Read gitonga Isaya 52 Bible Online

Isaya 52 - gitonga bible

Isaya 52

¹ Khendzuga! Khendzuga, Siyoni, ambala tshivba yago. Ambala guambala gwago nya wumburi, uwe Jerusalema, Lidhoropa nya gukatege; kholu gima kha va na bela gambe ndrani gwago va nyamba hana wugwera ni vale va dzi nyenyezisidego.

²Khuga u ema u dzi phuphutha kudzudzwane, u khala vbagikhalotunu gwago, uwe Jerusalema. Tshula makhetshe ma guromo thamoni gwago, uwe nyamahegyane nya khumbi ya Siyoni!

³Kholu PFHUMU Nungungulu a ngu ganela kharati, khuye: “Mu rengisidwe mahala, mu na tshudziswa gambe mahala nyambana dzitsapawu.”

⁴Kholu Mune, PFHUMU Nungungulu, a ngu ganela kharati, khuye: Guhegulani vathu vangu va relede Egipito, gasi guya luvela iyoyo; gasi olu, Asiriya a va tshaniside na vari mwalo nandru.

⁵ Olu avba ginani nyi na girago? A ngu wudzisa PFHUMU Nungungulu, olu vathu vangu va modwego vbavbandze nya nandru? Avo va va fumelago va gu va hembulula, a ngu ganela PFHUMU Nungungulu; lina langu la gu vadwa khu litshigu ni litshigu.

⁶Khu guralo, vathu vangu va na liti lina langu, khu litshigu lolo, va na dziti nya gukhavo kheni nyi ganelago gukheni: “Nyi womo avba.”

⁷Edzi yi mburidego khidzo sigomoni migondro ya vale va tivisago mahungu nya yadi nya maphya, va pwadzago gurula; va tivisa silo nya sadi nya gutsakise si pwadzago guvbanyisa, oyu a embelago Siyoni, khuye: “Nungungulu wago a ngu fuma!”

⁸Upwani huwa ya vawoneleli! Vatshavbo va gu khusa lito va embelela gumogo khu lito limwedo na va tsakide; kholu va na wona khu maho yawe guwuya ga PFHUMU Nungungulu gigomoni ga Siyoni.

⁹Ghiyani mu embelela gumogo, enu marumbi ya Jerusalema; kholu PFHUMU Nungungulu tangadziside vathu vaye, a tshudzisa Jerusalema.

¹⁰PFHUMU Nungungulu funungude libogo laye nya guage mbeli ga mayigo yatshavbo; ni mahegiso nya litigo va na wona guvbanyisa ga Nungungulu wathu.

¹¹ Dugani, dugani, khugani umomo! Mu nga kuhi ni gimwegyo gilo nya gunyenyeze. Dzi agiseni, mu duga vbakari gwaye, enu mu rwadego sombo sa PFHUMU Nungungulu.

¹²Kholu kha mu na duga khu givbiredza, ambari gu khugani khu gu thava; kholu PFHUMU Nungungulu a na thanga mbeli gwanu, ni Nungungulu wa Israyeli, a na mi vhikela khu hwane gwanu.

¹³Wonani nya gukhenu, githumi gyangu gi na thuma khu mapimo, gi na dandriswa, gi zundzwa, gi khusedzwa vbatshani.

¹⁴Kha nga idzo va nga samala khidzo nya vangi mbeli gwaye, kholu khovbe yaye yi di ghohekide guvbindra dzimbe dzikhovbe dza vathu, ni giemo gyaye guvbindra simbe siemo sa vambe vathu.

¹⁵ Kharato nugo a na samadzisa mayigo nya mangi, ni vafumeli va na sega magana khu mahungu yaye; kholu iso va ngamba tiviswa va na si wona, niso va ngamba sipwa, va na si pima.