Read gitonga Isaya 46 Bible Online

Isaya 46 - gitonga bible

Isaya 46

¹Bheli, nungungulu nya malipha thegide, ni Nebhu nogide vbavbatshi; [37] sifananiso sawe si ngu rwegwa vbatshani nya sirengo ni dziburu; mirwalo yanu ya gu lemela dziburu dzi garadego khu gu lemedwa.

²Vanungungulu vovo va ngu noga gumogo va thega navo kha va dzi kodzi gu vbanyisa sifananiso sawe; avo vamune kamwe, va ngu yiswa wugumbini.

³Nyi yingiseni, enu sanana sa Jakobe ni mitshaledwa yatshavbo nya lihundzu la Israyeli; enu nyi mi wugaredego khu mawogo gukhugela ndrani ga mayi wanu, kala mu velegwa.

⁴Kala gugumbani gwanu, Eni nyi na simama nyiri eni kamwe, kala mu buga dzinvi eni nyi na simama nyi mi sayisa. Nyi si giride, gambe nyi nga na gu simama gu si gira; nyi na mi wugarela nyi mi vbanyisa.

⁵Khu mani mu na gu mu fananisago ni Eni mwendro ginani mu nyi fananisago nagyo? Mu na nyi ninganisa ni mani, gambe mu nyi fananisa ni mani?

⁶Vathu va gu dusa ndralama borisani ni gu pima ndrengo nya parata musikaloni; va gu thola mupfhuli nya ndralama gukhavo a va girele nungungulu gasi va mu khidzimela va kuha mafu khu khovbe, va mu khozela.

⁷ Va mu vbagara magatani gwawe, va gu gimbilagimbila naye, ni avbo va mu vegago a gu khala avbo nyamba dzi khuta; ambari va mu girela nombelo, uye kha phindruli gilo; gambe kha vbulugisi ni moyo musigaradzoni gwaye.

⁸Alakanyani gwadi esi, mu si vega mapimoni gwanu; mu nga divaledwi khiso, enu mu vivbedwego khu myonyo.

⁹Alakanyani silo si vbindridego gukhugela gale ngudzu! Wonani nya gukhenu Eni kheni Nungungulu, mwalo mumbe Nungungulu a fananago ni eni;

¹⁰Eni nya gu tivisa esi si giregidego gukhugela guhegulani, gukhugela dzinango dzi vbindridego nidzo dzi nga gutago. Nyi ngu ganela, kheni: Makungo yangu ma na tiya, gambe nyi na gira satshavbo nyi si golago.

¹¹Nyi ngu rana lighama khu Khugadambo, khu tigoni ga hwindzo, nyi rana muthu a na ta landrisago guhaladza gwangu, kholu nyi mu embede kharato, gambe si na girega; nyi si hungide, gambe si na girega.

¹²Nyi yingiseni enu vathu nya gubange mihungo, mu guromo hwindzo ni gululama.

¹³Nyi ngu resa gululama gwangu, gambe gu mwalo hwindzo; ni guvbanyisa gwangu kha gu na hwela. Nyi na vega guvbanyisa gigomoni ga Siyoni, ni tigoni ga Israyeli, nyi na wusedza wudhumo wangu.