Read gitonga Isaya 51 Bible Online

Isaya 51 - gitonga bible

Isaya 51

¹Nyi yingiseni, enu mu vbwetago gululama, enu mu vbwetago PFHUMU Nungungulu; wonani giwindri mu kokidwego mu duswa khavbo ni phagoni mu dusidwego khumo;

² wonani babe wanu Abrahama ni Sara, a gu uye a mi velegidego; kholu khuye basi nyi mu ranidego bwelo khavbo nyi mu kategisa ni gu andrisa livelego laye.

³ Kholu PFHUMU Nungungulu a na tangadzisa Siyoni, ni gupwa gisiro khu malanga yatshavbo ma khadego marumbi; giwula gyaye, a na gi gira gi fanana ni Edheni, marumbi yaye ma fanana ni lithembwe la PFHUMU Nungungulu. Umomo gu na manega litsako ni gughiya, gu na manega gubonga ni dzindzimo nya sizimba.

⁴Nyi yingiseni, enu vathu vangu ni uwe litigo langu! Upwani esi nyi vbwetago gu mi embela: Khavbo gwangu gu na duga nayo, gululama gwangu gu na bani guri wenengedzo nya mayigo.

⁵Gulamula gwangu gomo vbafuvbi, ni guvbanyisa gwangu gu vbohide, libogo langu li na lamula mayigo; mayigo nya sidwa ma ngu nyi khedzisela ma tumba tshivba yangu.

⁶Khusedzani maho mu khedza ndzadzini, mu wona vbavbatshi nya mafu; ndzadzini gu na mwalalega kha nga wutshi, ni mafu nayo, ma na hagala gu fanana ni guambala. Avo va vbanyago umo, va nafa gu fanana ni dzitshuna; aholu guvbanyisa gwangu gu na simama kala gupindruga, ni gululama gwangu kha gu na thindrekiswa.

⁷Nyi yingiseni, enu mutigo gululama, enu vathu, myonyo yanu yi sayisago nayo wangu, mu nga thavi vale va mi poyilago, ambari guvbela tshivba va gu mi valani.

⁸Kholu avo va na hodzwa khu muhwa kha nga mwendra, va hodzwa khu siwungu kha nga mawoya; aholu gululama gwangu gu na simama kala gupindruga, ni guvbanyisa gwangu, gu na thapela mimela ni mimelana.

⁹Khendzuga! Khendzuga! Ambala tshivba yago; uwe gyandza gya PFHUMU Nungungulu. Khuga u ema u gira gu fanana ni iso u giridego matshigu ya gale, ga mimelana ya gale. Gasi khandri uwe u vetidego Egipito ni gu bayisa mwamilambo, gani?[38]

¹⁰ Ina khandri uwe u nga bangisa yiphwa, ni gu vbwisa milondrwa nya guete ngudzu, gani? Wule a nga tula ndzila khu vbakari nya yiphwa, gasi va tsemakanya vale U va tshudzisidego, gani?

¹¹ Gu na gira kharato ga vale va tshudzisidwego khu Nungungulu, va na wuya Siyoni na va gu womba mikulungwane, gutsaka gu si hegisigo gu na wonega dzikhovbeni gwawe, gunengela ni litsako si na manega vbakari gwawe, gima kha va na ngapwa gambe guvbisa ni gudilela.

¹²Eni kheni kamwe nyi na gu mi tangadzisago; gasi uwe, khuwe mani, nya gukala u thava vathu va fago va hina, mwendro sanana nya vathu si na bangago gu fanana ni mwasi?

¹³Gasi khuwe mani uwe u divalago PFHUMU Nungungulu, a gu vangidego, uye a ladzidego ndzadzini ni gu tsitsa litigo wulangani gwaye; u na simama gu thedwa hwanga matshigu yatshavbo khu likhulo la mutshanisi a gu vbweta gu gu mbembisa, gani? Gasi olu, la gu vbelela hayini likhulo la wule a nga bani a gu tshanisa?

¹⁴Gibotshwa gi guromo wugumbini gi na tshudwa nyamba hwela, kha gi na relela phalani nya vafi, ambari gu keneledwa khu guhodza.

¹⁵Kholu eni kheni PFHUMU Nungungulu wago, nyi kutsungago linene ma khusega mavimbi. Lina langu, kheni PFHUMU Nungungulu nya Tshivba Yatshavbo.

¹⁶Nyi ngu thela magana yangu kanani gwago, nyi na gu siha mutsani nya gyandza gyangu. Eni nyi na ladza ndzadzini nya guphya, ni gu tsitsa giseketelo nya litigo nya liphya, ni gu embela Siyoni, kheni: “Enu mu vathu vangu.”

¹⁷Khendzuga! Khendzuga! Khuga u ema uwe Jerusalema! Uwe u sedego khu mandzani ga PFHUMU Nungungulu gikombe nya likhulo laye. U sede gikombe gi levisago kala u vbedza ni giminya gyakone, u leva.

¹⁸Vbakari nya sanana u velegidego, mwalo ni moyo u mu yeyedzidego ndzila nya yadi, ambari ni moyo u mu pharidego khu mandza vbakari nya ava u va dandrisidego.

¹⁹Ga dzimhango dzedzi dza dzimbili dzi gu dugeledego; khu mani a gu bavbudego marongo? Gupfhungumudwa, gumbembiswa, ndzala ni gusasedwa! Khu mani mutangadzisi wago?

²⁰Sanana sago si titivade, si mbambamede mahandzakanyani nya dzindzila dzatshavbo, gu fanana ni tshesi yi modwego khu naphwi; va levide khu likhulo la PFHUMU Nungungulu, ni tsayiso wa Nungungulu wago.

²¹Khu guralo, olu upwa esi, uwe u vbisegago ni guleva, aholu na wa sa sela wadwa.

²²Mune, PFHUMU Nungungulu wago, oyu a dwanelago litigo laye, a ngu ganela kharati, khuye: “Wona nya gukhuwe nyi duside khu mandzani gwago gikombe nya likhulo langu li gu levisago, gima khu na gi sela gambe.

²³Aholu nyi na gi vega mandzani ga vatshanisi vago, avo va gu embelago, khavo: Thega, huwe labalaba, gasi hi vbindre khu vbatshani gwago; kholu hwambo wago wu namide mafuni, wu khala nga ndzila va vbindrago khavbo vathu.”