Read gitonga Levhi 18 Bible Online

Levhi 18 - gitonga bible

Levhi 18

¹PFHUMU Nungungulu a di ganela gambe ga Mosi, khuye:

²“Ganela ga sanana sa Israyeli, u si embela, khuwe: Eni kheni PFHUMU Nungungulu wanu.

³Mu nga yedzedzelini mavbanyelo ya Vagipiti, tigoni mu vbanyidego umo, gambe mu nga giri kha nga idzo va girago tigoni ga Khanani, tigoni nyi mi yisago iyo, mu nga landriseli mavbanyelo nya tumbunugo wawe.

⁴Mu na landrisa sileletelo sangu, mu sayisa milayo yangu, mu vbanya khiyo. Eni kheni PFHUMU Nungungulu wanu.

⁵ Mu na landrisa sileletelo ni milayo yangu, kholu oyu a yi landrisago a na vbanya khiyo. Eni kheni PFHUMU Nungungulu wanu.

⁶Gu nga manegi mwama vbakari gwanu a tiyelago gu hidzimela ga nongo waye nya nyamayi, wule a gu nongo waye, kholu a nga funungula wumbwiri waye. Eni kheni PFHUMU Nungungulu.

⁷U nga fununguli wumbwiri wa babe wago khu gu lala ni mayi wago. Khuye mayi wago, u nga fununguli wumbwiri waye.

⁸ U nga fununguli wumbwiri wa mwangadzi wa babe wago; kholu wumbwiri wa babe wago.

⁹ U nga fununguli wumbwiri wa ndriyago, a gu gyanana gya babe wago, mwendro gyanana gya mayi wago; oyu a velegidwego ndrangani, ambari wule a velegidwego vbavbandze, u nga fununguli wumbwiri waye.

¹⁰U nga fununguli wumbwiri wa tugulu wago nya guvelegwe khu gyanana gyago nya mwama mwendro nya nyamayi, kholu wumbwiri wago.

¹¹U nga fununguli wumbwiri wa ndriyago, gyanana gya mwangadzi wa babe wago, a velegidwego khu babe wago, kholu i ndriyago.

¹²U nga fununguli wumbwiri wa hane wago, ndruye wa babe wago, kholu novba moyo ni babe wago.

¹³U nga fununguli wumbwiri wa ndruye wa mayi wago, kholu novba moyo ni mayi wago.

¹⁴ U nga fununguli wumbwiri wa babedugwane wago khu gu lala ni mwangadzi waye, kholu uye mayi wago.

¹⁵ U nga fununguli wumbwiri wa ngadzamwane wago, kholu i mwangadzi wa gyanana gyago, u nga mu fununguli wumbwiri waye.

¹⁶ U nga fununguli wumbwiri wa namu wago mwangadzi wa koma wago, kholu wumbwiri wa ndriyago.

¹⁷ U nga fununguli wumbwiri wa nyamayi gumogo ni gyanana gyaye; gambe u nga dzegi tugulu waye nya guvelegwe khu gyanana gyaye nya mwama mwendro nya nyamayi, u funungula wumbwiri waye, kholu vatshavbo valongo vaye nya lisine; gulala navo gu ngu lolela ngudzu.

¹⁸U nga dzegi nyamayi u mu bhanya gumogo ni ndriyaye na nga gu vbanya, kholu isoso si nga vanga livengo ni wukhusu vbakari gwawe khu gufunungula wumbwiri wa namu wago.

¹⁹ U nga hidzimeli ga nyamayi a loledego khu gu bani na gu wona migima, u funungula wumbwiri waye.

²⁰ U nga lali ni mwangadzi wa muakelane wago, u nga dzi nyenyezisa.

²¹U nga ningeli ni moyo nya sanana sago, si girwa phaso nya guphasedwe Moloki,[30] u nga nyenyezisa lina la Nungungulu wago. Eni kheni PFHUMU Nungungulu.

²²U nga lali ni mwama kwanu u mu gira nyamayi, isoso si nyenyezide ngudzu.

²³ U nga lali ni girengo, u nga dzi nyenyezisa khigyo; ambari nyamayi a nga hidzimeli ga girengo a bhayana nagyo, kholu isoso dzitshoni nya guthise.

²⁴Mu nga dzi nyenyezisi khu gugira silo nya nga isoso, kholu khiso si nga nyenyezisa mayigo nyi na ma tutumisago mbeli gwanu.

²⁵Litigo li dzi nyenyeziside; Eni nyi na tsayisa guvivba gwaye. Khu kotani nya ugo, litigo li na gosa vathu va vbahidego umo.

²⁶Gasi enu, mu na landrisa milayo ni sileletelo sangu, mu nga giri ni gimwegyo basi nya silo soso nya gunyenyeze, mwatshavbo, gani givelegwa gya tigoni, gani khwa guta luvela vbakari gwanu;

²⁷kholu guvivba gwatshavbo gogu, gu giridwe khu vathu va mi hegudzidego guta vbaha tigoni momu, enu mu si gu vbohi; khigyo gi giridego litigo li khala la gu nyenyeza.

²⁸Dzi woneleni nenu, litigo li nga mi gosani khu gu dzi nyenyezisani, kha nga li gosidego vale va nga vbanyago umo, mu si gu vbohi enu.

²⁹Vatshavbo va na girago gimwegyo nya gulolele gogo, va na fuviswa vbakari ga vathu vawe.

³⁰Khavbo avbo, sayisani milayo yangu, mu nga yedzedzelini tumbunugo nya mavbanyelo nya gunyenyeze, va vbanyidego khayo mu si gu vbohi enu. Mu nga dzi nyenyezisi khayo. Eni kheni PFHUMU Nungungulu wanu.”