Read gitonga Isaya 9 Bible Online

Isaya 9 - gitonga bible

Isaya 9

¹Aholu vathu va randredwego khu sigaradzo, gima kha va na wona gambe gidema. Ga matshigu ma vbindridego, Nungungulu thede dzitshoni litigo la Zebhuloni ni la Nafitali;[16] aholu guhegisani, a na zundza ndzila ya phwani, khisikheyi nya tsongo wa Joridhani, ni Galileya wa va nya mayigo.

² Vathu va nga bani va gimbila gidemani va wonide wenengedzo nya wukhongolo, ni avo va nga bani va vbanyela mutsani nya lufu, wu wonegide gwawe wenengedzo.

³U andriside vathu vava, u engedzela gutsaka gwawe; va ngu nengela mbeli gwago, kha nga vale va tsakago guvbwerani, ni vale va kabanago silo va phangidego nyimbitunu.

⁴Kholu u fanyide kanga wu nga bani wu gu va lemela, ni lipitso li nga bani li va bayisa magata, ni ndronga ya mutshanisi wawe, u si fanyeledzede gukhwatshi wa gu fanya tshivba ya Vamedhiyani.

⁵Kholu silato satshavbo masotshwa ma nga bani ma hongola khiso nyimbitunu, ni guambala gwatshavbo gu naganidego khu novba, si na vbiswa, si na khala nga dzikhuni niloni.

⁶Kholu hi velegedwe gyanana, hi ningidwe gyanana nya gikhwathana; wufumu womo magatani gwaye; ni lina laye li na ranwa pwani: “Singalagadzi nya Guliwugise, Nungungulu nya Tshivba, Babe nya Gupindruge, Pfhumu nya Gurule.”

⁷ Gasi wufumu waye nya gurule wu engedzelane kala gupindruga, vbagikhalotunu nya wufumu wa Dhavhidhe ni mufumo waye, a wu tiyisa ni gu wu seketela khu nongameto ni gululama, gukhugela olu kala gupindruga. Khathalelo waPFHUMU Nungungulu nya Tshivba Yatshavbo wu na gira isoso.

⁸Pfhumu a di rumela magana yaye mayelano khu gutsayiswa ga va na Jakobe, ma ya thegela vbatshani ga Israyeli.

⁹Vathu vava vatshavbo va na mati, Efrayimi gumogo ni vavbanyi va Samariya, avo va ganelago khu matshandza ni gu dzi khusedza, khavo:

¹⁰“Si thegide sitini, aholu hi na vbahedza khu siwindri nya guvatwe; yi piledwe mivbesu, aholu hi na yi tshikedza khu madingo nya misena.”

¹¹Khu guralo, PFHUMU Nungungulu a na va wusela valala va Rezimi guta va dhumela, a wusa ni valala vaye khu gumogo basi.

¹²Vaasiriya khu Khugadambo, ni Vafilisitiya khu Pfoladambo; va di hama likana va midza Israyeli. Ambari khu guralo, likhulo laye kha la bosa gilo, ni libogo laye li nga thawulugide.

¹³Aholu, vathu vava kha va bwelela ga wule a nga va vetago, ambari gu vbweta PFHUMU Nungungulu nya Tshivba Yatshavbo.

¹⁴Khu guralo, PFHUMU Nungungulu a na pila hungo ni ngila va na Israyeli, a pila litamo nya ngindru ni tshava khu litshigu limwedo.

¹⁵Hungo khu madhota ni vale nya guthavisege, muprofeti a va hevbudzago malipha, khuye a gu ngila.

¹⁶Kholu vathangeli nya vathu vava va kanganyisi, ni avo va thangedwago khavo, va na mbembiswa.

¹⁷Khu guralo, Pfhumu kha na nengedziswa khu madzaha yawe, ambari gu pwela gisiro dzikhulungu ni dzinoni dzawe, kholu vatshavbo vakanganyisi ni sighohi, magana yawe yatshavbo ma gu ganela wupumbu. Khu satshavbo sesi, likhulo laye kha li bosi, ni libogo laye li nga thawulugide.

¹⁸Kholu guvivba gwa gu vbisa nga nilo, wu vbisago sirangalabwa ni miba, wu vbisa ni magabi nya gukhume, gasi wutshi wu gwela vbatshani nga mapfhi.

¹⁹Khu kotani nya likhulo la PFHUMU Nungungulu nya Tshivba Yatshavbo, litigo li dagarede, ni vathu va gu gira gukhwatshi dzikhuni dzi vbyago niloni, mwalo a tsetsago ndriyaye.

²⁰Va gu pila gitsuwu khu nyamudye, va gu simama gupwa ndzala, va gu hodza khu nyambade, aholu va gupwa ndzala; muthu ni muthu a gu hodza nyama ya muthu kwawe.

²¹Manasi a ngu dhumela Efrayimi, Efrayimi nuye a ngu dhumela Manasi; khu wuvili wawe va gu wugela Judha. Ambari khu guralo, likhulo laye kha li bosi gilo, ni libogo laye li nga thawulugide.