Read gitonga Levhi 11 Bible Online

Levhi 11 - gitonga bible

Levhi 11

¹PFHUMU Nungungulu a di embela Mosi ni Aroni, khuye:

²Ganela kharati ga sanana sa Israyeli, khuwe: “Esi khu sirengo mu yelago gu si hodza vbakari nya sirengo satshavbo si vbanyago mafuni:”

³Mu ngu dzi kodzani gu hodza sirengo satshavbo si gu na ni ngondro nya sitsendro sivili, si havago mwasi, si bhisela, si tsagudza nyaluphye.

⁴Aholu, mu nga hodzi esi si bhiselago si tsagudza nyaluphye basi, aholu siri mwalo ngondro nya sitsendro sivili mwendro esi si gu na ni ngondro nya sitsendro sivili aholu si si bhiseligo si wuya khavbo si tsagudzela gambe. Iso nya nga esi, si woneni kha nga sirengo si nyenyezidego, nya nga ngameriya yi bhiselago yi wuya yi tsagudzela, aholu yi gu mwalo ngondro nya sitsendro sivili;

⁵khidzosaye ni tshengwe, iyo niyo yi ngu bhisela yi wuya yi tsagudzela, aholu yi mwalo ngondro nya sitsendro sivili, esi mu ngu loledziswa gu hodza.

⁶Gihulo nigyo ambari gi tsagudzelago, aholu giri mwalo ngondro nya sitsendro sivili, mu ngu loledziswa gu hodza.

⁷Khumba yi na ni sitsendro sivili, aholu kha yi bhiseli yi wuya yi tsagudzela, mu ngu loledziswa gu yi hodza.

⁸“Mu nga hodzi nyama nya sirengo sesi ambari gu kuha basi sirumbi sakone, avbo gwanu si ngu loledziswa.”

⁹Ga sirengo satshavbo si vbanyago matini, mu ngu dzi kodza gu hodza esi: Ni gevbini gi gu na ni dziphesa ni magwaru na gi gu vbanya matini nya yiphwa mwendro nya tsongo, mu ngu dzi kodza gu hodza.

¹⁰Aholu satshavbo esi si gu mwalo dziphesa ni magwaru, sa phwani mwendro sa mitsongoni, satshavbo si vbanyago matini, si khwirirago khu lididi, esi si ngu loledziswa avbo gwanu.

¹¹Khu guralo si woneni kha nga silo si nyenyezidego gwanu; mu nga hodzi nyama yakone, gambe wonani sirumbi sakone kha nga ndzilo nya gunyenyeze.

¹²Ni gevbini girengo gya matini gi gu mwalo dziphesa ni magwaru, gi lolede avbo gwanu.

¹³Vbakari nya sinyoni, esi si loledego gu si hodza, kholu si nyenyezide, khesi: Lighama ni likoti, ni ligwilili;

¹⁴sivaga ni vanyamatate nya mafumbu yatshavbo;

¹⁵mafumbu yatshavbo nya vamahigonganye;

¹⁶mbowa, gisungurukhuru, nyamangondrongondrwane ni ligodzyana ni mafumbu yatshavbo nya sivaga;

¹⁷Lipfhuguli, ghotswe ni gigurwane;

¹⁸lighumbu, litembe ni ngungwa;

¹⁹munyangane ni khalahonyi, ni sinyoni satshavbo nya gulaphe mawundru si gimbilago matini, muriyane, ni likhoha.

²⁰Sirengwanana satshavbo si vbuvbago na siri ni migondro mina, si lolede gwanu.

²¹Aholu vbakari nya sirengwanana si vbuvbago na siri ni migondro mina, mu ngu dzi kodza gu hodza esi si gu ni mawundru nya gu ndrage khayo mafuni.

²²Khu magirelo yoyo, mu ngu dzi kodza gu hodza esi: Mafumbu yatshavbo nya mbera, ni humbi, ni dzinyendze khu mafumbu nya guhambanelane.

²³Aholu, satshavbo simbe sirengwanana si vbuvbago, si gimbilago khu migondro mina, si ngu loledziswa avbo gwanu.

²⁴Sirengo sesi, si ngu dzi kodza gu mi nyenyezisa; ni wevbini a na kuhago sirumbi sakone a na nyenyeza nuye kala gupfolani nya lidambo.

²⁵Ni oyu a rwalago sirumbi sakone fanede guhandza dzingandzu dzaye, gambe a na nyenyeza kala gupfolani nya lidambo.

²⁶Sirengo satshavbo nya mawundru mana nyamba kabanega khu sitsendro sivili, mwendro esi nyamba bhisela si wuya si tsagudzela, isoso satshavbo si ngu loledziswa avbo gwanu. Oyu a si kuhago, a na nyenyeza kala gupfolani nya lidambo.

²⁷Satshavbo sirengo nya mawundru mana si gu mwalo sitsendro migondroni, si ngu loledziswa avbo gwanu; ni wevbini a na kuhago sirumbi sakone, a ngu nyenyeza kala gupfolani nya lidambo.

²⁸Oyu a rwalago sirumbi sakone fanede gu handza dzingandzu dzaye, a na nyenyeza kala gupfolani nya lidambo. Esi sirengo nya gulolele avbo gwanu.

²⁹Ga satshavbo sirengwanana si khwirirago khu lididi mafuni, esi si loledzisidwego avbo gwanu, khesi: Tshukunyane, mendre, kwase khu mafumbu yaye yatshavbo, mavbele;

³⁰nyapfhakhandre, ngona, nyawondrwe ni givarara.

³¹Vbakari nya sivangwa satshavbo si dzi khuthago mafuni, khiso mu fanelago gu si pima gukhenu si nyenyezide, uye a kuhago sirumbi sakone, a na bani a nyenyezide kala gupfolani nya lidambo.

³²Ni gevbini girengo nya nga egi gya gufa gi thegela gyomboni, gyombo gyogyo gi na nyenyeza: Sombo nya guvatwe khu simbo, guambala, malowo, dzisaku, ni sombo satshavbo esi si thumiswago, si na nyenyeza kala gupfolani nya lidambo. Khu guralo si fanede gu handzwa; khavbo si na agiswago.

³³Girengo nya nga esi, gya gu thegela gyomboni nya libumba, silo satshavbo si guromo gyomboni momo, si na nyenyeza; u na pandra gyombo gyogyo.

³⁴Guhodza gwatshavbo gu na nyenyeza gwa gu kuhwa khu mati ma guromo gyomboni momo. Wadwa watshavbo wu kuhwago khu mati yoyo wu na nyenyeza, ambari na wuri gyomboni nya gu wani; wu ngu loledziswa.

³⁵Gyombo gyatshavbo gya gu thegedwa khu sirumbi nya sirengo soso, gi na nyenyeziswa; ambari nari gikho mwendro gidhingiselo, si na khungumuledwe, kholu si nyenyezide avbo gwanu.

³⁶Aholu gifefe mwendro nambo wu gu ni mati nya mangi, wu na simama na wu agide; ambari ulo uye a kuhago girumbi nya esi si fudego a na nyenyeza.

³⁷Sirumbi nya sirengo sesi sa gu thegela vbambewutunu yi dongisedwego guya yadwa, mbewu yi na simama na yi agide;

³⁸aholu mbewu ya gu bani na yi lovegidwe yi ta thegedwa khu sirumbi sesi, mbewu yoyo yi nyenyezide gwanu.

³⁹Gya gufa girengo nya esi mu dzumedziswago guhodza, oyu a kuhago girumbi gyakone, a na lolela kala gupfolani nya lidambo.

⁴⁰Oyu a hodzago nyama nya girengo gi ngafago gyabune, gu vbwetega a handza dzingandzu dzaye, gambe a na lolela kala gupfolani nya lidambo. Ni oyu a na rolago girumbi gyakone, fanede gu handza dzingandzu dzaye, a nyenyeza kala gupfolani nya lidambo.

⁴¹Sirengo satshavbo si ndrindrandrindrago khu lididi mafuni si nyenyezide; si lolede mu nga hodzi.

⁴²Sirengo satshavbo si khwirirago khu lididi, ni esi si gimbilago khu mawundru mana, mwendro esi si gimbilago khu mawundru nya gutale, mu ngu loledziswa gu hodza, kholu si nyenyezide.

⁴³Mu nga dzi nyenyezisi mwabune khu kotani nya sirengo soso nya gukhwirire si gimbilago mafuni. Mu nga dzi nyenyezisi khu gu si kuha, gasi mu si nyenyeziswi khiso.

⁴⁴ Eni kheni PFHUMU Nungungulu wanu, Eni nyi na mi agisa mu simama na mu agide, kholu Eni nyi agide; mu nga dzi nyenyezisini mwabune khu kotani nya sirengo satshavbo soso nya gukhwirire si gimbilago mafuni.

⁴⁵Eni kheni PFHUMU Nungungulu nyi nga mi dusa tigoni ga Egipito, gasi nyi khala Nungungulu wanu. Khu guralo, mu na agani kholu Eni nyi agide.

⁴⁶Oyu nayo wu vegidwego na wu ganela khu mahungu nya sirengo nya mawundru mana, ni sinyoni satshavbo, ni satshavbo sirengo nya guvbanye si gimbilago matini ni satshavbo esi si khwirirago mafuni.

⁴⁷“Wu vegidwe gasi mu kodza gu hambanisa esi si nyenyezidego ni esi si agidego, sirengo si hodzwago ni esi si si hodzwigo.”