Read gitonga Isaya 58 Bible Online

Isaya 58 - gitonga bible

Isaya 58

¹Womba gimima khu lito nya gukhugege, nyamba garala! Lito lago li na dzume kha nga pundru. Thuledza nandru wa vathu vangu, ni sighoho si girwago khu sanana sa Jakobe.

²Ambari khu guralo, khu litshigu ni litshigu li gyago, va gu nyi vbweta, gambe va gu yeyedza gugola guti dzindzila dzangu; kha nga vathu va girago gululama, va ngamba diga nayo wa Nungungulu wawe, va nyi lomba gu va yeyedza ndzila nya gululame, gambe va na ni ligolo ni Nungungulu.

³Va gu ganela, khavo: Gwa gu phasa ginani gu hi hala ni gu dzi sodzisa, nari gu uwe khu theli kota khu ethu? Ni gu garadza hefemulo wathu mahala khu isoso? Aholu litshigu mu halago, mwa gu gira iso mu si golago, mu tshanisani sithumi sanu.

⁴Wonani nya gukhenu, mwa gu hala na mu gu ganedzisana ni gu dwanisana, na mu gu vetana khu sibhakela nya dzihanyi; mwa gu hala kharato, nombelo wanu kha wu na vboha ndzadzini.

⁵Ina guhala nyi gu golago, khugo ogu nya gu muthu a mana litshigu a songa hefemulo waye, a nogisa hungo waye kha nga tshava ni gu puluwundra vbavbatshi nya saku ni gu phorola nguma vbatalatunu; ina khugo ogu guhala nya gukala gu tsakisa PFHUMU Nungungulu, gani?

⁶Guhala gu nyi tsakisago, khogu: “Khu gu mu tshula makhetshe nya gigaha, mu tshula dzingodzi nya kanga nya wugumbi, mu tshule avo va tshaniswago ni gu fanyeledzela mikanga yatshavbo.

⁷ Ni gu kabana guhodza gwago ni oyu a gu mwalo gilo nya guhodze, ni gu hakha sisiwana si gu mwalo gaya, ni gu ambagisa uye a gu mwalo guambala, u nga gikheli marundra ndriyago.

⁸Wa gu gira kharalo, mwenge wago wu na wenga kha nga Wuronga, silondra sago kha si na hwela guvbola, gululama gu na thanga mbeli gwago, u na vhikedwa khu wudhumo wa PFHUMU Nungungulu.

⁹Khavbo avbo, wa gu rana PFHUMU Nungungulu, a na gu hakha; wa gu khusa lito u lomba guphaswa, Uye a na hakha, khuye: Nyi womo avba! Isoso si na kodzega basi mwa gu tshulani mikanga mu gu nayo, ni gu diga gu sungedza muthu khu nyala ni gu ganela silo nya malipha

¹⁰wa gu kabana silo sago ni oyu apwago ndzala, ni gu khurisa uye a vbisegago, khavbo mwenge wago wu na dzurago mugidemani, gu khala safa nga vbakari nya mihani.

¹¹PFHUMU Nungungulu a na gu thangela gikhati gyatshavbo, malangani nya gihala gu na ninga iso u si vbwetago, ni gu tiyisa marambo yago; u khala kha nga lithembwe nya senge li theledzedwago mati, ni gifefe nya mati ma gumba vbela.

¹²Sanana sago si na wusedza malanga ma khadego gikhati nya gulaphe nari marumbi; u vbahedza siseketelo sa galegaleyo, va na gu rana gupwani u muwusi nya malufa nya marumbi, ni mululamedzi nya dzindzila, gasi vathu va vbaha dzinyumba.”

¹³Wa gu dzi vegisa u si nyenyezisi Sabhadho, u si thumi iso si godwago khu monyo wago khu litshigu langu nya guage, litshigu nya Sabhadho u li rana nari litshigu nya gutsake li phasedwego PFHUMU Nungungulu, li yelago gu zundzwa; wa gu li rungudza u si yi umo u gu golago, u si vbweti gu gira iso uwe u si golago, ambari gu ganela silo nya guvivbe,

¹⁴ khu guralo, u na mana gutsaka ga PFHUMU Nungungulu, nyi na gu khadzisa vbatshani nya sigomo u zundzega, nyi gu gira u khala gihodzathomba ya babe wago Jakobe; kholu PFHUMU Nungungulu a ganede khu likana laye.