, khuye: Ina mu na nyi wudzisani mayelano khu iso si nga gutago ga sanana sangu, gani? Mwendro gu nyi leletela khu mahungu nya thumo nya mandza yangu, gani?

¹²Kheni nyi vangidego mafu nyi bwelo khavbo nyi vanga muthu, a vbanya umo; nyi thawuludzide ndzadzini khu mandza yangu, nyi ninga nayo mabutho yaye yatshavbo.

¹³Kheni nyi khendzugisidego Kiro khu gululama gwangu, nyi lulamedza dzindzila dzaye dzatshavbo; uye a na vbaha lidhoropa langu ni gu tshudzisa vathu vangu va guromo wugumbini, nyamba livbwa dzitsapawu mwendro gu bongwa, a ngu ganela PFHUMU Nungungulu nya Tshivba Yatshavbo.

¹⁴PFHUMU Nungungulu a ngu ganela kharati, khuye: “Thomba ya Egipito ni wugwewo wa Etiyopiya, ni vavbanyi va Sabha, vathu nya vadandrangulu, va nata gwago vata lumba uwe; avo va na landra khu hwane gwago na va hungidwe makhetshe; va na noga mbeli gwago, va gira milombelo avbo gwago, khavo: Khu lisine Nungungulu womo avbo gwago basi;[36] vbavbandze gwaye, mwalo mumbe Nungungulu.”

¹⁵Khu lisine, uwe u Nungungulu nya sihalo, uwe u Nungungulu ni Muvbanyisi wa Israyeli.

¹⁶ Vatshavbo va vatago sifananiso, va na khala dzitshoni va hambanega mapimo.

¹⁷Aholu PFHUMU Nungungulu a na vbanyisa Israyeli kala gupindruga; gima kha mu na thega gambe dzitshoni, ni guhambanega mapimo kala gupindruga.

¹⁸Kholu PFHUMU Nungungulu, oyu a vangidego ndzadzini, Nungungulu a wumbidego litigo ni gu li gira, uye a li tiyiside, kha li gira nari liphanga; aholu a di li girela gukhuye li khala wulanga nya gu vathu va khala umo, a ngu ganela kharati, khuye: Eni kheni PFHUMU Nungungulu, mwalo mumbe.

¹⁹Kha nya ganela gusihalani, mwendro wulangani nya gidema; kha nya embela gitugulwana gya Jakobe, kheni: Nyi vbweteni mahala; Eni PFHUMU Nungungulu, nya gu ganela lisine, ni gu tivisa iso si lulamidego.

²⁰Tombanani muta; hidzimelani gumogo mwatshavbo, enu mu vbulugidego ga va nya mayigo; vale va rwalago sifananiso nya misimbo nya guvatwe, va gira milombelo ga nungungulu a si dzi kodzigo gu va vbanyisa.

²¹Ganelani mahungu mu ma pwadza, ni gu ninga wufakazi wanu. Wudzisanani khu gyanu. Khu mani a tivisidego silo sesi gukhugela gikhati gya gale? Gukhugela ga gikhati gile, khu mani a si tivisidego? Ina kamwe khandri eni PFHUMU Nungungulu nyi si giridego, gani? Kholu mwalo mumbe Nungungulu, vbavbandze nya eni, Nungungulu nya gululame ni mutshudzisi, mwalo mumbe vbavbandze ga eni.

²²Wuyani avbo gwangu, mu na ta vbanyiswa enu mwatshavbo mutago khu mahegiso nya litigo; kholu eni kheni Nungungulu, mwalo mumbe.

²³ Eni nyi sambanyide nyabune; khu kanani gwangu gu di duga esi nya gululame, ni magana yangu kha ma na bwelela hwane, mazolo yatshavbo ma na khidzima mbeli gwangu, ni malimi yatshavbo ma na sambanya khu eni.

²⁴Va na ganela khu eni, khavo: Gululama ni tshivba somo ga PFHUMU Nungungulu basi; va nata gwaye na va tade khu dzitshoni vatshavbo vale va nga mu wugelago.

²⁵Aholu, situgulwana satshavbo sa Israyeli si na sayedwa gululama avbo ga PFHUMU Nungungulu, va dzi zundza khavbo gwaye.