Read gitonga Levhi 26 Bible Online

Levhi 26 - gitonga bible

Levhi 26

¹ “Mu nga dzi gireleni vanungungulu nya malipha, ambari gu emisani sifananiso nya guvatwe ni sihuru, tigoni gwanu mu nga dzi gireleni siwindri mu si mburisela gasi mu si khozela; kholu Eni kheni PFHUMU Nungungulu wanu.

²Mu na vegisa matshigu yangu nya dzisabhadho ni gu ninga githawo wulanga wangu nya guage. Eni kheni PFHUMU Nungungulu wanu.”

³Mwa gu vegedzani milayo yangu, mu yingisa sileletelo sangu mu si landrisa,

⁴khu guralo mwa gu gira isoso, nyi na mi ninga ndzadzi khu gikhati gi vbwetegago; mafu ma na mi ninga dzimbewu nya gutale, ni misimbo ya thembweni yi na dusa mihandro nya yadi.

⁵Guvbwera nya tirigu gu na simama kala matshigu nya gu havedwe dziuvha, kala mu vbohisa matshiguni nya gilimo ni gu yala dzimbewu; mu na hodza mu khura gambe mu na khala na mu tiyide tigoni gwanu.

⁶Nyi na wuyisa gurula tigoni; mu na lala na mu tengide nyamba thurugiswa khu muthu, nyi na fuvisa sirengo nya wurena sa khabini, tigoni gwanu kha mu na beledwa khu dzinyimbi.

⁷Mu na lundra valala vanu, mu va songa khu matshari mbeli gwanu.

⁸Livbandre vama nya va na gyanu, va na lundra lizana (100) ya valala, lizana nya va na gyanu, va na lundra likhumi magumi mazana (10.000); valala vanu va na songetedwa mbeli gwanu khu matshari.

⁹Gasi enu vambe nyi na mi khathalelani, nyi mi andrisa mu tala, nyi na tiyisa gidzumeledzwano gyangu nanu.

¹⁰Mu na hodza sivbila nya nango yi vbindridego, mu dusa sa gale mu sisangalani gasi gu theledzela esi nya siphya.

¹¹Nyi na vbaha nyumba yangu nya guage vbakari gwanu, hefemulo wangu kha wu na hambana nanu.

¹²Nyi na bani nyiri vbakari gwanu, nyi khala Nungungulu wanu, enu mu khala vathu vangu.

¹³Eni kheni PFHUMU Nungungulu wanu, nyi mi dusidego khu tigoni ga Egipito, gasi mu si simami gu khala dzikhumbi dzawe; nyi kavilede makhetshe nya kanga wanu, gasi mu gimbila na mu ololokide henu tshwi.

¹⁴Aholu mwa gumba nyi yingisa, ni gumba landrisa milayo yeyi;

¹⁵mwa gu kanyisa sileletelo sangu, ni gumba girani milayo yangu, mu kala mu vboha avbo nyamba sayisa milayo yangu yatshavbo, mu pila gidzumeledzwano gyangu;

¹⁶eni nyi na mi girani esi: Nyi na mi rumela sigaradzo nya guthise, gikhohola ni gindrendrewane, si ta mi vbedza tshivba maho yanu ni womi wanu; mu na lima mu yala mahala dzimbewu dzanu, dzi ta hodzwa khu valala vanu.

¹⁷Nyi na mi pfhurarela, mu na padwa khu valala vanu, mu fumedwa khu avo va mu nyenyago; khu guralo mu na tutuma nyamba lundrwa khu muthu.

¹⁸Ambari khu satshavbo sesi mwa gumba nyi yingisani, nyi na simama gu mi tsayisa livbandre na dzimbili dzinyondro khu kotani nya sighoho sanu.

¹⁹Nyi na vbedza matshandza nya tshivba yanu, nyi gira ndzadzini gukhwatshi i simbi, ni mafu yanu gukhwatshi sugu.

²⁰Mu na luza tshivba khu guthuma mahala; mafu yanu kha ma na dusa dzimbewu, ni misimbo ya tigoni gwanu kha yi na dusa mihandro yaye.

²¹Mwa gu hambanani ni eni, mu si vbweti gu nyi yingisa, nyi na mi reselani mitungu livbandre na dzimbili dzinyondro, gasi gu mi tsayisa khu sighoho sanu.

²²Nyi na rumela sirengo nya likhabi si songetela sanana sanu, si na vbedza sifuyo sanu, enu nenu mu na vbedzwa khiso mu khala vadugwana; dzindzila dzanu dzi na fuva.

²³Ambari khu guralo, mwa gumba vbindrugedzani mu wuya gwangu, mu simama gu nyi pfurarelani,

²⁴Eni neni nyi na hambana nanu nyi mi tsayisa khu gu wuyelela livbandre na dzimbili dzinyondro khu kotani nya sighoho sanu.

²⁵Khu kotani nya gu hambaniseni gidzumeledzwano gyangu, nyi phodza khu gu mi rumela dzinyimbi; mwa gu tshanganani madhoropani gwanu, nyi na rumela vbakari gwanu mitungu, nyi na mi ningelani mandzani ga valala vanu.

²⁶Vbavbandze nya isoso, nyi na mi vbungulela guhodza gwanu, avbo nya gu likhumi vanyamayi va na phula guhodza khu khali mweyo muya khu gupimedwa; mu na hodzani, aholu kha mu na khura.

²⁷Ambari khu satshavbo sesi, mwa gu simama gumba nyi yingisani,

²⁸Eni nyi na mi wugela khu likhulo, nyi mi tsayisa livbandre na dzimbili dzinyondro khu kotani nya sighoho sanu.

²⁹Mu na hodza nyama nya sanana sanu nya sikhwathana nesi nya sagadzyana.

³⁰Nyi na khungumulela malanga yanu nya sigomo, nyi pandrelela siluvelo sanu, nyi wungeledzela sirumbi sanu vbatshani nya sirumbi sa vanungungulu vanu nya sifananiso; hefemulo wangu, wu na goroga khu enu.

³¹Madhoropa yanu nyi na ma gira marumbi, nyi khungumulela malanga yanu nya miphaso, gima kha nyi na tsakiswa khu gunungela nya mahema nya miphaso yanu.

³²Nyi na ghohetela litigo leli, valala vanu va nata khalago umo, va na liwuga ni gu samala.

³³Nyi na mi phalalegisa vbakari nya va nya mayigo, nyi mi fuvisa khu matshari; litigo lanu li na khala giwula, ni madhoropa yanu ma na khala marumbi.

³⁴Khu guralo, litigo li na vegisa dzisabhadho dzaye, khu matshigu yale li na gu bani liri giwula, enu mu na bani muri tigoni ga valala vanu; khu gikhati gegi, litigo li na hefemula li sayisa dzisabhadho dzaye.

³⁵Li na hefemula khu matshigu yaye li na gu bani liri giwula, kholu khala kodza gu hefemula ndrani nya dzisabhadho nya matshigu yale mu nga bani mu vbanya umo.

³⁶Gasi vale va na gu vbulugago, Eni nyi na va thela hwanga wu na tadzago myonyo yawe, mayigoni ga valala vawe, avbo va na pwago gya gu tshagari, va na thava gukhwatshi va gu wona litshari; va na thega nyamba lundrwa khu muthu.

³⁷Va na thegela vbatshani ga vathu vakwawe gukhwatshi va gu thava matshari, nyamba lundrwa khu muthu; gima kha mu na wuga gambe vbatshani ga valala vanu.

³⁸Mu na ya fela ga mambe mayigo henu bhi!

³⁹Va na gyanu, vale va na gu vbulugago, va na mbembiswa khu manyala yawe ni ya vababe vawe tigoni ga valala vawe.

⁴⁰Aholu, va gu dzi laya khu guvivba gwawe, ni guvivba ga vababe vawe, khu sihoso va nyi giridego; va gu dzi dzi laya khu gu na va hambanide ni dzindzila dzangu,

⁴¹iso si nga nyi girago nyi hambana navo, nyi va yisa tigoni ga valala vawe; myonyo yawe nya gulemele ya gu dzi thesa vbavbatshi, khu milandru yawe,

⁴² eni neni nyi na dundruga gidzumeledzwano gyangu nyi giridego ni Jakobe, ni Isaki, ni Abrahama, nyi dundruga gambe ni litigo lawe.

⁴³Va na diga Litigo li khala giwula, li mana guhefemula gwaye nya dzisabhadho; avo va mana hakhelo nya milandru yawe, kholu va hambanide ni sileletelo sangu, mihefemulo yawe yi nyenyide milayo yangu.

⁴⁴Ambari khu kharato, avbo va nga bani na vari tigoni ga valala vawe, gima kha nya va dzudzuga, ambari gu va diga nya gukala nyi va mbembisa nyi divala gidzumeledzwano nyi giridego navo; kholu Eni kheni PFHUMU Nungungulu wawe.

⁴⁵Khu kotani nya gu va haladze, nyi alakanyide gidzumeledzwano nyi giridego ni vababe vawe, ava nyi va dusidego khu tigoni ga Egipito, mbeli nya mayigo, gasi nyi khala Nungungulu wawe. Eni kheni PFHUMU Nungungulu.”

⁴⁶Khiyo eyi milayo, ni sileletelo, ni sirumo esi PFHUMU Nungungulu a si vegidego vbakari ga sanana sa Israyeli, gigomoni ga Sinayi khu mandzani ga Mosi.