Read gitonga Levhi 17 Bible Online

Levhi 17 - gitonga bible

Levhi 17

¹PFHUMU Nungungulu a di embela Mosi, khuye:

²“Ganela ga Aroni ni sanana saye, ni sanana satshavbo sa Israyeli, u va embela, khuwe: Aya khu mahungu ya PFHUMU Nungungulu a nyi rumidego gu mi embela:

³Ni wevbini wa ndrangani ga Israyeli a payago mombe, mwendro nvuta, mwendro phongo, ndrani nya lizumbo mwendro vbavbandze nya lizumbo;

⁴nyamba phela khu gu yi dzega a hongola nayo nyangwatunu nya Tshatsha nya Tshangano, gasi aya yi bikela ga PFHUMU Nungungulu, mbeli nya Wulanga nya Guage, a na ningwa nandru nya guvbaladze novba; khu gu na vbaladzide novba, a na fuviswa vbakari nya vathu vaye.

⁵Khu kharato, sanana sa Israyeli, si olovedego gu paya sirengo nya miphaso vbavbandze, si fanede gu yisa sirengo sawe ga muphasi nya mhamba a si bikela ga PFHUMU Nungungulu. A na si paya nyangwatunu nya Tshatsha nya Tshangano, a gira ningelo nya phaso nya pwanano nya gurungudze PFHUMU Nungungulu.

⁶Muphasi nya mhamba a na mitegedzela novba vbagiluvelotunu gya PFHUMU Nungungulu, nyangwatunu nya Tshatsha nya Tshangano, a na vbisa mafura a gira mhamba nya gunungele gwadi yi salalegisa PFHUMU Nungungulu.

⁷Gima kha va na nga ningela gambe sifuyo sawe, va girela miphaso vanungungulu vawe nya vamabhongwe[29] va vbanyago navo. Va fanede gu sayisa nayo yoyu, avo ni situgulwana sawe, khu mimela ni mimelana kala gupindruga.

⁸U na va embela gambe, khuwe: Muthu watshavbo wa nyumbani ga Israyeli, mwendro valuveli va vbanyago vbakari gwawe a na ningelago phaso nya guvbiswe, ambari wuri wumbe phaso,

⁹nyamba phela khu gu bikela girengo gyakone nyangwatunu nya Tshatsha nya Tshangano, gasi gu ningela ga PFHUMU Nungungulu, muthu yoyo a na fuviswa vbakari nya vathu vaye.”

¹⁰“Gani khu wevbini muthu wa nyumbani ga Israyeli, mwendro valuveli va vbanyago vbakari gwawe, a na hodzago novba, gani lifumbu muni, nyi na mu wugela muthu yoyo a hodzago novba, nyi mu fuvisa vbakari nya vathu vaye.

¹¹ Kholu guvbanya nya mili gomo novbani; nyi mu ningide novba gasi mu agisa khuwo guvbanya gwanu vbagiluvelotunu, gasi guditshedzwa mihefemulo yanu, kholu novba wu na ni tshivba nya guagise guvbanya gwanu.

¹²Khu guralo, nyi embede sanana sa Israyeli, kheni: Gu nga manegi ni moyo basi vbakari nya sanana sa Israyeli ambari va nya guta va vbanyago vbakari gwawe a na hodzago novba.

¹³Ni wevbini muthu vbakari nya sanana sa Israyeli, mwendro valuveli va vbanyago vbakari gwanu, a sotago girengo nya likhabi mwendro ginyoni nya esi si dzumedziswago gu hodzwa, a na vbaladze novba wakone a wu futela khu mafu.

¹⁴ Kholu guvbanya nya mili gomo novbani gwaye, khidzo kharato nyi nga embela sanana sa Israyeli, kheni: Mu nga hodzini novba ni wa gevbini girengo, kholu guvbanya gwaye gomo novbani gwaye. Oyu a hodzago novba a na fuviswa vbakari gwawe.

¹⁵Muthu watshavbo, gani givelegwa mwendro muluveli, a gu hodza girengo nya gufe gyabune, mwendro nya gusongwe khu sirengo nya likhabi, a na handza guambala gwaye, aya hamba matini, ambari ulo a na nyenyeza kala gupfolani nya lidambo; hwane nya ugo, a na aga.

¹⁶Aholu, a gumba handza guambala gwaye ni gumba hamba mili waye, a na rwala gulemela nya nandru waye.”