Read gitonga Isaya 50 Bible Online

Isaya 50 - gitonga bible

Isaya 50

¹PFHUMU Nungungulu a ngu ganela kharati, khuye: “Lomo hayi lidangalila nya musi li fakazago gukhilo nyi hude mayi wanu? Mwendro khu mani nyi gu na ni mangava naye, nyi mu rengisidego gwanu? Wonani gukhenu khu kotani nya sighoho sanu, khiso si mi rengisidego, gambe mayi wanu hudwe khu kotani nya sighoho sanu.

²Khu ginani avbo nyi dzudego gwanu, a ngamba manega ni moyo nya gute dzi wonegisa? Avbo nyi nga rana, mwalo a nga thana? Ina mwa gu pimisa gukhenu libogo langu li rode ngudzu nyamba kodza gu mi dzegisa, gani? Mwendro nyi mwalo gambe tshivba nya gu mi dwanele, gani? Wonani nya gukhenu khu tshivba yangu nyi ngu vbwisa yiphwa, nyi vbindrugedza mitsongo yi khala giwula, dzindzandzi dzifa, dzi nunga khu gu hamuga mati.

³Nyi ngu ambagisa ndzadzini khu gidema nyi gu fenengedza khu mwendra nya gilendra.”

⁴Mune, PFHUMU Nungungulu a nyi hevbudzide iso nyi yelago gu ganela, gasi nyi kodza gu ganela gwadi ni vale va garadego. Matshigu yatshavbo, dzimindrudzile, a ngu nyi wusa a nyi tula dzindzeve, gasi nyi yingisa kha nga vale va hevbulago.

⁵Mune, PFHUMU Nungungulu a nyi tude dzindzeve gasi nyi yingisa, aholu eni kha nya bomba; ambari gu bwelela hwane.

⁶ Nyi di ningedzela hwambo wangu ga vale va nyi vetago, nyi ningedzela khovbe yangu ga vale va nga bani va nyi kulela giledzu. Kha nya siha khovbe yangu ga vale va nga bani va gu nyi vala ni gu nyi hetshela.

⁷Kholu Mune, PFHUMU Nungungulu, a nyi phasedzede, khu guralo kha nyipwi dzitshoni, khovbe yangu yi tiyide nga giwindri, kholu nyi ngu dziti gukheni gima kha nyi na tedwa khu dzitshoni.

⁸Kholu uye a nyi vhikelago womo vbafuvbi gwangu; khu mani a na tiyago gu ema a nyi wugela? Hongoleni hi ya ema gumogo mbeli ga mulamuli; khu mani nyi mu ghohedego? A na hidzimele vbafuvbi gwangu!

⁹ Wonani nya gukhenu Mune, PFHUMU Nungungulu a na nyi phasa; khu mani a na nyi konago? Wonani nya gukhenu vatshavbo va na hagala nga mwendra wa gale, va na hodzwa khu muhwa.

¹⁰Khu mani vbakari gwanu a ningago githawo Pfhumu Nungungulu, a yingisago lito la githumi gyaye? A gu gimbila mugidemani nyambana wenengedzo, a na tumbe lina la PFHUMU Nungungulu, a na vege gitumbo gyaye ga Nungungulu waye.

¹¹Gasi enu mu khuthago nilo, ni gu wu furugedzela gasi wu khondre, mu na thegela umo nya malavbelavbe nya nilo mu wu khondrisidego mwabune, mu vbiswa khu dzitshahe nya gukhondre dzi pirigago, isoso si nata khu gu rumedwa khu gyandza gyangu, mu nafa khu tshanisa nya yikhongolo.