Read gitonga Isaya 55 Bible Online

Isaya 55 - gitonga bible

Isaya 55

¹ Enu mwatshavbo mu pwago lidora, deluni gibugani nya mati; ni enu mu gu mwalo dzitsapawu, deluni mu ta renga mu hodza; ina, deluni mu ta renga na muri mwalo dzitsapawu, mu na mana vbinyu ni mahwe mahala.

²Khu ginani mu luzisago dzitsapawu dzanu khu sile si gu sindri guhodza, ni lithonga lanu, khu sile si gumba phasa gilo? Tulani dzindzeve mu nyi yingisa, mu na hodza esi nya sadi, mupwa gutshamba khu guhodza nya gunone.

³ Neredzani dzindzeve mute eno gwangu; nyi yingiseni gasi mihefemulo yanu yi mana guvbanya; kholu nyi na hunga nanu gidzumeledzwano nya gupindruge, nyi mi ninga wuhigo nya gusimame owu nyi tumbisidego Dhavhidhe.

⁴Wonani gukhenu, nyi mi emisede gu khala fakazi ga va nya mayigo, muthangeli ni mwamangulu nya mayigo.

⁵Wona nya gukhuwe u na rana litigo u si litigo, ni litigo li si gutigo li nata vbafuvbi gwago, khu kotani nya lihaladzo la PFHUMU Nungungulu wago, ni la Nya guage wa Israyeli, kholu uye a gu ningide wudhumo.

⁶Vbwetani PFHUMU Nungungulu, na gu nga gu dzumela gu mu mana; mu raneni olu a guromo vbafuvbi.

⁷Muthu nya guvivbedwe khu monyo a na dige ndzila yaye nya guwegele, ni oyu nyamba lulama a na dige mipimiso yaye; a na vbindrugedze mavbanyelo a wuya ga PFHUMU Nungungulu, uye a na mu pwela gisiro, wuyani ga Nungungulu wathu, kholu tade khu wuhindzi ni gutsetselela.

⁸Kholu mipimiso yangu yi hambanide ni yanu, ambari khu dzindzila dzanu, kha dzi fanani ni dzangu; a ngu ganela PFHUMU Nungungulu.

⁹Kholu, kha nga ndzadzini gu khugegidego ngudzu guvbindra litigo, kharato nidzo dzindzila dzangu dzi khusegide guvbindra dzanu, ni mipimiso yangu, yomo vbatshani ngudzu guvbindra yanu.

¹⁰ Kholu, kha nga olu ndzadzi ni thondrwane si thegago khu ndzadzini, si si bweleligo nyamba naganisa mafu, ni gu thela thomwa, yi bugisa dzimbewu dza muyali, ni gu ninga guhodza ga oyu a hodzago,

¹¹Kharato nayo magana ma dugago khu kanani gwangu; kha ma na bwelela mahala nyamba ninga mihandro yaye, aholu ma na tadzisa guhaladza gwangu, ni gu gira iso nyi ma rumedego iso.

¹²Kholu mu na dugani na mu gu nengela mu gimbidziswa khu gurula; sigomo ni sigomwana si na womba sizimba mbeli gwanu, ni misimbo yatshavbo ya khabini yi na khwakhwatela mandza.

¹³Wulangani nya likhabi nya miba gu na buga mipinyu (ndziri), ni wulangani nya sirangalabwa gu na buga senge nya likhomwa (murita); esi si na bani siri wuzundzo ga PFHUMU Nungungulu ni gialakanyiso nya gupindruge gi na gumba divadwa gambe.