Read gitonga Levhi 16 Bible Online

Levhi 16 - gitonga bible

Levhi 16

¹Hwane nya gufe ga sanana sivili sa Aroni, PFHUMU Nungungulu a di ganela ga Mosi, gikhati va nga hidzimela vbafuvbi ga PFHUMU Nungungulu.

²PFHUMU Nungungulu a di embela Mosi, khuye: “Tivisa ndriyago Aroni gukhuwe, kha dzi kodzi gubela nya mubele wulangani nya guage, ndrani nya mwendra nya makhuvi, mbeli nya gikhalo nya ditshedzo gi guromo vbatshani nya Ngasa nya Gidzumeledzwano, gasi a sifi, kholu Eni nyi na wonega lipfhini vbatshani nya gikhalo nya ditshedzo.”

³ Aroni a na bela wulangani nya guage ngudzu, nari ni esi: Kuzi nya phaso nya ditshedzo ni nvuta nya phaso nya guvbiswe.

⁴A na ambala ngandzu nya linyu nya gukategiswe, a na fenengedza mili waye khu gikhunyula nya linyu; a na hunga giwunu khu keka nya linyu, a na ambala hungoni gihugu nya linyu. Guambala gu agisidwego, fanede gu gu ambala basi hwane nya gu na hambide mili waye khu mati.

⁵A na hakha dziphongo dzimbili nya vamabhongwe a na ningwago khu tshangano nya sanana sa Israyeli gasi gu gira phaso nya ditshedzo ni hamba nya phaso nya guvbiswe.

⁶Aroni a na phela khu gu dusa kuzi, a gira phaso nya ditshedzo a dzi agisa uye mune, a agisa ni ndranga yaye.

⁷Khu gulandrela a na dzega dziphongo dzimbili, a dzi resa mbeli gwa PFHUMU Nungungulu nyangwatunu nya Tshatsha nya Tshangano.

⁸Aroni a na hatha ga vamabhongwe va vavili, khu gu lola dzisolo: Moyo wa PFHUMU Nungungulu, mumbe wa Azazeli.

⁹Aroni a na ningela ga PFHUMU Nungungulu, mabhongwe wule wu nga hathwago khu solo, a na wu bikela a gira phaso nya ditshedzo;

¹⁰Aholu wule wu hathidwego khu solo gasi gu ningedwa Azazeli, wu na bikedwa na wu gu vbanya mbeli ga PFHUMU Nungungulu, gasi guta girwa nayo nya guagiswe vbatshani gwaye, va hegisa va yi ghula yi hongola giwulani, yi khala ya Azazeli.

¹¹Aroni a na bikela kuzi khu phaso nya ditshedzo khu sighoho saye, a na gira nayo nya gulivbe nandru khu uye mune ni ndranga yaye. Khavbo avbo, a na paya kuzi a gira phaso nya mhamba khu sighoho saye.

¹²A na dzega givbiselo nya libani a gi tadza khu magala a nga dusago khu vbagiluvelotunu gi guromo mbeli ga PFHUMU Nungungulu, a baga sandza sivili nya libani li hindzidwego, a dzega satshavbo a bela naso makhuvini.

¹³A na thela libani niloni, mbeli gwa PFHUMU Nungungulu, gasi wutshi nya gunungele wu fenengedza gikhalo nya wuhindzi gi guromo vbatshani nya Ngasa nya pwanano. A gu gira kharato kha na gafa.

¹⁴A na dzega novba wudugwana nya kuzi a mitegedzela khu nyala phuvbo ga Khugadambo nya gikhalo nya wuhindzi; khu nyala yaye, a na mitegedzela novba livbandre na guvili, mbeli nya gikhalo nya wuhindzi.

¹⁵ Hwane nya ugo, a na paya nyamabhongwe nya phaso nya ditshedzo khu kotani nya gighoho gya vathu, a dzega novba wakone a bela nawo wulangani nya guage ndrani nya mwendra nya makhuvi, a gira khu novba wowo idzosaye ni edzi a nga girago khu novba nya kuzi; a mitegedzela vbatshani nya gikhalo nya wuhindzi ni mbeli gakone.

¹⁶Kharato, wulangani nya guage a na gira nayo nya guagise, khu kotani nya gunyenyeze ga sanana sa Israyeli; ni gumba khodwa, ni sighoho sawe satshavbo; a na gira idzosaye avba nya Tshatsha nya Tshangano wu guromo vbakari gwawe, gunyenyezani gwawe.

¹⁷Gu nga manegi muthu ndrani nya Tshatsha nya Tshangano, gikhati khongolo nya phasi nya mhamba a na belago wulangani nya guage, gasi gu gira nayo nya guagiswe kala gikhati a dugago, na giride nayo nya gu dzi agise uye mune, ni gu agisa ndranga yaye ni tshangano watshavbo nya vathu va na Israyeli.

¹⁸Khavbo avbo, a na duga a gu hongola giluvelotunu, gi guromo mbeli ga PFHUMU Nungungulu, gasi guya gira avbo phaso nya ditshedzo. A ya dzega novba nya kuzi ni owu nya phongo a wu thela mudzikhehoni nya giluvelo ni wubambe gwatshavbo.

¹⁹Khu nyala yaye a na mitegedzela novba vbagiluvelotunu livbandre na guvili a gi kategisa ni gu gi handza gunyenyeza gwatshavbo gwa sanana sa Israyeli, gasi gu gi agisa.

²⁰Na vbedzide thumo nya guagise Wulanga nya Guage, Tshatsha nya Tshangano, ni giluvelo, a na bikela phongo nya guvbanye.

²¹Aroni a na handzega mandza yaye ya mavili hungoni nya nyamabhongwe wu vbanyago a dawulela vbatshani nya phongo yeyi guvivba gwatshavbo ga sanana sa Israyeli, gumba khodwa gwawe ni sighoho sawe, a vega kharati satshavbo hungoni nya nyamabhongwe; khu gu hegisa wu na rumedwa giwulani, wu vbelegedzwa khu mwama a emisidwego gu thuma thumo yoyo.

²²Mabhongwe wu na rwala guvivba gwanu gwatshavbo wu hongola nago hwindzo ngudzu, mughuli nya nyamabhongwe a naya wu tshiya giwulani.

²³ Khu hwane, Aroni a na bela gambe Tshatshani nya Tshangano aya tshula guambala nya linyu a nga ambalago gubelani gwaye wulangani nya guage, aya gu tshiya umo.

²⁴A na hamba khu mati givili gyaye wulangani wu agidego, a gu ambala gambe dzingandzu dzaye; khavbo avbo, a na duga aya gira ningelo waye nya phaso nya guvbiswe, ni owu wa vathu, a dzi girela nayo nya gu dzi agise uye mune ni gu agisa vathu.

²⁵A na vbisa gambe vbagiluvelotunu mafura nya sirengo nya phaso nya ditshedzo.

²⁶Wule a nga vbelegedzago nyamabhongwe ga Azazeli, a na handza guambala, a hamba mili waye khu mati, khavbo a na dzi kodzago gu bela gambe lizumboni.

²⁷Aholu kuzi ni nyamabhongwe nya phaso nya ditshedzo, novba wakone wu residwego makhuvini nya guage, gasi gu agisa, si na yiswa vbavbandze nya lizumbo, gu na vbiswa iyo lidowo ni nyama ni swanyi wakone.

²⁸Wule a nga ya si vbisago, a na handza dzingandzu dzaye, aya hamba mili waye khu mati, khavbo a na belago lizumboni.

²⁹Owu, wu na bani wuri nayo nya gupindruge vbakari gwanu; khu litshigu nya likhumi nya ngima nya livbandre na wuvili, mu na hala, mwatshavbo mu si thumi gilo, vamune tigo ni va nya guta va vbanyago vbakari gwanu.

³⁰Kholu, litshigu lolo, mu na giredwani nayo nya guvbanyiswe, gasi gu agiswani. Mu na agiswa sighoho sanu satshavbo mbeli ga PFHUMU Nungungulu.

³¹A na bani ari litshigu nya guhefemule vbakari gwanu, litshigu nya Sabhadho, na mu gu hala; oyu nayo wu na thumago kala gupindruga.

³²Wule a na gu bani na todzidwe a wumbedwa thumoni nya wuphasi nya mhamba, a tshikedza wulanga wa babe waye, khuye a na girago mhamba yeyi nya guagise sighoho, na ambade guambala nya linyu, guambala nya miphaso.

³³A na gira nayo nya guagise makhuvini nya guage, Tshatsha nya Tshangano, giluvelo, vaphasi nya mhamba ni vathu vatshavbo nya tshangano.

³⁴ Satshavbo sesi si na khala nayo nya gupindruge vbakari gwanu, gasi sanana sa Israyeli si agiswa gumogo khu mwaga, va handzwa sighoho sawe satshavbo.” Uye a di gira satshavbo iso PFHUMU Nungungulu a nga rumago Mosi.