Read gitonga Levhi 13 Bible Online

Levhi 13 - gitonga bible

Levhi 13

¹PFHUMU Nungungulu a di embela Mosi ni Aroni, khuye:

²“Muthu a gu wona avbo nya tshonge nya mili waye gusimba, gilondra, mwendro sirandzi si nonedza gukhwatshi a gu bedwa khu madwali nya sokono,[25] gu vbwetega aya dzi nonedza ga muphasi nya mhamba Aroni, mwendro ga moyo nya muphasi nya mhamba nya gyanana gya Aroni.”

³Muphasi nya mhamba a na khedzisa gwadi wulanga nya gilondra: A gu wona gukhuye mafefeleti nya wulanga wowo ma vbindrugedzide ma kwalala, ni gukhuye wulanga wowo wu etide gu khala liphala, gu nonedza gupwani madwali nya sokono. Khu guralo, muphasi nya mhamba a na mu khedzago, a gu wona nari kharato, a na tivisa gukhuye mudwali kha aga.

⁴A gu wona gibalavandza nya guage milini gwaye, aholu wulanga nya gilondra gu si wonegi gueta vbavbatshi nya tshonge, mafefeleti ma sa vbindrugedza ma kwalala, muphasi nya mhamba a na khothela mudwali gipimo nya livbandre na mavili matshigu.

⁵Khu litshigu nya livbandre na mavili, muphasi nya mhamba a na mu khedzisa nyaluphye: A gu wona gukhuye gilondra gi emide, kha gya engedzela gu dandra milini, a na mu khothela gambe mambe livbandre na mavili matshigu.

⁶Khu litshigu nya livbandre na mavili a na mu khedzisa gambe: A gu wona gukhuye gilondra gi vbungugide kha gya engedzela gu dandra milini gwaye, muphasi nya mhamba a na tivisa gukhuye mudwali agide, kholu wuhaga basi a gu nawo. Muthu yoyo a na handza dzingandzu dzaye a khala muthu a agidego.

⁷Hwane nya gu bani a dzi wonegiside ga muphasi nya mhamba, a embedwa gupwani agide, girandzi gya gu dandra gi thaphela mambe malanga nya tshonge yaye, fanede guya dzi wonegisa nyaluphye ga muphasi nya mhamba.

⁸Khavbo avbo, muphasi nya mhamba a gu wona gukhuye madwali ma engedzelane gudandra ma ya mbeli, a na tivisa gukhuye mudwali kha aga: A na ni sokono.

⁹Muthu a gu bani ari ni madwali nya sokono a na yiswa ga muphasi nya mhamba.

¹⁰Uye a na mu khedzisa: A gu wonega nari ni gilondra milini gwaye, gi simbidego gi wuya gi polega, gi kwalalegisa ni mafefeleti wulanga wowo, khu vbakari nya gilondra gu wonega nyama nya gufuvile,

¹¹iyoyo sokono yi mu beledego milini gwaye; khavbo avbo, muphasi nya mhamba a na tivisa gukhuye mudwali kha aga; kha na mu segela, kholu gu dzegede gu wonega gwadi gupwani kha aga.

¹²Aholu madwali nya sokono ma gu simama ma engedzela gu thaphela milini gukhugela hungoni kala mawundruni, ni malangani gwatshavbo omu muphasi nya mhamba a gu kodzago gu vboha khu maho yaye,

¹³a na mu khedzisa, sokono ya gu bani yi thaphede givili gyatshavbo, a na tivisa gukhuye mudwali agide.

¹⁴Aholu litshigu gu wonegago nyama nya gufuvile, a na tivisa gukhuye kha aga.

¹⁵Muphasi nya mhamba a na khedzisa gwadi nyama nya gufuvile a tivisa gukhuye mudwali kha aga. Nyama nya gufuvile kha ya aga: Sokono.

¹⁶Aholu nyama nya gufuvile ya guvbindrugedza yi aga, mudwali a na wuya ga muphasi nya mhamba.

¹⁷Khavbo avbo, muphasi nya mhamba a na mu khedzisa, a gu wona gukhuye gilondra gi vbindrugedzide gi aga, a na tivisa gukhuye mudwali agide; khu kharato, a na bani a agide.

¹⁸Muthu a gu wonega nari ni gibalavandza nya gilondra gi vbodego milini gwaye,

¹⁹aholu wulanga wa wumowo wuta wonega gu simba ni tshonge nya gufuvile, muthu yoyo a na dzi bikela ga muphasi nya mhamba afela gu khedziswa.

²⁰Muphasi nya mhamba a gu mu khedzisa a wona gukhuye gilondra gi khade liphala vbavbatshi nya tshonge, ni gukhuye mafefeleti ya wulanga wowo ma vbindrugedzide ma kwalala, a na tivisa gukhuye muthu yoyo kha aga. Madwali nya sokono ma dugago khavba gu nga bani guri ni gilondra.

²¹Aholu muphasi nya mhamba a gu khedzisa gilondra a si woni mafefeleti nya gukwalale, ni gilondra gu khala liphala, aholu a gi wona na gi agide vbadugwana, muphasi nya mhamba a na mu segela livbandre na mavili matshigu.

²²Aholu ma gu thaphela ma enedza mili watshavbo, muphasi nya mhamba a na tivisa gukhuye kha aga. Madwali nya sokono.

²³Aholu gibalavandza gya gumba dandra, gi ema kharadele, nyamba engedzelana, gu wonega gupwani gibalavandza nya gilondra, khu kharato, muphasi nya mhamba a na mu tivisa gukhuye a agide.

²⁴Muthu a gu bani ari ni wulanga nya guvbye milini gwaye, gibalavandza nya guvbye gya gu vbindrugedza gi kwalala mwendro guvbyuga,

²⁵muphasi nya mhamba a na mu khedzisa. A gu wona gukhuye avbo nya gibalavandza mawoya ma vbindrugedzide ma kwalala, ni gu wona gukhuye wulanga wakone wu bovede gu khala liphala, sokono yi dugago khavbo a nga vbyago; muphasi nya mhamba a na tivisa gukhuye muthu yoyo kha aga. Madwali nya sokono.

²⁶Aholu muphasi nya mhamba a gu wona gukhuye avba nya gibalavandza gu mwalo mawoya nya gukwalale, ni gukhuye wulanga kha gwa bovela ni gu khala liphala vbavbatshi nya tshonge, aholu na gi agide vbadugwana, a na segela muthu yoyo livbandre na mavili matshigu.

²⁷Khu litshigu nya livbandre na mavili a na mu khedza gambe. A gu wona gukhuye gilondra gi engedzede gi dandra milini, muphasi nya mhamba a na mu tivisa gukhuye kha aga; madwali nya sokono.

²⁸Aholu gibalavandza gya gumba dandra, aholu gi ema kharadele nyamba engedzelana, gu yeyedza gupwani tshonge ya gu simbiswa khu guvbya.

²⁹Mwama mwendro nyamayi, a gu wonega nari ni gilondra hungoni mwendro avba nya giledzu,

³⁰muphasi nya mhamba a gu khedzisa a wona gukhuye gilondra gyakone gi bovede gi gira liphala avba nya tshonge, ni gu wona mawoya nya gukwalale ma wuya ma hongana, a na tivisa gukhuye muthu yoyo kha aga: Beledwe khu madwali nya girandzi, a gu sokono ya hungoni mwendro ya vbagiledzutunu.

³¹Aholu muphasi nya mhamba a gu wona gukhuye wulanga nya gilondra kha gwa bovela gueta vbavbatshi nya tshonge, ni gukhuye mafefeleti kha ma sivbala, a na mu khothela livbandre na mavili matshigu.

³²Khu eli nya livbandre na mavili, muphasi nya mhamba a na khedza gambe gilondra; girandzi gya gu bani gya sa engedzelana gu dandra, ni gumba mana avbo mafefeleti nya gukwalale, ni gu girandzi gya sa bovela gi kembega vbavbatshi nya tshonge,

³³mudwali a na vidwa ndzudzu, aholu kha na vbaludwa avbo gu wonegago madwali. Khavbo avbo, muphasi nya mhamba a na mu segela gambe mambe livbandre na mavili matshigu.

³⁴Guvbelani nya matshigu yoyo, khu eli nya livbandre na mavili, muphasi nya mhamba a na khedza girandzi, a gu wona gukhuye kha gya engedzelana gu dandra, ni gukhuye kha gya bovela gi khala liphala vbavbatshi nya tshonge, muphasi nya mhamba a na tivisa gukhuye muthu yoyo agide. Mudwali a na handza guambala gwaye, khu kharato, a na aga.

³⁵Aholu sirandzi sa gu engedzelana gu dandra milini, hwane nya gu bani a tivisidwe guaga gwaye,

³⁶muphasi nya mhamba a gu wona gukhuye girandzi gi engedzelane, kha gu na vbwetega gambe gu khedzisa mwendro momo mafefeleti nya gu kwalale; mudwali kha aga.

³⁷Aholu, girandzi gya gu bani gya sa engedzelana gu dandra, ni gu ma wonega avbo mafefeleti nya gusivbale gu nonedza gupwani girandzi gi vbode, mudwali agide. Kharato, muphasi nya mhamba a na tivisa gukhuye agide.

³⁸Mwama mwendro nyamayi a gu wonega ni mavalavala milini gwaye,

³⁹a na khedzwa khu muphasi nya mhamba. A gu wona gukhuye mavalavala yakone kha ma aga ngudzu, gu nonedza gupwani wuhaga basi, wu dugago milini. Muthu yoyo agide.

⁴⁰Mwama a gu thegelela ndzudzu hungoni, khu lihandza, agide.

⁴¹A gu kulegela ndzudzu wa giwombotunu, mwendro wa makosini, lihandza a gu nalo, uye agide.

⁴²Aholu avba nya lihandza la giwombotunu mwendro la makositunu, gwa gu wonega gilondra ni gufuvila, sokono yi dugago lihandzani la giwombotunu mwendro makosini.

⁴³Muphasi nya mhamba a gu khedzisa a wona gukhuye gilondra gi dugago vbalihandzatunu la giwombotunu mwendro la makosini, gya gu pata gu aga ni gufuvila, khwatshi sokono tshongeni nya mili,

⁴⁴muthu yoyo a na ni sokono, kha aga. Muphasi nya mhamba a na tivisa gukhuye muthu yoyo kha aga. Ngumbe yi mu dugede khu hungoni.

⁴⁵Muthu a beledwego khu madwali yoyo nya sokono, fanede gu pferula guambala gwaye gu khala sitsangala, a vhilinganyisa ndzudzu, a fenengedza likana, a gulumela, khuye: Nya gunyenyeze! Nya gunyenyeze.”

⁴⁶Matshigu yatshavbo a na vbanyago nari ni madwali yoyo nya sokono a na dzipwe na nyenyezide, a na vbanya phuvbo, nyumba yaye yi na manega vbavbandze nya lizumbo.”

⁴⁷“Gwa gu wonega gibalavandza nya nga nya sokono avbo nya tshalu nya gugirwe khu mawoya mwendro khu linyu,

⁴⁸nya gulugwe khu dzikhindra nya linyu mwendro mawoya, vbalidowotunu mwendro avbo nya wumbe thumo nya gukhandrwe khu malowo;

⁴⁹avbo gu bedwego khu madwali ga gu vbyuga mwendro gufuvilanyana, avba nya mwendra, nya lidowo, nya khindra, nya wulugeli mwendro avbo nya gyombo gevbi ni gevbini gi khandridwego khu malowo, madwali nya sokono, gu vbwetega ma ya nonedzwa muphasi nya mhamba.

⁵⁰Muphasi nya mhamba a na khedzisa gwadi gibalavandza, a gu segela mudwali livbandre na mavili matshigu.

⁵¹Khu litshigu nya livbandre na mavili a nata khedza gibalavandza, a gu wona gukhuye gi engedzelane gudandra avba nya tshalu, nya khindra, nya wulugelo, nya lidowo mwendro gimbe gilo nya gukhandrwe khu lidowo; sokono yi hinisago sombo soso, si na lolela.

⁵²Guambala gogo mwendro khindra, mwendro tshalu nya gulugwe, gani khu mawoya gani khu linyu, mwendro gimbe gilo nya gukhandrwe khu lidowo gu na bani gu thaphedwe khu madwali yoyo, gu na vbiswa niloni kholu sokono nya guhinise.

⁵³Aholu muphasi nya mhamba a gu wona gukhuye gibalavandza kha gya engedzela gudandra avba nya mwendra, nya dzikhindra dzi lugedwego, mwendro avba nya gyombo gi khandridwego khu lidowo,

⁵⁴a na ruma guhandza sombo soso si gu na ni gibalavandza, a wuya khavbo a si khothela gambe nya wuvili, livbandre na mavili matshigu.

⁵⁵Muphasi nya mhamba a nga khedzago gibalavandza, hwane nya gu na va handzide, a gu wona gukhuye kha gya vbindrugedza makhalelo ni gukhuye kha gya engedzelana, gu yeyedza gupwani kha gya aga. A na vbisa gyombo gyogyo niloni kholu gi na ni sokono, gi hodzidwe khu ndrani mwendro khu vbavbandze gakone.

⁵⁶Aholu muphasi nya mhamba a gu wona gukhuye gibalavandza gi kuwulugide hwane nya gu bani na gi handzidwe, a na pferula gipandre nya tshalu, mwendro nya dzikhindra dzi lugidwego.

⁵⁷Gibalavandza gya gu wonega gambe vbatshalutunu, vbadzikhindratunu mwendro avbo nya gyombo nya lidowo, gu nonedza nya gupwani sokono yi dugago. A na vbisa niloni gyombo gi gu na ni gibalavandza.

⁵⁸Aholu tshalu, mwendro khindra, gilo gi lugidwego, mwendro gyombo nya gukhandwe khu lidowo, gi handzidwego gi mwalalega gibalavandza, gyombo gyogyo gi na handzwa gambe nya wuvili, khavbo avbo, gi na aga.

⁵⁹Oyu khu nayo wu ganelago khu madwali nya sokono, vbatshalutunu nya mawoya mwendro nya linyu, mwendro avba nya gyombo gevbi ni gevbini nya gugirwe khu lidowo, gasi si tidwa gupwani si agide mwendro kha sa aga.”