Read gitonga Isaya 60 Bible Online

Isaya 60 - gitonga bible

Isaya 60

¹Jerusalema, khuga u ema u ngangamela, kholu, wenengedzo wago wu vbohide! Wudhumo wa PFHUMU Nungungulu wu ngu wenengedza vbatshani gwago.

²Wona gidema nya guthise gi fenengedzide litigo ni wutshigu wu fenengedzide mahundzu nya vathu; aholu vbatshani, wu ngu wonega wenengedzo wa PFHUMU Nungungulu, ni wudhumo waye wu ngu ngangamela avbo gwago.

³ Mayigo ma na mana wenengedzo wago, ni vafumeli va na wona gungangamela nya wuronga wago.

⁴Khusa maho u khedzisa maphuvbo yatshavbo; vathu vatshavbo vava va ngu tombana vata avbo gwago; sanana sago si nata khu hwindzo, esi nya sagadzyana si na wuya na si wugaredwe mawogoni.

⁵Avbo u na si wonago u na nengela, monyo wago wu na ghavata khu gunengela, kholu va na resa gwago dzithomba dza sidwani, u na resedwa ni dzithomba nya mayigo.

⁶Dzingameriya nyambana tengo, dzi na fenengedza litigo lago, ni marole nya dzingameriya dza Medhiyani ni Efa. Va nata vatshavbo khu Sabha, na va rwade ndralama ni libani, na va gu embelela wudhumo wa PFHUMU Nungungulu.

⁷Mitshambi yatshavbo nya dzinvuta dza Kedhari, yi nata tombana avbo gwago. Dzihamba dzatshavbo dza Nebhayoti, dzi na gu lumba; dzi na khala ningelo nya gutsakise vbagiluvelotunu gwangu. Eni nyi na mburisa wugulu nya Nyumba yangu nya miphaso.

⁸Khu vamani ava vatago na va gu vbuvba gukhwatshi mapfhi, na va gu vbuvba kha nga sipomba si bwelelego sihagani gwawe?

⁹Khu lisine, mayigo ya sidwani ma na nyi lirela; guhegula ma nata mataro ya Tarisisi, ma resa sanana sago khu hwindzo, avo va na resa gumogo parata ni ndralama, nya guphasele lina la PFHUMU Nungungulu wago, ni Oyu nya Gukatege wa Israyeli, kholu uye a gu khusedzide.

¹⁰ Va nya mayigo va na vbahedza makhokhola yago, ni vafumeli vawe va na gu thumela, kholu nyi gu tsayiside khu likhulo langu, aholu khu wuhigo wangu, nyi gu pwede wuhindzi.

¹¹ Malimba yago ma na khala na ma tudwe gikhati gyatshavbo, wutshigu ni mihani ma na khala nyamba segwa, gasi va gu resele dzithomba nya mayigo, na va gu vbwelegedzwa khu vafumeli vawe.

¹²Kholu litigo ni mufumo va na gumba gu thumela, va nafa; mayigo yoyo ma na pfhungumudwa hayo bhi.

¹³U na ningwa thomba ya Libhanoni; misimbo nya mipinyu, misena ni misiringa, gasi guta mburisa wulanga wangu nya miphaso, nyi dhumisa wulanga yi gandredzelago avbo migondro yangu.

¹⁴ Sanana sa vatshanisi vago, si nata noga migondroni gwago; ni vale va nga bani va gu hembulula, va nata khidzima migondroni gwago; va na gu rana khavo u “Lidhoropa la PFHUMU Nungungulu,” “Siyoni wa Uye a Kategidego wa Israyeli.”

¹⁵Ambari u nga bani u digidwe ni gu nyenywa, avbo nya gu, ni moyo a si vbindri khavbo gwago, aholu eni nyi na gu vbindrugedza u khala wuzundzo ni gunengela ga mimelana yatshavbo yi nga gutago.

¹⁶U na sela mahwe ya va nya mayigo, u hodza thomba ya vafumeli. Khavbo avbo, u na dziti nya gukhuwe eni kheni PFHUMU Nungungulu, kheni Muvbanyisi ni Mudzegisi wago, nya Dzitshivbe wa Jakobe.

¹⁷Wulangani nya sugu, nyi na gu resela gambe ndralama; wulangani nya dzisimbi, nyi gu resela parata; wulangani nya mapulango, nyi na gu resela sugu, ni wulangani nya siwindri nyi na gu resela simbi. Nyi na gu resela gurula, gu khala mufumeli wago, ni gululama, gu khala mukhedziseli vago.

¹⁸Kha gu na pwala gambe gu ganedwa khu dzihanyi tigoni gwago, khu vaphangi mwendro vapfhungumuli, mivbinganoni gwago. “U na rana mabhiyo yago khuwe “Guvbanyisa” ni dzinyangwa dzago khuwe “Rungudzo.”

¹⁹ Lidambo kha li na khala gambe wenengedzo wago wa vbamihanitunu, ambari gu wengwa khu ngima, kholu PFHUMU Nungungulu a na bani ari uye wenengedzo wago kala gupindruga, Nungungulu wago a na bani ari uye wudhumo wago.

²⁰Lidambo lago gima kha li na nga pfola, ni ngima nuwo kha wu na pfola, kholu uye Mune PFHUMU Nungungulu a na bani ari uye wenengedzo wago, kala gupindruga, ni matshigu yago nya gililo ma na vbela.

²¹Vathu vatshavbo va tigoni gwago va na bani vari vathu nya gululame, va na lumbwa khu litigo kala gupindruga; avo va na bani vari pfhundre nyi wu yadego, thumo nya mandza yangu gasi va fela gu wonegisa wudhumo wangu.

²²Lipango nya lidugwana, li na andra kala likhumi mazana (1.000), ni eli nya ligwana ngudzu, li na khala litigo nya tshivba. Eni kheni PFHUMU Nungungulu; khu gikhati givbwetegago nyi na gira satshavbo sesi si tadzisega khu guvbiredza.