Read gitonga Isaya 47 Bible Online

Isaya 47 - gitonga bible

Isaya 47

¹Tshiga vbavbatshi, u khala ngumani, uwe likendzi nyamahegyane wa Bhabhiloni; khala vbavbatshi; kholu u mwalo gambe gikhalo nya wufumu, uwe nyamahegyane wa Vakalidhiya, kholu gima khu na ranwa gambe pwani khuwe nya gu dzi gole ni gumbura.

²Dzega gitshindro u tshindra wuguvbi; tshula gikhongelo hungoni, u kunya myendra yago u tshatuga mitsongo.

³Dzitshoni dzago dzi na tugudwa, vathu va na wona wumbwiri wago; nyi na dzi phodzela nyamba tsetselela ni muthu moyo.

⁴Lina la Mudzegisi wathu khu PFHUMU Nungungulu nya Tshivba Yatshavbo, Nyaguage wa Israyeli.

⁵Khala vbavbatshi huwe kape, u bela vbakari nya gidema, uwe nyamahegyane wa Vakalidhiya, kholu gima khu na ranwa gambe pfhumugadzi nya mifumo.

⁶Na nyi khuvegide ngudzu khu kota ya vathu vangu, nyi di nyenyezisa thomba yangu nyi yi ningela mandzani gwago. Aholu uwe gima khwa va pwela gisiro; ambari ni sikhosane u di si rwega mirwalo nya gulemele ngudzu.

⁷U di ganela, khuwe: “Eni nyi na khala pfhumugadzi mafuni gwatshavbo kala gupindruga! Kala olu u di si pimisi gwadi silo sesi monyoni gwago, ambari gu dundruga mahegiso ga iso.”

⁸Gasi olu, yingisa esi, uwe u golago gu dzi tsakisa, uwe u dzi pwago na wu khalegide; uwe u alakanyago khu monyoni gwago, khuwe: “Eni kheni nyenga, mwalo mumbe. Gima kha nyi na khala noni ambari gu fedwa khu sanana sangu.”

⁹ Aholu sigaradzo sa sivili, si na gu dugelela khu litshigu limwedo; u na fedwa khu sanana sago ni gu khala noni; si na gu garadzela ngudzu. Ambari nuri ni mirendre nya gutale ni wuloyi nya tshivba.

¹⁰Kholu u di tumba wuvivbi wago, u ganela, khuwe: “Mwalo a nyi wonago!” Wugengeli ni guti gwago, khiso si na gu dzimedzago, kholu u di ganela khu monyoni gwago, khuwe: “Eni kheni, vbavbandze gwangu, mwalo mumbe muthu.

¹¹Kholu u na dugeledwa khu libango, u na gumba liti umo litago khumo; libango leli li na gu thegela, nyamba kodza gu dzi vhikela; kholu li na gu thegela khu githugedza, li ta gu mbembisa nu si pimi gilo.

¹²Ema kharato ni wunyanga wago ni gutala nya mirendre yago, ni wuloyi wago u wu thumisidego gukhugela wumbirini wago, mwendro si na gu phasa gu dzi tshula mhangoni.

¹³Olu u garade khu gu gimbilagimbila ga vagengeli nya vangi u lomba wusingalagadzi! Va na dzi wonegise olu va gu vbanyisa vale va girago wutumbe khu sivangwa sa ndzadzini, avo va matigo magimbilelo nya dzinyeledzi ni gupima misihalo, gasi va kodze gu tivisa iso si na gu gu dugelelago khu ngima ni ngima.

¹⁴Avo va na khala kha nga mavivi nya gubange, va na tsaganiswa khu nilo. Avo kha va na dzi vbulugisa tshivbani nya malavbelavbe nya nilo; ma na bani ma siri magala nya guworwe khu muthu, ambari nilo nya gukhale vbafuvbi u wora.

¹⁵Si na girega kharato ga vale u va lombidego wusingalagadzi, u thumisanidego navo gukhugela wumbirini wago. Va na phalalega, muthu ni muthu a bela khu yaye ndzila; mwalo ni moyo a na gu vbanyisago.”