Read gitonga Isaya 6 Bible Online

Isaya 6 - gitonga bible

Isaya 6

¹ Khu mwaga a fudego khuwo mufumeli Uziya, nyi wonide Pfhumu na khade vbagikhalotunu nya gikhongolo nya wufumu nya gukhugege, guambala gwaye gu di fenengedza Nyumba nya Miphaso.

²Vbatshani gwaye gu di emide dziserafini; mweyo ni mweyo nya idzo, yi diri ni livbandre na limwedo mambapi; mambapi mavili ma di fenengedza khovbe, mambe mavili ma di fenengedza mawundru, dzi vbuvba khu mambapi mavili.

³ Mweyo ni mweyo, yi di khusa lito yi ganela ga dzimbe, khiyo: “Agide, Agide, Agide PFHUMU Nungungulu nya Tshivba Yatshavbo, mafuni gwatshavbo gu tade khu wudhumo waye.”

⁴ Lito la avo va nga bani na va gu huwelela li di kutsunga mihasimo nya lidimba, Nyumbani gwa Nungungulu gu di tala khu wutshi.

⁵Khavbo avbo, nyi di ganela, kheni: “Libango langu! Nyi fude! Kholu nyi muthu nya likana nya gunyenyeze, nyi vbanyago vbakari ga vathu nya gunyenyeze, maho yangu ma wonide Mufumeli, Pfhumu Nungungulu nya Tshivba Yatshavbo!”

⁶Khavbo avbo, serafini mweyo yi di vbuvba yi nyi tela; na yi pharide ligala nya nilo mandzani, yi nga vbalago khu gipharo vbagiluvelotunu.

⁷Yi di nyi pfodza likana khu ligala, yi nyi embela, khiyo: “Wona nya gukhuwe nyi khuhide sihofu sago; sighoho sago si handzidwe, sihoso sago si ditshedzidwe.”

⁸Khu hwane nya ugo, nyi dipwa lito la Pfhumu, li nga nyi embela, khilo: “Nyi na ruma mani, khu mani a na hongolago khu lina lathu?” Eni nyi di hakha, kheni: “Nyi womo avba. Nyi rume.”

⁹Khavbo avbo, Uye a di nyi embela, khuye: “Gimbila u ya embela vathu vovo, khuwe: Mu na pwa khu dzindzeve dzanu, aholu kha mu na si pima; mu na khedza khu maho yanu, aholu kha mu na wona gilo.”

¹⁰ Bangisa myonyo ya vathu vava, u va sega dzindzeve ni maho yawe, gasi va sipwi khu dzindzeve dzawe, va si woni khu maho yawe, va si pimisi khu monyo wawe, gasi va vbindrugedza mavbanyelo nyi va vbanyisa.

¹¹Khavbo avbo, nyi di mu wudzisa, kheni: “Kala lini, Pfhumu yangu?” Uye a di nyi phindrula, khuye: “Kala madhoropa ma khala marumbi, dzinyumba dzi khala nyambana vathu, ni litigo latshavbo li vbindrugedza li khala giwula.

¹²Kala PFHUMU Nungungulu a tutumise vathu vaya hwindzo nya lidhoropa, tigoni gwatshavbo gu khala nyambana muthu.

¹³Aholu, gwa gu bani gu na tshade gipandre nya likhumi nya vathu va tigoni, gu na simama gu pfhungumudwa; gu fanana ni simbo nya munga ni nvula, ambari wa gu wu koka gu tshala gihuru, uwo wa gu thunga, kharato nugo ga mathungedwa yoyo, gu na dandra nyaluphye vathu va Nungungulu.”