Read gitonga Levhi 12 Bible Online

Levhi 12 - gitonga bible

Levhi 12

¹PFHUMU Nungungulu a di ganela gambe ga Mosi, khuye:

²“Ganela ga sanana sa Israyeli u si embela, khuwe: Nyamayi a gu khura mimba a gu velega gyanana nya gikhwathana, a na lolela livbandre na mavili matshigu, a na lolela[24] idzosaye gukhwatshi khu matshigu a wonago migima yaye.

³ Khu litshigu nya livbandre na mararu, gyanana gi na haniswa wugwera.

⁴Nyamayi a na virela mambe magumararu na mararu matshigu nya wungozwa waye gasi gu agiswa novba waye. A nga kuhi gilo nya esi si agidego, gambe a nga beli wulangani nya guage kala a gu vbedza matshigu nya guagiswe gwaye.

⁵A gu velega gyanana nya gyagadzyana, a na lolela dzisemana dzimbili, gukhwatshi khu matshigu a wonago migima yaye; a na virela mambe livbandre na limwedo magumi ni livbandre na limwedo matshigu nya wungozwa gasi gu agiswa novba waye.

⁶Gikhati a enedzago matshigu nya guagiswe gwaye, gani gikhwathana ambari nari gyagadzyana, a nata bikela ga muphasi nya mhamba, nyangwatunu nya Tshatsha nya Tshangano, nvuta nya mwaga moyo, gasi gu gira phaso nya guvbiswe, ni gifondro nya lituva a gira phaso nya gughohe.

⁷Muphasi nya mhamba a na si ningela mbeli ga PFHUMU Nungungulu, a mu girela nayo nya phaso nya gulivbe nandru; khavbo avbo, nyamayi a na agiswa novba a dusidego umo nya wungozwa waye. Owu khu nayo ga nyamayi a velegago gyanana nya gikhwathana mwendro gyagadzyana.

⁸ Aholu a gu hamuga nvuta, a ngu dzi kodza gu bikela sifondro sivili nya matuva. Gifondro gimwegyo nya phaso nya guvbiswe, ni gimbe nya gughohe. Muphasi nya mhamba, a na mu girela nayo nya phaso nya gulivbe nandru, khavbo avbo a na agiswa.”