Read gitonga Levhi 24 Bible Online

Levhi 24 - gitonga bible

Levhi 24

¹PFHUMU Nungungulu a di embela Mosi, khuye:

²“Ruma sanana sa Israyeli si gu resela mafura nya guhutwe nya mihandro nya olivha yi rugutudwego, gasi guta thumiswa avba nya gidzigaredzo nya dzikandriya, gasi dzikandriya dzi khala na dzi gu dzura gikhati gyatshavbo.

³Aroni a na dzi vega khu phuvbo ga vbavbandze nya mwendra nya makhuvi wu segago ngasa nya gidzumeledzwano, ndrani nya Tshatsha nya Tshangano, gasi dzi dzure nyamba tshimega, gukhugela silambosile kala dzimindrudzile, mbeli ga PFHUMU Nungungulu. Oyu nayo nya gupindruge ga situgulwana sanu.

⁴A na vegedzela dzikandriya avba nya gidzigaredzo nya ndralama nya guhutwe, dzikandriya dzodzo, dzi na dzura nyamba tshimega mbeli ga PFHUMU Nungungulu.”

⁵U na dzega gambe wuguvbi nya gudadatwe u phula khuwo likhumi na sivili sibaba, gibaba ni gibaba gi na dzega mipimo mivili nya gipandre nya likhumi nya efa.

⁶ U na si vegedza gwadi vbatshani nya meza nya ndralama nya guhutwe, mbeli gwa PFHUMU Nungungulu, u si sasamedzela khu ndzarara mbili; ndzarara ni ndzarara u vega livbandre na gimwegyo sibaba.

⁷Vbatshani nya ndzarara ni ndzarara u na vega libani li gira gialakanyiso vbatshani nya sibaba, kha nga ningelo nya guvbiswe mbeli ga PFHUMU Nungungulu.

⁸Gikhati gyatshavbo, Sabhadho ni Sabhadho, Aroni a na vega sibaba sesi mbeli gwa PFHUMU Nungungulu, gu khala ningelo wa sanana sa Israyeli kha nga gidzumeledzwano nya gupindruge.

⁹ Guhodza gogu gu na lumba Aroni ni sanana saye; va na gu hodza wulangani nya guage, kholu khigyo gipandre nya guage ngudzu, gi kasedwago avo, avba nya miningelo yi vbisedwago PFHUMU Nungungulu. Oyu nayo wu tiyisidwego kala gupindruga.

¹⁰Wughoveloni gi di romo gyanana gimwegyo nya guvelegwe khu nyamayi moyo nya Muisrayeli, babe waye nya Mugipiti a nga bani a gu vbanya vbakari nya sanana sa Israyeli. Tshigu mwedo, gyanana gegi gya nyamayi nya Muisrayeli gi di ganedzisana ni mwama moyo wa na Israyeli.

¹¹Gyanana gya nyamayi nya Muisrayeli gi di hembulula gi vala Lina la PFHUMU Nungungulu; khavbo avbo, va di gi dzega va gi yisa ga Mosi. Mayi wakone a di ranwa pwani khu Selomiti, gyanana gya Dhebhiri, nya lihundzu la Dhani.

¹²Va di ya khothela pasoni mwama wule, kala PFHUMU Nungungulu a gu tivisa idzo a fanedego gu lamudwa khidzo.

¹³PFHUMU Nungungulu a di ganela ga Mosi, khuye:

¹⁴“Dusa muhembululi vbavbandze nya wughovelo: Vatshavbo vale va mupwidego na gu vala, va na handzega mandza hungoni gwaye, tshangano watshavbo wu na mu pfare khu siwindri.

¹⁵Ganela u embela sanana sa Israyeli, khuwe: Muthu watshavbo a ganelago magana nya guvale Nungungulu a na rwala gulemela nya gighoho gyaye.

¹⁶Oyu a valago lina la PFHUMU Nungungulu a na songwa, tshangano watshavbo wu na mu pfara khu siwindri, vathu vatshavbo, gani muwuyi, gani givelegwa gya Israyeli, oyu a valago Lina la PFHUMU Nungungulu fanede gu songwa.”

¹⁷ Muthu a gu songa mumbe muthu, a na songwa nuye. [40]

¹⁸Aholu uye a songago gifuyo a na livba womi khu womi.

¹⁹Oyu a bayisago muthu kwawe, a na girwa nuye idzosaye:

²⁰ Gufanywa khu gufanya; liso khu liso; likwaha khu likwaha, gukhedza khidzo a bayisidego khidzo muthu kwawe, a na girwa nuye kharato.

²¹Oyu a songago gifuyo a na gi livba khu gifuyo; gasi oyu a songago muthu a na songwa nuye.

²² Mu na fumwa khu nayo moyo basi mwatshavbo; vawuyi ni sivelegwa sa Israyeli, kholu Eni kheni PFHUMU Nungungulu wanu.

²³Mosi a di ya tshamusela satshavbo ga sanana sa Israyeli. Khavbo avbo, va di dzega muvali va duga naye vbavbandze nya wughovelo, va ya mu pfara khu siwindri. Kharati, sanana sa Israyeli si di tadzisa sileletelo sa PFHUMU Nungungulu a nga leletelago Mosi.