Read gitonga Isaya 63 Bible Online

Isaya 63 - gitonga bible

Isaya 63

¹Khu mani muthu yoyu atago khu dhoropani ga Bhozira, tsindza wa Edhomi, na ambade dzingandzu nya gufuvile? Oyu a ambadego dzingandzu nya wuzundzo a gimbilago na tade khu tshivba yaye nya yikhongolo? Kheni oyu nyi ganelago khu gululama, na nyiri ni tshivba nya guvbanyise.

² Khu ginani dzingandzu dzago dzi fuvidego dzi fanana ni dza muthu a gamago dziuvha gikhwatini, na?

³ Nyi gamede na nyiri nyenga mugighowoloni, mwalo ni moyo wa vbakari nya mayigo a nga nyi phasago, nyi va gandride na nyi vbisegide, nyi va gama na nyi tade khu likhulo; novba wawe wu di mitegedzela dzingandzu dzangu, nyi nyenyezisa dzingandzu dzangu dzatshavbo.

⁴Kholu litshigu nya gu dzi phodzele li diri monyoni gwangu, ni mwaga nya gu dzegise vathu vangu, wu di vbohide.

⁵ Nyi di khedza, aholu kha nya wona ni moyo nya gu nyi phasedzele; nyi di samala khu gumba wona ni moyo nya gu nyi seketele; khu guralo, nyi di thuma khu tshivba nya libogo langu, nyi seketedwa khu likhulo langu.

⁶ Khu kotani nya likhulo langu, nyi di gandredzela mayigo nyi va levisa, nyi vbaladza novba wawe mafuni.

⁷Nyi na ganela khu wuwadi wa PFHUMU Nungungulu, ni mithumo ya yingi, nya rungudzo, gukhedza khu satshavbo Pfhumu Nungungulu a hi ningidego, ni wuwadi waye nya wukhongolo a girago khu nyumba ya Israyeli, owu a va giredego ni ligolo laye latshavbo a va ningidego khu lihaladzo, gukhedza khu talo nya wuwadi waye.

⁸Kholu Pfhumu a di ganela, khuye: “Khu lisine, avo vathu vangu, sanana sangu si na gumba nyi kanganyisa. Khu guralo, uye khade Muvbanyisi wawe.”

⁹Gutshanisekani gwawe gwatshavbo, uye a di tshaniseka gumogo navo, Ngilozi yi guromo mbeli gwaye, yi di va vbulugisa; a di va dzegisa khu lihaladzo ni gu va pwela gisiro, a va dzega, a va hetedza gukhugela matshiguni yawe yatshavbo ma vbindridego.

¹⁰ Aholu avo va di mu yeyisa va swihadza Liphuvbo laye nya Guage; khu guralo, uye a di dzi gira nala wawe, uye kamwe a di dwana navo.

¹¹Avbo va nga dundrugago matshigu ya gale, ya Mosi, ni ya vathu vaye, va di ganela, khavo: Womo hayi wule a nga hi vbindrisa khu vbakari nya yiphwa ni vahavisi nya tshambi waye? Womo hayi wule a nga thelago vbakari gwawe Liphuvbo laye nya Guage,

¹² wule libogo laye nya wudhumo a va giridego va gimbila khu libogo la nyamudye la Mosi? A nga kabanisago mati khu vbakari mbeli gwawe, gasi gu dzi girela lina nya gupindruge, gani?

¹³Khuye a va giridego va tsemakanya mati nya guete, gu fanana ni kavalu yi gimbilago giwulani, gasi va si tshunganeli gambe!

¹⁴Gukhwatshi girengo gi relelago kovani, Liphuvbo la PFHUMU Nungungulu li di va ninga guhefemula. U di gimbidzisa kharato, vathu vago, gasi gu dzi girela lina nya wuzundzo.

¹⁵Khedza khu vbatshani yoyo ndzadzini, u wona khu nyumbani gwago nya guage ni wudhumo. Gomo hayi gukhathalela gwago ni mithumo yago nya tshivba? Wuwadi wa monyoni gwago ni wuhindzi wago, khu si giri gambe avbo gwathu!

¹⁶Aholu uwe khuwe Babe wathu, ambari Abrahama na si hiti, ni Jakobe a si khathali khu ethu; Uwe PFHUMU Nungungulu, khuwe Babe wathu; U Mudzegisi wathu, gukhugela guhegulani, khilo lina lago ilolo.

¹⁷Khu ginani uwe PFHUMU Nungungulu, u hi digago hi ndreya ndzilani gwago? Khu ginani u hi digago hi bangisa myonyo yathu hi si gu ningi githawo? Wuya, khu kotani nya lihaladzo nya sithumi sago, ni ga mahundzu a gu thomba yago.

¹⁸Khu gikhati gidugwana, vathu vago nya gukatege va dzegide litigo va li fumela; valala vathu va gandredzede nyumba yago nya guage.

¹⁹Hi khade kha nga vale va gu gima u si va fumeli, ni vale va gu gima va si gu ranwi khu lina lago.